سانكت-پەتەربۋرگتە ءاليحان بوكەيحانعا ەستەلىك تاقتا ورناتىلادى

استانا. قازاقپارات - سانكت-پەتەربۋرگ مەملەكەتتىك ورمان-تەحنيكالىق ۋنيۆەرسيتەتىنىڭ عىلىمي كەڭەسى باس عيماراتىنىڭ ماڭدايىنا الاش كوسەمى ءاليحان بوكەيحانعا ەستەلىك تاقتا ورناتىلاتىن بولدى.

بۇل تۋرالى فەيسبۋك پاراقشادا الاشتانۋشى، ءاليحانتانۋشى سۇلتان حان اقق ۇلى جازدى، دەپ حابارلايدى قازاقپارات ءتىلشىسى.

«ءسۇيىنشى، الاش ۇرپاقتارى، ءسۇيىنشى!!! وسىدان تۋرا جارتى ساعات بۇرىن عانا سانكت-پەتەربوردان قۋانىشتى جاڭالىق كەلىپ جەتتى. التى الاش كوسەمى ءاليحان بوكەيحاننىڭ 1890-1894-جىلدارى وقىپ بىتىرگەن بۇرىنعى يمپەراتورلىق ورمان ينستيتۋتى، قازىرگى سانكت-پەتەربور مەملەكەتتىك ورمان-تەحنيكالىق ۋنيۆەرسيتەتىنىڭ عىلىمي كەڭەسى باس عيماراتىنىڭ ماڭدايىنا ءوزىنىڭ داڭقتى تۇلەگى، 2015-جىلى يۋنەسكو باس كونفەرەنتسياسىنىنىڭ 38-سەسسياسى «بۇكىل الەمدىك شىنايى داڭقتى قايراتكەر» دەپ تانىعان ءاليحان بوكەيحانعا ەستەلىك تاقتا ورناتۋ تۋرالى ۇسىنىستى 27 داۋىسپەن قولداپ، 7 داۋىس قارسى، 5 داۋىس قالىس قالىپ، باسىم كوپشىلىك داۋىسپەن ماقۇلدادى»، - دەپ جازدى سۇلتان حان اقق ۇلى.

ەسكەرتكىش تاقتا ورناتۋدى وسى ج و و- نىڭ تاعى ءبىر قازاق تۇلەگى مايكەن ازەنوۆ ۇسىنىپ، عىلىمي كەڭەستىڭ قاراۋىنا ارنايى حات جولداعان.

«ناتيجەسىندە وسىنداي قۋانىشتى شەشىم قابىلداندى. ەسكەرتكىش تاقتانى جاساتىپ، ورناتۋدى «اق جول» پارتياسى ءوز جاۋاپكەرشىلىگىنە الىپ وتىر.

«ودان بولەك ۇلت كوسەمىنىڭ قيان-كەسكى كۇرەسكە تولى عۇمىرىنىڭ اقىرعى 15 جىلىن (1922-1937 ج.ج.) وتكىزگەن ماسكەۋدەگى ب. كيسلوۆسكي ورامى، 4 ءۇيى مەن سامارا قالاسىنداعى 1909-1917-جىلدارى تۇرعان كازانسكايا كوشەسى، 30 (قازىر 32 ءۇي) ۇيىنە دە ەستەلىك تاقتا ورناتۋ ءىسى قولعا الىندى. «اق جول» پارتياسىنىڭ ماجىلىستەگى فراكسياسىنان ماسكەۋدەگى ەلشىلىككە تيەسىلى حات جولداندى. ەندى ماسكەۋدەن حابار كۇتىپ وتىرمىز»، - دەيدى الاشتانۋشى.