ەلىمىزدەگى دامۋ كورسەتكىشى جوعارى وڭىرلەر بەلگىلى بولدى

استانا. قازاقپارات - ق ر ۇلتتىق ەكونوميكا ءمينيسترى تيمۋر سۇلەيمەنوۆ وسى جىلدىڭ قاڭتار- قىركۇيەك ايلارىندا الەۋمەتتىك- ەكونوميكالىق دامۋ كورسەتكىشى بويىنشا ۇزدىك ناتيجەگە قول جەتكىزگەن وڭىرلەردى اتادى، دەپ حابارلايدى قازاقپارات ءتىلشىسى.

 «وڭىرلىك بولىنىستە ونەركاسىپتىڭ قارقىندى ءوسۋىن اتىراۋ وبلىسى (%11,9)، قوستاناي وبلىسى (%9,5) جانە شىعىس قازاقستان وبلىسى (%9,2) كورسەتىپ وتىر»، - دەيدى تيمۋر سۇلەيمەنوۆ.

ءمينيستردىڭ ايتۋىنشا، 3 وڭىردە تومەندەۋ بايقالادى. بۇل قىزىلوردا (%6,5-)، باتىس قازاقستان (%3,7-) جانە تۇركىستان (%3,0-) وبلىستارى.

 «بۇل وڭىرلەردە مۇناي، گاز كوندەنساتىن جانە ۋران كەنىن ءوندىرۋ كولەمى قىسقاردى. اۋىل شارۋاشىلىعى بويىنشا وڭ ءۇردىس 12 وڭىردە ساقتالۋدا. سونىمەن بىرگە، باتىس قازاقستان وبلىسى تەرىس ايماقتا قالىپ بارادى. استىق ونىمدەرىن جيناۋدىڭ ازايۋىنىڭ ەسەبىنەن تومەندەۋ دەڭگەيى 4,5 - پايىزعا دەيىن بولىپ وتىر»، - دەيدى ول.

تيمۋر سۇلەيمەنوۆتىڭ ايتۋىنشا، جالپى قۇرىلىس جۇمىستارىنىڭ وسۋىنە قاراماستان، 3 ايماقتا تومەن كورسەتكىشتەر انىقتالدى. مۇنداي كورسەتكىشتەر اقمولا وبلىسىندا (18,5 - پايىزعا) ، استانا قالاسىندا (13,3 - پايىزعا) جانە قىزىلوردا وبلىسىندا (5,9 - پايىزعا) تىركەلىپ وتىر.

«بۇل رەتتە شىمكەنت قالاسىنداعى جاعداي ايتارلىقتاي جاقساردى. قۇرىلىس جۇمىستارى 1,9 ەسەگە ءوستى»، - دەدى مينيستر.

سونىمەن قاتار، نەگىزگى كاپيتالعا سالىنعان ينۆەستيتسيالار بويىنشا تۇركىستان وبلىسىنان (9,2 - پايىز) باسقا بارلىق وڭىرلەر ءوسىمدى كورسەتىپ وتىر. اتالعان وڭىردەگى تومەندەۋ ازيالىق گاز قۇبىرى قۇرىلىسىنىڭ جانە شاردارا سۋ ەلەكتر ستانسياسىن جاڭعىرتۋدىڭ اياقتالۋىنا بايلانىستى بولعان. ەڭ ۇلكەن ءوسىم شىمكەنت قالاسىندا (175,8 پايىز) جانە اتىراۋ وبلىسىندا (35,6 پايىز) بايقالادى.

اۆتور:    ايان بەكەن ۇلى