نۇرسۇلتان نازاربايەۆ فينلياندياعا كەلدى

 حەلسينكي. قازاقپارات - بۇگىن قازاقستان پرەزيدەنتى نۇرسۇلتان نازاربايەۆ رەسمي ساپارمەن فينلياندياعا كەلدى، دەپ حابارلايدى قازاقپاراتتىڭ ارناۋلى ءتىلشىسى حەلسينكيدەن.

بۇعان دەيىن حابارلاعانىمىزداي، ساپار اياسىندا نۇرسۇلتان نازاربايەۆتىڭ فينليانديا رەسپۋبليكاسىنىڭ پرەزيدەنتى ساۋلي نيينيستەمەن شاعىن جانە كەڭەيتىلگەن قۇرامداعى كەزدەسۋى، سونداي- اق فينليانديانىڭ ىسكەر توپتار وكىلدەرىنىڭ فورۋمىنا قاتىسۋى جوسپارلانىپ وتىر.

 ايتا كەتەيىك، مەملەكەت باسشىسى بۇعان دەيىن 2009 -جىلدىڭ ناۋرىزىندا فينلياندياعا مەملەكەتتىك ساپار جاساعان بولاتىن. مۇنان بولەك ەلباسى فين باسشىسىمەن پەتەربور حالىقارالىق فورۋمى، ب ۇ ۇ باس اسساملەياسىنىڭ 66 - سەسسياسى جانە سەۋل، گااگا، ۆاشينگتوندا وتكەن يادرولىق قاۋىپسىزدىك جونىندەگى سامميتتەر الاڭىندا كەزدەسكەن ەدى. فينليانديا پرەزيدەنتتەرى قازاقستاندا بەس مارتە بولدى. سوڭعى رەت اتالعان ەلدىڭ قازىرگى پرەزيدەنتى س. نيينيستە 2017 -جىلدىڭ ماۋسىمىندا ەلورداعا جۇمىس ساپارىمەن كەلىپ، «ەكسپو-2017» كورمەسىندەگى فينليانديانىڭ ۇلتتىق كۇنى شاراسىنا قاتىسقان ەدى.

 قازاقستان مەن فينليانديا اراسىنداعى سىرتقى تاۋار اينالىمى وتكەن جىلى 307,9 ميلليون دوللاردى قۇراپ، ءبىر جىل بۇرىنعى كورسەتكىشتەن 9,9 پايىز ءوسىم كورسەتكەن ەدى. ال وسى جىلدىڭ قاڭتار- شىلدە اراسىنداعى تاۋار اينالىمى 160 ميلليون دوللاردى قۇرادى. سوڭعى 13 -جىلدا فينليانديا قازاقستانعا 334 ميلليون دوللار تىكەلەي ينۆەستيتسيا سالدى. بۇگىندە ەلىمىزدە فين كاپيتالىنىڭ قاتىسۋمەن ەلۋدەن استام كاسىپورىن جۇمىس ىستەپ تۇر. قازاقستان- فين ساۋدا- ەكونوميكالىق ىنتىماقتاستىعى حيميا، جەڭىل ونەركاسىپ، تاۋ- كەن مەتاللۋرگيا كەشەنى، ماشينا جاساۋ، قۇرىلىس ماتەريالدارى، جوعارى تەحنولوگيالى بوياۋلار سىندى سالالاردا جولعا قويىلعان.