كاسىبي ايەلدەر بوكسى تۋرالى دەرەكتى فيلم ءتۇسىرىلدى

استانا. قازاقپارات - تانىمال قازاقستاندىق دوكۋمەنتاليست قانات بەيسەكەيەۆ جەلىدە جاڭا فيلمىن جاريالادى.

لەنتانىڭ باس كەيىپكەرى - بوكسشى ايدا ساتىبالدينوۆا.

فيلم «Lady Sparta». LA- داعى كاسىبي ايەلدەر بوكسى» دەپ اتالادى. وندا ول ءوزىنىڭ ءومىرىن، بوكسقا قالاي كەلگەنىن جانە الداعى جوسپارلارى تۋرالى باياندايدى.

«ايدا بوكسقا 25 جاسىندا كەلگەن، بۇل بوكستاعى مانساب ءۇشىن ۇلكەن جاس. سوعان قاراماستان، بۇگىندە ول ا ق ش- تىڭ كاسىبي رينگتەرىندە ايقاسۋدا جانە بارلىق بەلدىكتەر مەن تيتۋلداردى جەڭىپ الۋدى ارماندايدى»، - دەلىنگەن ۆيدەو سيپاتتاماسىندا.

«ايەلدەر اراسىنداعى GGG»  اتانعان ايدا كاسىپقوي بوكستا التى كەزدەسۋ وتكىزگەن، ونىڭ رەكوردى - 4-1-1، 1 ك و. ول بيىلعى شىلدە ايىندا امەريكالىق سەلەنا بارريوستان (5-0، 2 ك و) نوكاۋتپەن جەڭىلىپ قالعان ەدى. ءبىراق 31 جاستاعى قازاقستاندىق بوكسشى 29 قىركۇيەكتە مەكسيكالىق ۆەرونيكا ۆالتەررامەن وتكەن ايقاستا ەكىنشى راۋندتا تەحنيكالىق نوكاۋتپەن جەڭىسكە جەتتى.

26 جاستاعى قانات بايسەكەيەۆ ءبىرقاتار دەرەكتى فيلمدەردىڭ اۆتورى. ولاردىڭ اراسىندا «الىسقا قاتىنايتىن جۇرگىزۋشى»، «برۋكليندەگى قازاق پوليتسەيى» فيلمدەرى، سونداي-اق ا ق ش ازاماتتارى اسىراپ العان قازاقستاندىق بالالاردىڭ ءومىرى باياندالعان «بالا» كارتيناسى بار.