ساعىنتايەۆ قاراجاتتى يگەرە الماي جاتقان اكىمدىكتەرگە تاعى ەسكەرتۋ جاسادى

استانا. قازاقپارات - ۇكىمەت باسشىسى باقىتجان ساعىنتايەۆ قاراجاتتى يگەرە الماي جاتقان اكىمدىكتەرگە كەزەكتى رەت ەسكەرتۋ جاسادى، دەپ حابارلايدى قازاقپارات ءتىلشىسى.

«توعىز ايدىڭ قورىتىندىسى بويىنشا جالپى ىشكى ءونىمنىڭ ءوسىمى 4,1 پايىزدى قۇراپ وتىر. سەگىز ايدىڭ قورىتىندىسىمەن سالىستىرعاندا وتە ۇلكەن وزگەرىس بار. بۇل، جۇمىستى العا قاراي جىلجىتۋ بويىنشا بارلىعىمىزدىڭ بىرلەسە اتقارعان ءىس- ارەكەتتەرىمىزدىڭ ناتيجەسى دەپ بىلەمىن. دەگەنمەن، ءالى دە رەزەرۆتەرىمىز بار. ونى بارشامىز كورىپ- ءبىلىپ وتىرمىز. قازىر جوبالاۋ كەڭسەسى بويىنشا ەسەپتەر ءجۇرىپ جاتىر. سول ەسەپتەردىڭ نەگىزىندە ەلباسىنىڭ قويعان تاپسىرماسىن تولىققاندى ورىنداۋعا مۇمكىندىكتەرىڭىز بار»، - دەدى ۇكىمەت باسشىسى.

باقىتجان ساعىنتايەۆ قالعان كۇش- جىگەردى سوعان سالۋ كەرەكتىگىن ەسكەرتتى.

«قالعان 51 كۇن - ەكى ايدىڭ ىشىندە ەلباسىنىڭ تاپسىرماسىن تولىق ورىنداۋىمىز قاجەت. دەگەنمەن، وڭدەۋ ونەركاسىبىنە، كيىم ءوندىرۋ، تەرى ءوندىرىسى، مەتالل، تىگىن، مينەرالدىق ءوندىرىس، فارماتسيەۆتيكا سالاسىندا كوپتەگەن مۇمكىندىكتەرىمىز بار. جىلدىڭ سوڭىنا دەيىن قاجەتتى جۇمىستاردى اتقارۋىمىز قاجەت»، - دەدى ۇكىمەت باسشىسى.

ق ر پرەمەر- ءمينيسترى ءسوز سوڭىندا بولىنگەن قارجىنى يگەرۋ ماسەلەسى ءالى دە بارىن تىلگە تيەك ەتتى.

 «قازىر ءبىز بيۋدجەتتى قايتا قاراۋ ماسەلەسىن پىسىقتاپ جاتىرمىز. توعىز ايدىڭ قورىتىندىسى بويىنشا يگەرىلمەگەن قارجىنىڭ بارلىعى الىناتىنى تۋرالى وزدەرىڭىزگە ەسكەرتىلگەن بولاتىن. وسى ۇسىنىستار قارجى ءمينيسترى تاراپىنان بەرىلگەن. بيۋدجەتتىڭ وزگەرىستەرى قارالدى. ەرتەڭ پارلامەنتتە ول تۋرالى باياندالاتىن بولادى. ياعني، 9 ايدىڭ ناتيجەسى بويىنشا قاي اكىمدىك قارجىنى يگەرمەدى - سول قاراجاتتاردىڭ ءبارى الىنادى. الىنعان قارجى باسقا اكىمدىكتەر تاراپىنان جاسالعان ۇسىنىستارعا بەرىلەدى. كىم يگەرىپ جاتىر - سوعان بەرىلەدى. كىم يگەرمەدى - ولاردىڭ بارىنەن الىنادى. جىلدىڭ سوڭىنا دەيىن ءالى ءۇش اي بار. ءار ايدىڭ قورىتىندىسى بويىنشا يگەرىلمەگەن قارجى وسىلاي الىنىپ وتىرادى. ءاليحان اسحان ۇلى (قارجى ءمينيسترى - اۆت.)، كىمدەر يگەرمەي جاتىر - ول ماسەلەنى پارلامەنتكە بارماي- اق ءوزىمىز شەشەتىندەي مۇمكىندىك بولادى»، - دەدى ۇكىمەت باسشىسى.

ايتا كەتەيىك، ب. ساعىنتايەۆ وسى جىلدىڭ ماۋسىم ايىندا بولىنگەن قاراجاتتى يگەرە الماي جاتقان مينيسترلەرلىكتەر مەن اكىمدىكتەرگە ەسكەرتۋ جاساعان ەدى.

اۆتور: ايان بەكەن ۇلى