تۇركيادا قازاق مادەنيەتىن ناسيحاتتايتىن قوعام قۇرىلدى

None
None
استانا. قازاقپارات - انكارا قالاسىندا «كوك تۋ» قازاق مادەنيەتى قوعامىنىڭ رەسمي تانىستىرىلىمى ءوتتى، دەپ حابارلايدى قازاقپارات ترت اقپاراتتىق پورتالىنا سىلتەمە جاساپ.

جاڭا قوعام وكىلدەرى باۋىرلاس تۇرىك ەلىندە قازاقتىڭ ۇلتتىق مادەنيەتى مەن ءداستۇرىن ناسيحاتتاپ، قىزىعۋشىلىق تانىتقاندارعا قازاق ءتىلىن، دومبىراسىن جانە قازاق قولونەرىن ۇيرەتپەك.

سالتاناتتى جيىنعا قازاقستاننىڭ تۇركيا رەسپۋبليكاسىنداعى وكىلەتتى جانە توتەنشە ەلشىسى ابزال ساپاربەك ۇلى قاتىستى. ول جاڭا قۇرىلعان قوعامنىڭ ىستەرىن جوعارى باعالادى جانە ونىڭ قازاق- تۇرىك قارىم- قاتىناستارىنا تىڭ سەرپىن بەرىپ، العا قاراي جەتىلدىرەتىنىنە، مادەنيەت، ونەر جانە گۋمانيتارلىق سالادا وراسان زور ۇلەس قوساتىنىنا سەنىم ءبىلدىردى.

«مۇنداي قوعام تۇركياداعى قازاق قاۋىمى ءۇشىن وتە قاجەت ەدى. تۇركياعا قازاقستاننان كەلگەن قازاقتار اراسىندا مۇنداي قوعام بولماعان. ياعني، قىتاي اسىپ، تۇركياعا جەتكەن قازاقتاردىڭ ءتۇرلى قورلارى، بىرلەستىكتەرى بار. ال تاۋەلسىزدىك العان ساتتەن كەيىن، قازاقستاننان كەلگەن قانداستاردىڭ باسىن بىرىكتىرەتىن ۇيىمدار قۇرىلماعان»، - دەدى قوعامنىڭ قۇرىلتايشى مۇشەسى تورعىن سۇلتان قىزى قازاقپارات تىلشىسىنە بەرگەن سۇحباتىندا.

ونىڭ ايتۋىنشا، «كوك تۋ» قازاق مادەنيەتى قوعامى 2018 -جىلدىڭ ناۋرىز ايىندا قۇرىلعان.

«تۇركيادا ءبىلىم الىپ، وسىندا قىزمەتكە تۇرىپ، ەڭبەك ەتىپ جۇرگەن قازاقتاردىڭ باسىن قوساتىن مادەني قوعام كەرەك دەپ وي ءبولىسىپ ءجۇر ەدىك. بيىل ناۋرىز ايىندا ويىمىز ىسكە استى جانە انكارادا ناۋرىز مەيرامىن تويلادىق. دارىندى جاس سۋرەتشى كارىم بايعۇتوۆتىڭ سۋرەت كورمەسىن اشتىق»، - دەپ ءوز ءسوزىن جالعادى ت. سۇلتان قىزى.

سونىمەن بىرگە، تورعىن سۇلتان قىزى قوعام مۇشەلىگىنە قازاقتار عانا ەمەس، قازاقستاندى، قازاق مادەنيەتىن جاقسى كورەتىن تۇرىكتەردىڭ دە مۇشە بولا الاتىنىن جەتكىزدى.

«باستاپقىدا 7 ادام بولىپ قۇرعان قوعامىمىز قازىر تاعى 20 ادامعا جەتتى. ولاردىڭ اراسىندا ءار ءتۇرلى مەكەمەلەرىندە جۇمىس ىستەيتىن قازاق ماماندار، ستۋدەنتتەر جانە تۇركيا ازاماتتارى دا بار. ءبىزدىڭ قوعامىمىزدىڭ ماقساتى - قازاق مادەنيەتىن تۇركيادا جاڭعىرتۋ، قازاقتىڭ ۇلتتىق مادەنيەتىن، ءداستۇرىن، عۇرپىن تانىستىرۋ، ناسيحاتتاۋ، بولاشاق ۇرپاققا جەتكىزۋ. العا قويعان جوسپارىمىز كوپ. كونتسەرتتەر مەن كورمەلەردەن بولەك، قازاق ءتىلى، دومبىرا، قازاق قولونەرى سىندى ۇيىرمەلەر اشۋدى كوزدەپ وتىرمىز»، - دەيدى تورعىن سۇلتان قىزى.

سوڭعى جاڭالىقتار