قوعامدا مەملەكەتتىك تىلگە دەگەن سۇرانىستى ارتتىرۋ كەرەك - دوس كوشىم

شىمكەنت. قازاقپارات - بۇگىن وڭىرلىك كوممۋنيكاتسيالار قىزمەتىندە تۇركىستان وبلىسىندا وتەتىن «قازاقستاننىڭ بولاشاعى - قازاق تىلىندە» اتتى سەمينارعا بايلانىستى باسپا ءسوز جيىنى ءوتتى. وندا قازاقستان حالقى اسسامبلەياسى عىلىمي- ساراپتاما كەڭەسىنىڭ مۇشەسى، ساياساتكەر دوس كوشىم مەملەكەتتىك ءتىلدىڭ مارتەبەسى جايىندا ءسوز قوزعادى، دەپ حابارلايدى قازاقپارات ءتىلشىسى.

 دوس كوشىمنىڭ پىكىرىنشە، مەملەكەتتىك ءتىلدىڭ مارتەبەسىن كوتەرۋ ءۇشىن قوعامنىڭ وسى ماسەلەگە كەلگەندە بەلسەندىلىگى جوعارى بولۋى ءتيىس.

«كەڭەس ۇكىمەتىنىڭ شەكپەنىنەن بوساپ شىققان ەلدەردىڭ اراسىندا مەملەكەتتىك ءتىلدىڭ مارتەبەسىن كوتەرۋ جاعىنان كەمشىن تۇستارىمىزدىڭ بارى جاسىرىن ەمەس. بۇل ولقىلىقتىڭ ورنىن تولتىرۋ ءۇشىن قوعام بولىپ اتسالىسۋ كەرەك. ياعني، مەملەكەت تاراپىنان قازاق تىلىنە جاسالىپ وتىرعان جاعدايدى دۇرىس پايدالانۋىمىز. سوڭعى كەزدەرى قوعامدا ءجيى ايتىلىپ جۇرگەن ماسەلەنىڭ ءبىرى مەملەكەتتىك ءتىلدى كوتەرۋ. الەۋمەتتىك جەلىلەردە، جيىنداردا ءتۇرلى ۇسىنىستار مەن پىكىرلەر ايتىلىپ جاتادى. ءبىراق، ءىس جۇزىنە كەلگەندە ەشكىم ونى ورىنداپ جاتقان جوق. مەنىڭ ايتقىم كەلگەنى قوعامدا مەملەكەتتىك تىلگە دەگەن سۇرانىستى ارتتىرۋ كەرەك. ازاماتتار تاراپىنان قاجەتتىلىك بولماسا، بۇل ماسەلە سول كۇيى قالا بەرمەك»، - دەدى دوس كوشىم.

سونداي- اق، جيىندا قازاق ءتىلىن لاتىن قارپىنە كوشىرۋ جايى دا ءسوز بولدى. جىلدىڭ سوڭىنا قاراي لاتىن ارىپتەرىنە ىڭعايلاستىرىلعان جاڭا ءالىپبي قابىلداناتىنىن ايتقان بريفينگكە قاتىسۋشىلار وسى ماسەلەگە دە بەيجاي قاراماۋ كەرەك ەكەنىن جەتكىزدى. عالىمدارمەن وتكەن جيىنداردا ۇسىنىستاردى ورتاعا سالىپ، بەلسەندىلىك تانىتۋ كەرەكتىگى ايتىلدى.

جيىن سوڭىندا 2018 -جىلدىڭ 15-17 - قازان كۇندەرى تۇركىستان، كەنتاۋ، ارىس، شىمكەنت قالالارىندا «قازاقستاننىڭ بولاشاعى - قازاق تىلىندە» اتتى رەسپۋبليكالىق سەميناردىڭ وتەتىندىگى بەلگىلى بولدى.

اۆتور: اينۇر اقبايەۆا