ورىس پراۆوسلاۆيە شىركەۋى كونستانتينوپول پاتريارحاتىمەن بايلانىسىن ءۇزدى

استانا. قازاقپارات - ورىس پراۆوسلاۆيە شىركەۋىنىڭ سينودى (شىركەۋدەگى ەڭ جوعارعى باسشىلىق ورگان) كونستانتينوپول پاتريارحاتىمەن بايلانىسىن توقتاتتى.

 بۇل تۋرالى شىركەۋدىڭ سىرتقى بايلانىستار جونىندەگى ءبولىمىنىڭ جەتەكشىسى ميتروپوليت يلاريون ورىس پراۆوسلاۆيە شىركەۋى سينودىنىڭ مينسكىدە وتكەن جيىنىنان سوڭ مالىمدەدى. «كيەلى سينود وتىرىسىندا كونستانتينوپول پاتريارحاتىمەن بايلانىستى مۇلدەم ءۇزۋ تۋرالى شەشىم قابىلداندى» دەدى ميتروپوليت.

بۇعان دەيىن ورىس پراۆوسلاۆيە شىركەۋى كونستانتينوپولدىڭ ۋكراينا پراۆوسلاۆيە شىركەۋىنە اۆتوكەفاليا (ءوزىن- ءوزى باسقارۋ قۇقىعى) بەرۋ شەشىمىنە «قاتاڭ جانە ءتيىستى» جاۋاپ بەرىلەتىنىن مالىمدەگەن. ماسكەۋ پاتريارحاتىنىڭ وكىلدەرى ەگەر ستامبۋلداعى پاتريارحات «پراۆوسلاۆيە الەمىنىڭ قارسىلىعىنا قاراماستان اۆتوكەفاليا بەرۋ تۋرالى شەشىم قابىلداسا، وندا ورىس پراۆوسلاۆيە شىركەۋى بۇل پاتريارحاتپەن قارىم- قاتىناسىن تولىق توقتاتۋعا ءماجبۇر بولادى» دەپ مالىمدەگەن.

ماسكەۋ پاتريارحاتىنىڭ ۋكراينا پراۆوسلاۆيە شىركەۋى بۇعان دەيىن كونستانتينوپولمەن بايلانىسىن ءۇزىپ، كونستانتينوپول پاتريارحى ۆارفولومەيگە انافەما (پراۆوسلاۆيە شىركەۋىندە قارعىس ايتىپ، دىننەن شىعارۋ) جاريالاۋى مۇمكىن ەكەنىن بىلدىرگەن.

ۋكراينا اۋماعىندا قازىر پراۆوسلاۆيەلىك ءۇش ۇيىم بار. ولار - ماسكەۋ پاتريارحاتىنىڭ ۋكراين پراۆوسلاۆيە شىركەۋى، كييەۆ پاتريارحاتىنىڭ ۋكراين پراۆوسلاۆيە شىركەۋى جانە ۋكراين اۆتوكەفالدى پراۆوسلاۆيە شىركەۋى.

ەستەرىڭىزگە سالا كەتەيىك، كونستانتينوپول پاتريارحى ۆارفولومەي قازاننىڭ 11- كۇنى ۋكراينا پراۆوسلاۆيە شىركەۋىنە ءوزىن- ءوزى باسقارۋ قۇقىعى - اۆتوكەفاليا بەرۋگە شەشىم قابىلداعان.

ورىس پراۆوسلاۆيە شىركەۋى بۇكىلالەمدىك پاتريارحاتتىڭ بۇل شەشىمىن «قاۋىپتى» ارەكەت دەپ اتاعان.

كيريلل مينسكىدە 13 - قازان كۇنى «بۇل جيىن وتە ماڭىزدى بولايىن دەپ تۇر. سينودتا ۋكرايناداعى جاعدايلارعا بايلانىستى ءبىرقاتار شەشىم قابىلدانادى. پراۆوسلاۆيە شىركەۋى داعدارىستى ەڭسەرىپ، تۇتاستىعىن ساقتاپ قالۋ جولىن تابادى دەپ ۇمىتتەنەمىن» دەگەن.

پاتريارح كيريللدىڭ باسپا ءسوز حاتشىسى بۇعان دەيىن ۆارفولومەيدىڭ شەشىمىنە قاتىستى «قاتاڭ جانە ءتيىستى» جاۋاپ بەرىلەتىنىن مالىمدەگەن.

قازاننىڭ 13- كۇنى ورىس پراۆوسلاۆيە شىركەۋىنىڭ ىشكى ماسەلەلەر بويىنشا ءبولىمىنىڭ باسشىسى ميتروپوليت يلاريون «روسسيا 24» تەلەارناسىنا بۇكىلالەمدىك پاتريارحاتتىڭ شەشىمى ماسكەۋ پاتريارحاتىن «ۆارفولومەيمەن وداعىن بۇزۋعا ماجبۇرلەگەنىن» ايتقان.

بۇل جاعداي 12 - قازاندا رەسەي قاۋىپسىزدىك كەڭەسىنىڭ پرەزيدەنت ۆلاديمير پۋتينمەن وتكەن جيىنىندا تالقىلاندى. كرەمل بۇدان بۇرىن ۋكرايناداعى جاعدايعا الاڭداپ، رەسەي ۋكرايناداعى پراۆوسلاۆتاردىڭ مۇددەلەرىن قورعايتىنىن ايتقان.

ال كيەۆتە كەشە مىڭداعان ادام ورتالىق الاڭعا جينالىپ، پاتريارح ۆارفولومەيدىڭ ۋكراينا پراۆوسلاۆيە شىركەۋىنە اۆتوكەفاليا بەرۋ شەشىمىنە العىس ءبىلدىرىپ، قۇلشىلىق جاسادى.

www.azattyq.org