ارمەنيا ۇكىمەتى وتستاۆكاعا كەتتى

ەرەۆان. قازاقپارات - ارمەنيا پرەمەر-ءمينيسترى نيكول پاشينيان وتستاۆكاعا ءوتىنىش بەرگەن. پاشينيان بۇل تۋرالى ارميان قوعامدىق تەلەۆيدەنيەسىنىڭ ەفيرىندە ايتتى، دەپ حابارلايدى «قازاقپارات» ح ا ا- نىڭ مەنشىكتى ءتىلشىسى.

ارمەنپرەسستىڭ حابارلاۋىنشا، كەشە كەشكە ارمەنيا پرەزيدەنتى ارمەن ساركيسيان ۇكىمەتتىڭ وتستاۆكاسىن قابىلدادى.

پرەمەر-مينيستر ن. پاشينيان وتستاۆكاعا كەتۋ نيەتىن بۇرىن France24-كە بەرگەن سۇحباتىندا دا ايتقان بولاتىن. سۇحباتتا ول ۇستىمىزدەگى جىلدىڭ 10- جەلتوقسانىندا مەرزىمىنەن بۇرىن پارلامەنتتىك سايلاۋ وتكىزۋ ماقساتىندا ەل پارلامەنتىن تاراتۋ باستاماسىن كوتەرۋ ءۇشىن 15- قازاندا وتستاۆكاعا كەتەتىنىن ايتقان.

ايتا كەتسەك، ارمەنيا پارلامەنتىنىڭ دەپۋتاتتارى 2018-جىلعى 8- مامىر كۇنى وتىرىستا وپپوزيتسيا كوشباسشىسى نيكول پاشينياندى ەلدىڭ پرەمەر-ءمينيسترى قىزمەتىنە سايلاعان.

قولدانىستاعى زاڭناماعا سايكەس، پرەمەر-مينيستر وتستاۆكاسىنان كەيىن ارمەنيا پرەزيدەنتى ۇكىمەتتىڭ وتستاۆكاسىن قابىلدايدى. كەيىن جەتى كۇننىڭ ىشىندە پارلامەنت فراكسيالارى پرەمەر-مينيستر لاۋازىمىنا كانديداتتاردى ۇسىنادى. پرەمەر-مينيستر پارلامەنت وتىرىسىندا دەپۋتاتتاردىڭ داۋسى ارقىلى سايلانادى. ەگەر داۋىس بەرۋ كەزىندە پرەمەر-مينيستر سايلانباسا، جەتى كۇننەن كەيىن جاڭا سايلاۋ وتكىزىلەدى. وعان دەپۋتاتتاردىڭ جالپى سانىنىڭ ۇشتەن ءبىرى ۇسىنعان كانديداتتار قاتىسادى. ەڭ كوپ داۋىس جيناعان كانديدات جەڭىمپاز بولادى.

ەگەر پرەمەر-مينيستر ەكىنشى رەت وتكىزىلگەن سايلاۋدا دا سايلانباسا، ارمەنيا ۇلتتىق جيىنى (پارلامەنت) تاراتىلىپ، كەزەكتەن تىس پارلامەنت سايلاۋى وتەدى.

ارمەنيادا كەزەكتەن تىس پارلامەنت سايلاۋى بيىلعى جەلتوقساندا-اق ءوتۋى مۇمكىن.

ەسكە سالا كەتەيىك، ارمەنيادا وسى جىلدىڭ 13- مامىرىندا جاڭا ۇكىمەت جاساقتالعان ەدى.