الماتىدا وقۋشىلارعا شاكارىمنىڭ مۇراسى تانىستىرىلدى

الماتى. قازاقپارات - الماتىلىق وقۋشىلار شاكارىم ولەڭدەرىنەن ءبىلىم دەڭگەيىن پاش ەتتى، دەپ حابارلايدى قازاقپارات ءتىلشىسى.

بۇگىن الماتىدا ي. كرىلوۆ اتىنداعى قالالىق ورتالىق كىتاپحاناسىندا بەلگىلى قازاق اقىنى، فيلوسوف، ويشىل كومپوزيتور شاكارىم قۇدايبەردى ۇلىنىڭ 160 جىلدىعىنا ارنالعان مەرەكەلىك ءىس شارا وتكەن بولاتىن.

جيىن «ءبىر ەل - ءبىر كىتاپ» جانە جالپىۇلتتىق «رۋحاني جاڭعىرۋ» باعدارلاماسى اياسىندا ۇيىمداستىرىلدى.

جيىن بارىسىندا مۋزىكا، ونەر، ادەبيەت وكىلدەرى، كىتاپحاناشىلار بايانداما وقىپ، جاس كاسىبي ارتىستەردىڭ تەاترلاندىرىلعان قويىلىم قويدى.

جاستارعا شاكارىمنىڭ سيرەك كەزدەسەتىن تاريحي سۋرەتتەرى كورسەتىلدى.

    

«2006 -جىلدان باستاپ «ءبىر ەل - ءبىر كىتاپ» دەگەن اكتسيا باستالدى. ءبىز سول اكتسيانى اباي تانۋدان باستادىق. بۇگىن شاكارىم تانۋدى ءىس شارامەن اتاپ وتتىك. ونداعى ماقساتىمىز - جاستار وتكەنىن ۇمىتپاسىن دەگەن تىلەك. سول كەزدىڭ وزىندە شاكارىم پوليگلوت، جان- جاقتى ينتەللەكتۋال بولعان. ءار قازاق جىگىتى شاكارىم سەكىلدى بولايىن، ءتىل بىلەيىن دەپ ءوزىن ءوزى دامىتسا دەگەن تىلەك. سول ءۇشىن بەلگىلى اكتەر بەكجان تۇرىستى، ءانشى ەركىن شۇكىماندى شاقىردىق»، - دەدى كىتاپحانا مەڭگەرۋشىسى دارۋ قارجاۋبايەۆا.

   

فيلولوگيا عىلىمدارىنىڭ كانديداتى، دوتسەنت، «قازقايتا جاڭارتۋ» رمك باس ديرەكتورى جاندوس اۋباكىر شاكارىم قۇدايبەردى ۇلىنىڭ مۇراسى تۋرالى كەڭىنەن ايتىپ ءوتتى.

«مەن ءوزىم شاكارىمنەن الىستاعان جوقپىن. ونىڭ مۇراسى بولاشاققا ازىق. اباي مۋزەيىندە جۇرگەندە دە، شاكارىمنىڭ ءبىر قىرىن اشۋعا تىرىساتىنبىز. قۇندى دەرەكتەردى ىزدەۋمەن بولدىق. شاكارىم ورىس جازۋشىسى تولستويمەن حات الىسقان اقىن. ول حاتتار جەتە المادى. بۇل كىسىنىڭ جان جاقتىلىعى بالا كەزىنەن ونەر، بىلىمگە بەيىمدىلىگى انىق بولعان. ءوز كيىمىن ءوزى تىگىپ الاتىن بولعان. ونەرتاپقىشتىعى ءوز الدىنا گارمون، سكريپكا جاساعان. شاكارىم مۇرالارى كەڭەستىك يدەولوگيانىڭ كەسىرىنەن قانشاما ۋاقىت بويى زەرتتەلمەي قالدى. ونىڭ مۇراسىن ءالى دە زەرتتەۋ كەرەك. شاكارىم مۇراسى بولاشاقتىڭ قامى ءۇشىن جاسالعان ۇلكەن قۇندى دۇنيەلەر»، - دەدى جاندوس اۋباكىر.

 

ال ءداستۇرلى ءانشى ەركىن شۇكىمانوۆ اقىننىڭ قازاق مۋزىكاسىنا قوسقان ۇلەسىن ايتىپ ءوتتى.

«شاكارىم تەك اقىن عانا ەمەس اۋدارماشى، تاريحشى. ونىڭ قازاق مادەنيەتىنە قوسقان ۇلەسى زور. بالا كۇنىنەن باستاپ دومبىرا، قوبىز ۇيرەنگەن. سكريپكا، بايان ۇيرەنۋگە تىرىسقان. ورىستىڭ بالالايكاسىن ۇيرەنگەن. شاكارىمنىڭ ارتىندا جالپى 30 جۋىق ءانى قالدى. ءبىراق، ولاردىڭ بارلىعى تۇگەل جەتپەدى»، - دەدى ەركىن شۇكىمان.

وتىرىس سوڭىندا جاسوسپىرىمدەر شاكارىمنىڭ مۇراسىن قانشالىقتى بىلەتىندىكتەرىن كورسەتتى.