ەلباسى فين بيزنەس كاپيتاندارىمەن نە ءۇشىن كەزدەستى

حەلسينكي. قازاقپارات - فينليانديا قازاقستاننىڭ سولتۇستىك ەۋروپاداعى ماڭىزدى ساۋدا- ەكونوميكالىق سەرىكتەستەرىنىڭ ءبىرى.

بۇل تۋرالى بۇگىن فينلياديانىڭ بيزنەس كاپيتاندارىمەن كەزدەسۋ بارىسىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.

«فينليانديا رەسپۋبليكاسى قازاقستاننىڭ سولتۇستىك ەۋروپاداعى ماڭىزدى ساۋدا- ەكونوميكالىق سەرىكتەستەرىنىڭ ءبىرى سانالادى. ەلدەرىمىز اراسىنداعى قارىم- قاتىناس دوستىق پەن ءوزارا سەنىمگە نەگىزدەلگەن. تاۋەلسىزدىك جىلدارى ىشىندە فينليانديا قازاقستانعا 300 ميلليون دوللاردان استام ينۆەستيسيا سالدى. ەلدەرىمىز اراسىنداعى تاۋار اينالىمى 2017 -جىلى 300 ميلليون دوللاردى قۇرادى»، - دەپ اتاپ ءوتتى كەزدەسۋ بارىسىندا قازاقستان پرەزيدەنتى.

مەملەكەت باسشىسىنىڭ دەرەگىنشە، قازاقستاندا فين كاپيتالى سالىنعان 100-گە جۋىق كومپانيا جۇمىس ىستەيدى. ولار نەگىزىنەن ەنەرگەتيكا، كولىك، تەلەكوممۋنيكاتسيا، وڭدەۋ ونەركاسىبى، اۋىل شارۋاشىلىعى سىندى سالالاردى قامتيدى.

«بۇگىنگى كەزدەسۋدىڭ ماقساتى - ەكونوميكالىق بايلانىستاردى جانداندىرىپ، جاڭا ىسكەرلىك سەرىكتەستەردى ىزدەۋ. قازاقستان كەدەن شەكاراسى جوق، 180 ميلليوننان استام ادام تۇراتىن ەۋرازيالىق ەكونوميكالىق وداققا مۇشە. ءبىز الدىمىزعا الەمنىڭ دامىعان 30 ەلىنىڭ قاتارىنا كىرۋ ءورشىل مىندەتىن قويىپ وتىرمىز. قازاقستان بۇگىندە - جاڭا مۇمكىنشىلىكتەر جانە ءتيىمدى بيزنەس جۇرگىزۋ ءۇشىن ۇلكەن الەۋەت»، - دەدى نۇرسۇلتان نازاربايەۆ.

ەستەرىڭىزگە سالا كەتسەك، بۇگىن قازاقستان پرەزيدەنتى نۇرسۇلتان نازاربايەۆ رەسمي ساپارمەن فينلياندياعا كەلدى.

ساپار اياسىندا نۇرسۇلتان نازاربايەۆتىڭ فينليانديا رەسپۋبليكاسىنىڭ پرەزيدەنتى ساۋلي نيينيستيەمەن شاعىن جانە كەڭەيتىلگەن قۇرامداعى كەزدەسۋى جوسپارلانىپ وتىر.