قازاقستان مەن فينليانديا تيىمدىلىگى جوعارى جوبالاردى بىرلەسىپ اتقارماق
قۇجات قازاقستان پرەزيدەنتى نۇرسۇلتان نازاربايەۆتىڭ فينلياندياعا رەسمي ساپارىاياسىندا راسىمدەلدى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.
ەكى ەلدىڭ ماشينا جاساۋ سالاسىنداعى ىسكەرلىك ىنتىماقتاستىعىن نىعايتۋ جانە قاتىناستاردى كەڭەيتۋگە باعىتتالعان قۇجاتقا قازاقستاننىڭ ماشينا جاساۋشىلار وداعىنىڭ باسقارما ءتوراعاسى، ءماجىلىس دەپۋتاتى مەيرام پىشەمبايەۆ پەن فين سالالىق تەحنولوگيالار فەدەراتسياسىنىڭ باسقارما ءتوراعاسى، «نوكيا» كومپانياسى ديرەكتورلار كەڭەسىنىڭ ءتوراعاسى ريستو سييلاسماا قول قويدى.
«كەلىسىم ەلدەرىمىز اراسىنداعى بيزنەس جوبالاردى دامىتۋعا تىڭ سەرپىن بەرىپ، قازاقستاندىق كاسىپكەرلەر ءۇشىن فين بيزنەسمەندەرىمەن «ءبىر تەرەزە» ارقىلى بايلانىس ورناتۋعا مۇمكىنشىلىك اشادى. ءبىز ءۇشىن مۇناي- گاز، تاۋ- كەن، ماشينا جاساۋ، اۋىل شارۋاشىلىعى سىندى سالالارداعى يمپورت تاۋارلاردى الماستىرۋعا مۇمكىندىك بەرەتىن فين جوبالارىن الۋ بارىنشا پايدا اكەلەدى. فين كاسىپورىندارى شىعاراتىن ونىمدەر نەگىزىنەن ەكسپورتقا باعىتتالعان. ءبىز دە يمپورتقا تاۋەلدىلىكتەن ارىلۋعا مۇمكىندىك بەرەتىن جوبالاردى جۇزەگە اسىرۋعا دەن قويىپ وتىرمىز. سوندىقتان بۇل كەلىسىمنىڭ ەلىمىز ءۇشىن ماڭىزدى بولارى ءسوزسىز» ، - دەدى مەيرام پىشەمبايەۆ.
ايتا كەتەيىك، مەموراندۋم بيزنەستىڭ جاڭا ۇزاق مەرزىمدى ءوزارا ءتيىمدى سەرىكتەستىك قاتىناستاردى ورناتۋعا، سونىمەن قاتار فينليانديا جانە قازاقستاننىڭ ماشينا جاساۋ جانە ارالاس ونەركاسىپ سالاسىنداعى كاسىپورىندار مەن كاسىپكەرلەرمەن بىرىگىپ جۇزەگە اسىرىلاتىن تيىمدىلىگى جوعارى يننوۆاتسيالىق جوبالاردى ىسكە اسىرۋعا جاعداي جاسايتىن بولادى.