جاساندى سۇلۋلىق جان ازابىنا اينالماسىن
ادەمى بولامىن دەپ اجال قۇشقانداردىڭ دا مىسالى از با؟ الايدا وسىنىڭ بارىنە قاراماستان، مەديتسينانىڭ ىشىندە ەندى پلاستيكالىق حيرۋرگيا ۇلكەن يندۋسترياعا اينالعانىنا ەشكىم داۋ ايتا الماس. ءتۇپتىڭ تۇبىندە ونىڭ وتەۋى قانداي بولاتىنىنا ادام دەر كەزىندە ەسەپ بەرە بەرمەيدى. قۇدايىم- اۋ، جاراتقان يەمىز دە قۇران كارىمدە: «ادام بالاسىن ەڭ كوركەم مۇسىندە جاراتتىم» ، دەيدى. راسىندا، ءبىزدىڭ ءتۇر- تۇلعامىز بەن تىك ءجۇرۋىمىز جەر بەتىندەگى وزگە تىرشىلىك يەلەرىنە قاراعاندا سىمباتتى ەكەنى ايدان انىق. تاڭىردەن اسقان سۋرەتشى جوق بولسا دا، جاساندى سۇلۋلىققا دەگەن تالاس ەندى تولاستامايدى. سونىمەن قازىرگى تاڭدا قازاقستاندا ەڭ كوپ تارالعان پلاستيكالىق وتا تۇرلەرى - بلەفاروپلاستيكا، ەكىنشى ورىندا - ومىراۋ ۇلكەيتۋ تۇر. ءۇشىنشى، ءتورتىنشى ورىندارعا smas-ليفتينگ پەن ليپوساكتسيا تالاسادى. دەمەك ايەلدەردىڭ تالعامى وزگەرە باستادى. ءبىراز جىل بۇرىن عانا قىز- كەلىنشەكتەر ءبىرىنشى كەزەكتە مامموپلاستيكانى كوبىرەك تاڭداپ كەلگەن. ال بوكسە ۇلكەيتۋ - گليۋتەوپلاستيكاعا بىزدىكىلەر قازىر كوپ جۇگىنە بەرمەيتىن كورىنەدى. ەسەسىنە ەۋروپالىق پىشىنمەن قاباق كەستىرۋگە اۋەستەر كوبەيدى. وسىدان بىرنەشە جىل بۇرىن عانا الەمدە جىلىنا 18 ميلليونعا دەيىن پلاستيكالىق وپەراتسيا، ونىڭ ىشىندە 10 ميلليوننان استامى حيرۋرگيالىق جولمەن جاسالىناتىنى جاريالانعان- دى.
ەگەر قىز- كەلىنشەكتەردىڭ كوپشىلىگى ءارى جاس ءارى ادەمى كورىنۋدىڭ جولىندا پىشاققا تۇسكەنىن بارىنشا جاسىرىپ باعاتىندىعىن ەسكەرسەك، بۇل كورسەتكىشكە اسا سەنە بەرۋگە بولماس. سول سياقتى پلاستيكالىق حيرۋرگتىڭ قىزمەتىنە جۇگىنگەن الەمگە تانىمال ونەر جۇلدىزدارى مەن الەۋمەتتىك جەلىنىڭ سۇلۋلارى بۇل ءىستىڭ بازارىن جۇرگىزىپ تۇر. ەسەسىنە وسى وپەراتسيانىڭ كەسىرىنەن سيقى قاشقان تانىمال تۇلعالاردىڭ رەيتينگى ەشكىمدى قورقىتپايدى. سۇلۋلىق - قۇرباندىقتى قالايدى دەيتىن قايتپاس قاعيداتتىڭ سالدارى ءالى ادەمىلىك قۋعانداردى شوشىتىپ وتىرعان جوق. پلاستيكالىق حيرۋرگتەر بەت مۇشەلەرى بولەك- بولەك قارتايمايتىندىقتان، كەشەندى تۇردە ونى پىشاقپەن كەسىپ- پىشەدى. ولار ۇلكەن تاۋەكەلگە بارا وتىرىپ، ناتيجەسى ءۇشىن تۇپكىلىكتى كەپىلدىكتى ەشقاشان بەرگەن ەمەس. ال تابيعاتتىڭ ءبىر- بىرىمەن ءمىنسىز جالعاستىرىپ تۇرعان تىندەرى مەن جاسۋشالارىن، كوزگە كورىنبەس قان تامىرلارى مەن جۇيكە تالشىقتارىن قيۋ - دەنساۋلىققا زيانىن ءبارىبىر تيگىزبەي قويمايتىنىن مەديتسينالىق ءبىلىمى جوق ادام دا ىشكى تۇيسىكپەن سەزەدى.. . الايدا وسىنىڭ بىرىنە قاراماستان، جاساندى سۇلۋلىق سالتانات قۇرىپ تۇر.
- قازىرگى ءۇردىس پەن تاجىريبە بىزگە قازاق قىزدارىنىڭ ەۋروپالىقتارعا ەلىكتەيتىنىن كورسەتەدى. كورەياداعى سياقتى بىزگە جاستارىمىز جۇلدىزداردىڭ نەشە ءتۇرلى سۋرەتتەرىن الىپ كەلەدى. ولاردىڭ اراسىندا Instagram پاراقشالاردان الىنعان بيكەشتەر، ياكي مودەلدەر دە بار. بۇلاردىڭ ءبارى كلاسسيكالىق ەۋروپالىق قاس- قاباق، باقىرايعان كوز، جابىسقان جاق، تومپاق، دۇرديگەن ەرىن، سوپاق بەت بولىپ كەلەدى. مۇنداي جاعدايدا ءبىز كليەنتتەرگە اسا قاجەتتىلىك بولماسا، قۇدايدىڭ بەرگەن كەلبەتىنەن باس تارتپاۋعا كەڭەس بەرىپ باعامىز. ءبىراق دەگەنىنەن قايتپايتىندار ءبارىبىر حيرۋرگ پىشاعىنان قورىقپايدى. ماسەلەن، ليپوساكتسيانى الايىق، بۇل وپەراتسيا - ارتىق مايلاردى ازايتقانىمەن، ءبارىبىر ارىقتادىڭ دەگەندى بىلدىرمەيدى. ليپوساكتسيادان ارىقتاعان ايەلدى مەن ءالى كەزدەستىرگەن جوقپىن، - دەيدى قازاقستاندىق پلاستيكالىق حيرۋرگ الەكسەي كۋيموۆ.
نە دەسەك تە، حالقىمىزدىڭ سۇلۋلىقتى «ويماق اۋىز» ، «كۇلىم كوز» دەپ سۋرەتتەگەن قالىبىنان شىقپاعاندا ساقتاي الاتىنىمىز ايدان انىق. ايتپەسە قازىر جاستارىمىز جەكەمەنشىك سۇلۋلىق سالوندارىن اشىپ، ءوز بەتىنشە كوسمەتولوگ بولىپ جۇرگەندەر ارقىلى جاساندى كىرپىك جابىستىرۋعا اسا ءۇيىر. بۇل تۋرالى دا تاجىريبەلى كوسمەتولوگ گۇلشاش اۋباكىر قىزى:
«جەلىمنىڭ حيميالىق قۇرامى وتە جوعارى، كوزگە تيگىزەتىن زيانى دا كوپ، جەلىممەن جالعانعان كىرپىكتەردەن كەيىن ادامنىڭ ءوز كىرپىكتەرى ساۋدىراپ ءتۇسىپ قالادى. كوسمەتولوگيالىق جەلىم دەگەن جەلىم بولمايدى. مەن كىرپىك جالعاتۋعا كەلگەن ادامعا جاساتپاۋعا كەڭەس بەرەمىن. ارينە ءبىر اپتاعا دەيىن ادەمىسى ادەمى، ال ودان كەيىنگى زيانى قانشاما؟ ! قازىر كوسمەتولوگيا دامىعان. جاساندى كىرپىك جابىستىرماي- اق، كىرپىكتى تىتىركەندىرۋ ارقىلى دارۋمەندەرمەن قورەكتەندىرىپ، وسىرۋگە بولادى. وسى سالادا ءجۇرىپ، مامان رەتىندە مەن دە ءبىراز وي ءتۇيدىم. قازىر قىز- كەلىنشەكتەر سۇلۋ كورىنۋ ءۇشىن بوتوكس سياقتى ادىستەرمەن بەتىنىڭ جانىن كەتىرىپ، قاباعىن كەسكىزىپ، بارىنە بارادى. ءتىپتى ساپاسىز پلاستيكالىق وپەراتسيالاردان ءولىپ كەتىپ جاتقاندار دا بار. مىنە، وسىنىڭ ءبارى اقشا تابۋدىڭ كەسىرىنەن بولىپ جاتىر. قانشاما ايەل ءوزىنىڭ تابيعي تۇرىنەن ايىرىلىپ، ايناعا قاراۋعا جۇرەگى داۋالامايتىن جاعدايلار ورىن الۋدا. ادامنىڭ دەنساۋلىعى مەن كەلبەتىنە قاتىستى كاسىپپەن اينالىساتىندار ءبىرىنشى كەزەككە ادالدىقتى، ساپانى قويۋ كەرەك. قاۋىپسىز بولۋىنا جاۋاپتى بولۋى ءتيىس» ، دەيدى.
- ال دوربا اۋىزدارعا كەلسەك، قازاقتىڭ قيعاش قاس، الما مويىن، ويماق اۋىز دەپ اسپەتتەگەن سۇلۋلارعا ارنالعان تەڭەۋى بىزدەن الىستاپ بارادى. قازىر ەرەسەك ايەلدەردىڭ ءوزى ەرنىنە گەل قۇيعىزىپ، اۋزىن ءدۇرديتىپ الاتىنى اسا ەرسى كورىنسە دە كوپ. بىرىنشىدەن، بۇل تابيعي ەمەس ەكەندىگى بىردەن كوزگە ءتۇسىپ تۇرادى، ەكىنشىدەن، دۇرىس سويلەي الماي، جانسىزدانعان ەرنىمەن تاماقتى دا دۇرىس ىشە المايدى. ءبىزدىڭ قازاق تابيعي كورىكتى باعالاعان. ەڭ سوراقىسى سالپيعان ەرىندەر كەيدە ءىسىنىپ، قابىنىپ، ىرىڭدەپ، سوڭى جاقسى بولماي جاتادى. مۇنىڭ ارتى نەمەن اياقتالاتىنىن ايتپاسا دا تۇسىنىكتى. بۇگىنگى تاڭدا ەرىندى ادەمى تومپيعان، بالعىن ەتىپ كورسەتۋدىڭ ءتۇرلى ادىستەرى مەن يننوۆاتسيالىق زەرتتەۋ جولدارىمەن جاسالعان ەرىن دالاپتارى ءقازىر كوپتەپ تابىلادى، - دەيدى «Gulshash_spa_salon» ديرەكتورى گۇلشاش اۋباكىر قىزى.
ارينە، ايەل بالاسىنىڭ ادەمىلىككە دەگەن قۇشتارلىعىندا تۇرعان ەش وعاشتىق جوق. ءبىراق ەرتەڭدى ويلاساق، دەنساۋلىقتى، ۇرپاقتى ويلاساق، پلاستيكالىق حيرۋرگكە باراردا ون رەت ويلانىپ، قىرىق رەت تولعانعان ءجون- اۋ.
ايناش ەسالي، «ەگەمەن قازاقستان» الماتى