تۇركىستان وبلىسىندا سەناتورلار ەلباسى جولداۋىن ءتۇسىندىردى

شىمكەنت. قازاقپارات - تۇركىستان وبلىسىنا ارنايى ءىس-ساپارمەن ق ر پارلامەنتى سەناتىنىڭ دەپۋتاتتارى اسقار بەيسەنبايەۆ پەن ءالي بەكتايەۆ كەلىپ، تۇلكىباس پەن سايرام اۋداندارىنىڭ تۇرعىندارىمەن كەزدەستى، دەپ حابارلايدى قازاقپارات ءتىلشىسى.

ەلباسى جولداۋىن ءتۇسىندىرۋ جانە ناسيحاتتاۋ ماقساتىندا كەلگەن سەناتورلار الدىمەن تۇلكىباس اۋدانى اكتيۆىمەن جانە تۇرعىندارمەن كەزدەستى. جيىن بارىسىندا سەناتورلار ەلباسى ن. نازاربايەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىنىڭ باسىم باعىتتارىنا جەكە-جەكە توقتالىپ، ماڭىزدىلىعىن ءتۇسىندىردى. ءوز كەزەگىندە اۋدان اكىمى نۇربول تۇراشبەكوۆ سەناتورلاردى حالىقتىڭ تىنىس-تىرشىلىگىمەن تانىستىرىپ، ەل جاعدايىن جاقسارتۋ باعىتىندا جۇمىستار جالعاساتىنىن ايتتى.

ال، سايرام اۋدانىندا وتكەن جيىندا ق ر پارلامەنتى سەناتىنىڭ دەپۋتاتى ءالي بەكتايەۆ بيىلعى جولداۋدىڭ حالىقتىڭ ءال-اۋقاتىن ارتتىرۋعا باعىتتالعانىن مالىمدەپ، «بيزنەستىڭ جول كارتاسى -2020» باعدارلاماسىنىڭ نە سەبەپتەن تاعى دا 5 جىلعا ۇزارتىلعانىن ءتۇسىندىرىپ ءوتتى. ونىڭ ايتۋىنشا، اتالعان باعدارلاما ءوزىنىڭ ومىرشەڭدىگىن دالەلدەگەن. ياعني، باعدارلامانىڭ ارقاسىندا ەلىمىزدە تالاي كاسىپكەر نەسيە العان. ناتيجەسىندە كوپتەگەن كاسىپكەرلىك سۋبەكتىلەرى ىسكە قوسىلىپ، مىڭداعان جۇمىس ورىندارى اشىلعان.

ايتا كەتەيىك، الداعى ۋاقىتتا ق ر پارلامەنتى سەناتىنىڭ دەپۋتاتتارى باستاعان توپ جولداۋدى ناسيحاتتاۋ ماقساتىندا تولەبي، ورداباسى، قازعۇرت پەن وتىرار اۋداندارىنىڭ تۇرعىندارىمەن كەزدەسەدى دەپ كۇتىلۋدە.