نۇرسۇلتان نازاربايەۆ نوكيا كومپانياسىنىڭ باسشىسىمەن كەزدەستى
مەملەكەت باسشىسى 2007 -جىلدان باستاپ «نوكيا» قازاقستانمەن جۇمىس ىستەپ كەلە جاتقانىن اتاپ ءوتتى. سونىمەن قاتار بۇگىندە بۇل كومپانيا اكتيۆىنىڭ 23 ميلليارد دوللارعا دەيىن كوتەرىلگەندىگىن اتاپ وتكەن ەلباسى ريستو سييلاسماادان قازاقستانمەن ىنتىماقتاستىقتا قانداي جوسپارى بار ەكەنىن سۇرادى.
«پرەزيدەنت مىرزا، فينلياندياعا قوش كەلدىڭىز. ءسىز نوكيانى الەمدە ەڭ تانىمال دەپ اتادىڭىز. دەگەنمەن، سىزدە الەمدە وتە تانىمال ءارى تەحنولوگيالار قۇندىلىعىن جەتە تۇسىنەتىن ەلەۋلى مەملەكەت باسشىلارىنىڭ ءبىرىسىز. ءسىزدى سيفرلىق تەحنولوگيالارعا ءجىتى نازار اۋداراتىندىعىڭىزدى وتە جاقسى بىلەمىن» ، - دەدى ءوز كەزەگىندە ريستو سييلاسماا.
نۇرسۇلتان نازاربايەۆ ەلىمىزدە «سيفرلىق قازاقستان» باعدارلاماسى جان- جاقتى قولعا الىنىپ، ءىرى كاسىپورىنداردا، الەۋمەتتىك نىسانداردا ەنگىزىلىپ جاتقانىن، وسى ورايدا «نوكيا» كومپانياسىمەن ىنتىماقتاستىقتىڭ ءتيىمدى تۇستارى كوپ ەكەنىن اتاپ ءوتتى.
«نوكيا» باسشىسى قازاقستاننىڭ «سيفرلىق قازاقستان» باعدارلاماسىن تىڭعىلىقتى زەردەلەگەندىكتەرىن جانە ىنتىماقتاستىققا دايىن ەكەندىگىن جەتكىزدى.
«ويتكەنى، بۇل نوكيانىڭ باستى ماقساتى سانالادى. ءبىز قوسالقى بولشەكتەردەن باستاپ ناقتى ونىمگە دەيىنگى تولىق سيكلدى وندىرەمىز. بۇگىندە الەمدە مۇنداي تولىق سيكلدى جولعا قويعانىمەن ەكى- اق كومپانيا ماقتانا الادى. ونىڭ ءبىرى قىتايدىڭ «حۋاۆەي» كومپانياسى جانە «نوكيا» . پرەزيدەنت مىرزا، ءبىزدىڭ جاڭا جوسپارىمىز جايىندا سۇراعان ەدىڭىز، ول 5G جەلىسىمەن تىكەلەي بايلانىستى» ، - دەدى فين كومپانياسىنىڭ باسشىسى.
ەستەرىڭىزگە سالا كەتسەك، بۇگىن قازاقستان پرەزيدەنتى نۇرسۇلتان نازاربايەۆ رەسمي ساپارمەن فينلياندياعا كەلدى.
ساپار اياسىندا نۇرسۇلتان نازاربايەۆتىڭ فينليانديا رەسپۋبليكاسىنىڭ پرەزيدەنتى ساۋلي نيينيستە مەن شاعىن جانە كەڭەيتىلگەن قۇرامداعى كەزدەسۋى، سونداي- اق فينليانديانىڭ ىسكەر توپتار وكىلدەرىنىڭ فورۋمىنا قاتىسۋى جوسپارلانىپ وتىر.
ايتا كەتەيىك، Nokia Corporation ۇيالى تەلەفوندار، ۇيالى تەلەفوندار مەن پلانشەتتەرگە ارنالعان باعدارلامالار، سونىمەن قاتار كەڭ جولاقتى جانە ءىرى- جەلىلەر ءۇشىن تەلەكوممۋنيكاتسيالىق جابدىقتار شىعارۋمەن اينالىساتىن فيننىڭ ترانسۇلتتىق كومپانياسى سانالادى. 1998 -جىلى «نوكيا» ۇيالى تەلەفوندار سالاسىندا الەمدىك كوشباسى رەتىندە تانىلدى.
ايتا كەتەرلىگى، 1996 -جىلدان 2001 -جىلعا دەيىنگى ارالىقتا كومپانيانىڭ قارجىلىق اينالىمى 6,5 ميلليارد ەۋرودان 31 ميلليارد ەۋروعا دەيىن ارتتى. 2011-2012 -جىلدارى كومپانيانىڭ ۇيالى تەلەفونداردىڭ جاھاندىق نارىعىنداعى ۇلەسى شامامەن 30 پايىزدى قۇرادى. بۇگىندە «نوكيا» عىلىمي- زەرتتەۋ جۇمىستارىنا دەن قويىپ وتىر. ونىڭ زەرتتەۋ ورتالىقتارى الەمنىڭ 16 ەلىندە ورنالاسقان. بۇگىندە قىزمەتكەرلەرىنىڭ سانى 100 مىڭنان اسىپ جىعىلادى.