بريتانيادا ءبىلىم العان قازاقستاندىقتار اۋىلداردا مەكتەپ اشپاق
ولار قولعا العان Global Village Schools جوباسىنىڭ ماقساتى - ەڭ ۇزدىك الەمدىك تاجىريبە بويىنشا اۋىلداردا جوعارى ساپالى باستاۋىش جانە ورتا ءبىلىم بەرەتىن مەكتەپتەر اشۋ.
جوبا ماقساتى كەز كەلگەن اۋىل وقۋشىسىنا اۋەلگى مۇمكىندىكتەرى مەن اكادەميالىق قابىلەتتەرىنە قاراماستان تۇرعىلىقتى جەرىندە ساپالى ءبىلىم الۋىنا جاعداي جاساۋ. ءبىلىم فينليانديا، نورۆەگيا، يسلانديا سياقتى ەلدەردىڭ وزىق ۇلگىلەرى مەن تاجىريبەلەرىنە سايكەس بەرىلمەك. PhD ستۋدەنتتەر مۇعالىمدەرگە ساراپشىلىق تۇرعىدا قولداۋ كورسەتىپ، ولاردىڭ قوسىمشا ءبىلىم الۋىنا جانە مەنەدجەرلىك قابىلەتتەرىنىڭ ارتۋىنا كومەكتەسەتىن بولادى.
«ماسەلەن، ساپالى ءبىلىم الۋ ءۇشىن ۇلكەن قالالار مەن ورتالىقتارعا بارۋدىڭ قاجەتتىلىگى بولمايدى. ولار استانالىق مەكتەپ بىتىرۋشىلەرىمەن باسەكەگە قابىلەتتى بولا تۇسەدى. ەڭ باستىسى، جاڭا مەكتەپتەر سالۋ ارقىلى اۋىلداردا جاڭا جۇمىس ورىندارى اشىلادى. وسىلايشا اۋىل جاستارىنىڭ قالاعا اعىلۋ لەگىن توقتاتۋعا تىرىساتىن بولامىز»، - دەيدى لەستەر ۋنيۆەرسيتەتىنىڭ PhD ستۋدەنتى حاليدا ءاجىعۇلوۆا.
باستامانىڭ اۆتورلارى ۇلى بريتانيا مەن يرلاندياداعى قازاقستاندىق دوكتورانتتار قاۋىمداستىعىنىڭ مۇشەلەرى. ولار ءارقاشان ەلىمىزدىڭ تۇراقتى دامۋىنا باعىتتالعان جوبالاردى جۇزەگە اسىرۋعا مۇددەلى.
«ءبىزدىڭ دوكتورانتتاردىڭ 30 پايىزى بريتانيالىق ۋنيۆەرسيتەتتەردىڭ ەسەبىنەن وقىپ جاتقان ستۋدەنتتەر. 70 پايىزى «بولاشاق» باعدارلاماسىمەن ءبىلىم الىپ جاتىر. ياعني ءبىزدىڭ قاۋىمداستىقتاعىلار بريتانيالىق ۋنيۆەرسيتەت گرانتتارىنىڭ يەگەرى بولا تۇرا ەلگە ورالىپ، حالىقتىڭ ءال- اۋقاتىن جاقسارتۋعا اتسالىسپاق»، - دەيدى قازاقستاندىق دوكتورانتتار قاۋىمداستىعىنىڭ پرەزيدەنتى ءاليا سەمبايەۆا.
باستاماشى توپ قازىر يۆەستورلار مەن ءبىلىم سالاسىنداعى نيەتتەس ادامداردى ىزدەستىرىپ جاتىر. ولار ويلاعاندارى جۇزەگە اسىپ، قازاقستاندىق اۋىلداردىڭ تۇراقتى دامۋىنا سەبەپشى بولاتىندىقتارىنا سەنىمدى.