قارجى ءمينيسترى بيۋدجەت قاراجاتىن يگەرمەي وتىرعاندارعا شارا قابىلداۋدى سۇرادى

استانا. قازاقپارات - ق ر قارجى ءمينيسترى ءاليحان سمايىلوۆ بيۋدجەت قاراجاتىن يگەرمەي جاتقان مەملەكەتتىك ورگاندار مەن ۇلتتىق حولدينگتەرگە، كومپانيالارعا قاتىستى ءتيىستى شارالار قابىلداۋدى ۇسىندى، دەپ حابارلايدى قازاقپارات ءتىلشىسى.

رەسپۋبليكالىق بيۋدجەتتىڭ شىعىستارى 7 تريلليون 092 ميلليارد تەڭگەنى قۇراعان.

«1 - قىركۇيەكتەگى جاعدايمەن سالىستىرعاندا، بيۋدجەت قاراجاتىن يگەرۋ كورسەتكىشى جاقساردى. 6,5 ميلليارد تەڭگەلىك ۇنەمدەۋ سوماسىن ەسەپتەمەگەندە، 47,1 ميلليارد تەڭگە يگەرىلمەدى. بۇل 8 ايداعى كورسەتكىشتەن 33 ميلليارد تەڭگەگە از (80,1 ميلليارد تەڭگە- اۆت.)»، - دەيدى ءاليحان سمايىلوۆ.

مينيستر بايانداماسىندا اتاپ وتكەندەي، ناقتىلانعان رەسپۋبليكالىق بيۋدجەتتىڭ جوباسىندا جىل باسىنان بەرى يگەرىلمەي كەلگەن بيۋدجەتتىك باعدارلامالاردىڭ ءبىراز قاراجاتى وڭتايلاندىرىلعان.

«بيۋدجەت قاراجاتىنىڭ ءتيىمدى پايدالانۋىن سيپاتتايتىن كورسەتكىشتەردىڭ ءبىرى - كۆازيمەملەكەتتىك سەكتور سۋبەكتىلەرىنىڭ شوتتارىنداعى قالدىقتاردىڭ كولەمى. ولاردىڭ كولەمى 59,2 ميلليارد تەڭگەنى قۇرايدى. ول جىل باسىنان سالىستىرعاندا 15 ميلليارد تەڭگەگە ازايدى. ءبىراق ايتىپ ءوتۋ قاجەت، 41,5 ميلليارد تەڭگە وتكەن جىلداردان بەرى يگەرىلمەي كەلە جاتقان قالدىقتار»، - دەيدى ول.

ءاليحان سمايىلوۆ ءوز سوزىندە ءتيىستى مەملەكەتتىك ورگاندار مەن ۇلتتىق حولدينگتەرگە، كومپانيالارعا قاراجاتتى يگەرۋ بويىنشا شارالار قابىلداۋدى ۇسىندى.

«جەرگىلىكتى بيۋدجەتتەردىڭ شىعىسى 3 تريلليون 496 ميلليارد تەڭگەنى قۇرادى. اتقارىلماعانى - 32 ميلليارد تەڭگە. بۇل وتكەن ۇقساس كەزەڭمەن سالىستىرعاندا ەكى ەسەگە كەم (2017 -جىلعى 1-  قازاندا - 64 ميلليارد تەڭگە). نەعۇرلىم كوپ يگەرىلمەۋ كەلەسى وڭىرلەردە قالىپتاستى: استانا قالاسى (4,9 ميلليارد تەڭگە)، تۇركىستان (2,1 ميلليارد تەڭگە)، قىزىلوردا وبلىستارى (1,9 ميلليارد تەڭگە)، الماتى قالاسى (1,4 ميلليارد تەڭگە)، ماڭعىستاۋ وبلىسى (1,1 ميلليارد تەڭگە)»، - دەيدى قارجى ءمينيسترى.

ەسكە سالا كەتسەك، وتكەن ايدا ق ر پرەمەر- ءمينيسترى باقىتجان ساعىنتايەۆ بيۋدجەت قاراجاتىن يگەرە الماعان ءبىرقاتار اكىمدى سىناعان ەدى.

اۆتور: ايان بەكەن ۇلى