ۇلتتار ليگاسى: قازاقستان قۇراماسى اندوررانى ءىرى ەسەپپەن جەڭدى

استانا. قازاقپارات - فۋتبولدان ۋەفا ۇلتتار ليگاسى د ديۆيزيونىنىڭ ءبىرىنشى توبىندا قازاقستان قۇراماسى ءوز الاڭىندا اندوررانى قابىلداپ، 4:0 ەسەبىمەن جەڭىسكە جەتتى، دەپ حابارلايدى قازاقپارات ءتىلشىسى.

ءبىرىنشى تايمدا- اق 2:0 ەسەبىمەن العا شىققان ستانيمير ستويلوۆتىڭ شاكىرتتەرى كەزدەسۋدىڭ ەكىنشى كەزەڭىندە دە باسىمدىلىقتارىن كورسەتە ءبىلدى. اسىرەسە، كوماندا كاپيتانى باۋىرجان يسلامحان ارىپتەستەرىنىڭ شابۋىلىن ۇيىمداستىرا بىلەتىن ايرىقشا قابىلەت- ونەرىمەن كورىندى.

61-مينۋتتا ب. يسلامحاننىڭ سول قاناتتان باعىتتاعان دوبىن جوزەپ گومەس قاقشىپ الام دەپ، ءوز قاقپاسىنا وتكىزىپ الدى - اۆتوگول. جەتى مينۋتتان كەيىن س. مۇجىقوۆقا قارسى دورەكى ويناعان جوردي الاەس الاڭنان قۋىلدى.

72-مينۋتتا بارىنشا تەر توككەن باقتيەر زاينۋتدينوۆتىڭ ورنىنا رومان مۋرتازايەۆ شىقتى. ەكى مينۋتتان كەيىن سول قاپتالدان عافۋرجان سۇيىمبايەۆتان پاس العان ر. مۋرتازايەۆ باسپەن قاقپا توعىزدىعىن ءدال كوزدەدى - 4:0.

77-مينۋتتا كورەرمەندەر قوشەمەتىنە يە بولعان ە. سەيداحمەتتى ماكسيم فەدين، سوسىن بۇل ويىندا ەرەكشە كوزگە تۇسكەن تاعى ءبىر فۋتبولشى ع. سۇيىمبايەۆتى يان ۆوروگوۆسكي الماستىردى.

بۇدان كەيىن قازاقستاندىقتاردىڭ ەسەپتى ەسەلەي تۇسەتىندەي مۇمكىندىكتەرى بولدى. اندوررالىقتار دا ويىنشىلارىن «جاڭالاعانمەن»، ودان ەشتەڭە ونبەدى.

وسىلايشا قازاقستان قۇراماسى اندوررانى 4:0 ەسەبىمەن تاس- تالقان ەتتى.

ەسكە سالا كەتەيىك، بۇدان بۇرىن قازاقستان قۇراماسىنىڭ اندوررانى ءبىرىنشى تايمنان كەيىن 2:0 ەسەبىمەن ۇتىپ جاتقانىن جازعان بولاتىنبىز. وسى جەڭىستەن سوڭ قازاقستاندىقتار ءوز توبىندا 5 ۇپايمەن ەكىنشى ورىنعا شىقتى. الايدا د ديۆيزيونىنىڭ ءبىرىنشى توبىندا 9 ۇپايمەن الدا كەلە جاتقان گرۋزيا قۇراماسى بۇگىن تۇندە لاتۆيانى تىزە بۇكتىرسە، قالعان كەزدەسۋلەردىڭ ناتيجەسىنە قاراماستان، كۇنى بۇرىن جەڭىمپاز اتانادى.

اۆتور: ەلجان ەرالى

**

اندوررا، اندوررا كنيازدىگى - ەۋروپاداعى شاعىن مەملەكەت. فرانسيا مەن يسپانيا ارالىعىندا، شىعىس پيرەنەي اۋماعىندا ورنالاسقان. جەر كولەمى 465 км²، حالقى - 78,1 مىڭ.