ەلباسى اقتوبەنى ودان ءارى دامىتۋعا قاتىستى ءبىرقاتار تاپسىرما بەردى

استانا. قازاقپارات - مەملەكەت باسشىسى ەنەرگيا تيىمدىلىگى ورتالىعىنا باردى، دەپ حابارلايدى اقوردانىڭ باسپا ءسوز قىزمەتى.

ەلباسى ورتالىقتىڭ جۇمىسىمەن تانىستى. ونىڭ نەگىزگى مىندەتى - بالامالى ەنەرگەتيكا تەحنولوگياسىن كورسەتۋ جانە تۇرعىن ۇيلەردى ىستىق سۋمەن، جىلۋمەن جانە ەلەكتر قۋاتىمەن قامتاماسىز ەتۋ ءۇشىن ونى پايدالانا بىلۋگە ۇيرەتۋ.

ورتالىقتىڭ عيماراتى كۇن پانەلدەرىمەن، گاز پورشەندى ستانتسيامەن، گەوتەرمالدى جۇيەمەن، سونداي-اق جەل گەنەراتورلارىمەن جابدىقتالعان. مۇندا قالا تىرشىلىگىن قامتاماسىز ەتۋ جانە تۇرعىن ءۇي-كوممۋنالدىق شارۋاشىلىق ينجەنەرلىك جەلىلەرىنە مونيتورينگ جۇرگىزۋ ورتالىعى، حالىققا قىزمەت كورسەتۋ ورتالىعى، وبلىستىق ىشكى ىستەر دەپارتامەنتىنىڭ جەدەل باسقارۋ ورتالىعى، اقتوبە قالاسىنىڭ «الماتى» اۋدانى اكىمىنىڭ اپپاراتى ورنالاسىپ، جۇمىس جۇرگىزۋدە.

نۇرسۇلتان نازاربايەۆ ەنگىزىلگەن جاڭالىقتارعا وڭ باعا بەرىپ، «ەكسپو-2017» حالىقارالىق كورمەسىندە تانىستىرىلعان «جاسىل» تەحنولوگيالاردى تاجىريبەدە قولدانۋدىڭ ماڭىزدىلىعىن اتاپ ءوتتى.

سونىمەن قاتار، اقتوبە قالاسىنىڭ اكىمى قازاقستان پرەزيدەنتىنە وبلىس ورتالىعىنىڭ دامۋ بارىسى، سونداي-اق اقتوبە اگلومەراتسياسىن، «SmartCity اقتوبە» جۇيەسىن جانە قالانىڭ قوعامدىق كەڭىستىگىن قۇرۋ جونىندە بەرىلگەن تاپسىرمالاردىڭ ورىندالۋى تۋرالى مالىمدەدى.

سوڭىندا ەلباسى اقتوبە قالاسىنىڭ ودان ءارى دامۋىنا قاتىستى ءبىرقاتار ناقتى تاپسىرما بەردى.