پرەزيدەنت بۇقارا - ورال گاز قۇبىرىن ۇكىمەتتە قاراۋدى تاپسىردى

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ مەملەكەت باسشىسىنا بىرنەشە ۇسىنىسىن جەتكىزدى. الايدا ەلباسى تەك بۇقارا - ورال ماگيسترالدى گاز قۇبىرىن قاراۋعا تاپسىرما بەردى، دەپ حابارلايدى قازاقپارات ءتىلشىسى.

اقتوبە وبلىسىنا ەكى كۇندىك جۇمىس ساپارىمەن كەلگەن مەملەكەت باسشىسى نۇرسۇلتان نازاربايەۆ يندۋستريالدى ايماقتا بولىپ، ءوڭىردىڭ ءوندىرىس، اۋىل شارۋاشىلىعىنداعى اتقارىلعان جۇمىستارمەن تانىستى. قازىرگى كۇنى «اقتوبە» يندۋستريالدى ايماعىندا 5 جوبانىڭ قۇرىلىسى ءجۇرىپ جاتىر. ولار: جۇك كولىكتەرى دوڭعالاعىن قايتا قالپىنا كەلتىرۋ، بوياۋ، جيھاز شىعارۋ جانە كولىك- لوگيستيكا ورتالىعى. جوبا قۇنى - 3 ميلليارد تەڭگە.

«جىلىنا 870 مىڭ تەكشە مەتر جۇك اينالىمى جۇرەدى. مۇندا اۆتوجول، تەمىرجول بار. قازاقستاننىڭ باتىس ءوڭىرى مەن قوستاناي، قىزىلوردا وبلىستارىنا دا قىزمەت كورسەتەمىز» ، - دەدى لوگيستيكا ورتالىعىنىڭ دەپارتامەنت باسشىسى الەكساندر ۆولك.

بۇدان كەيىن وبلىس اكىمى بەردىبەك ساپاربايەۆ بىرنەشە ۇسىنىسىن جەتكىزدى. ونىڭ العاشقىسى - اقتوبەدە ءتورتىنشى مۇناي وڭدەۋ زاۋىتىن سالۋ. كەيىن بۇقارا- ورال باعىتىنداعى ماگيسترالدى گاز قۇبىرىن تارتۋ جوباسىن ۇسىندى. سونداي- اق ورتالىق- باتىس تاسجولىن سالۋ، قازاقستان مەن رەسەي شەكاراسى ءۇشىن «باتىس قاقپاسى» جوباسىن ىسكە اسىرۋ ماسەلەسىن ايتتى.

«اقتوبە قالاسىندا ءىرى ءوندىرىس ورىندارى سالىنىپ جاتىر. قازىرگى كەزدە گاز قۇبىرىنداعى كوگىلدىر وتىن بىزگە جەتپەي جاتىر. ەندى بۇقارا- ورال گاز قۇبىرىنىڭ ءۇشىنشى تارماعىنا قۇرىلىس جۇمىستارى باستالسا دەگەن ءوتىنىش بار. ەنەرگەتيكا مينيسترلىگىنەن قولداۋ بار، ينۆەستورلار تابىلىپ تۇر. جاڭاجول كەن ورنىنان گازدى اقتوبەگە الىپ كەلۋ كەرەك. ال ارتىق قالعان گاز قازىر اۋاعا جانىپ جاتىر. جىلىنا 300 مىڭ تەكشە مەتر گاز جانىپ، دالاعا كەتەدى»، - دەدى وبلىس اكىمى بەردىبەك ساپاربايەۆ.

الايدا ەلباسى نۇرسۇلتان نازاربايەۆ تەك ءبىر جوبانى قاراپ، تيىمدىلىگىن تەكسەرۋدى تاپسىردى.

 «مۇناي وڭدەۋ زاۋىتىن سالۋ تۋرالى ءوتىنىش قارالمايدى. ەلىمىزدەگى ءۇش زاۋىتقا جوندەۋ جۇمىستارى جاسالىپ، قازاقستاندى 2035 -جىلعا دەيىن قامتاماسىز ەتەمىز. شىمكەنتتەگى زاۋىتتىڭ اۋقىمىن كەڭەيتسەك، بىزگە ونداي زاۋىتتىڭ قاجەتى جوق. اقتوبە- اتىراۋ تاسجولى سالىنىپ جاتىر. اۋدانارالىق جولداردى جەرگىلىكتى بيۋدجەتتەن دە جوندەۋگە بولادى. جولداردى 3-4 تارماقتى ەمەس، ەكى باعىتتا سالۋعا بولادى. ال «باتىس قاقپاسى» جوباسى اقتاۋ قالاسىندا بار، سول جەتكىلىكتى. بۇقارا- ورال جوباسىن ۇكىمەتتە قاراۋ كەرەك»، - دەدى پرەزيدەنت.

 ايتا كەتەيىك، بۇگىن مەملەكەت باسشىسى اقتوبەگە جۇمىس ساپارىمەن كەلدى. «ايالا» بالالاردى ساۋىقتىرۋ ورتالعىنا بارىپ، «باقىتتى بالا» جوباسى اياسىندا ىسكە اسىرىلعان جۇمىسپەن تانىستى. سونىمەن قاتار، تەننيس ورتالىعىن قاراپ شىقتى. ەلباسى ءوڭىردىڭ ەكونوميكالىق- الەۋمەتتىك دامۋ كورسەتكىشتەرىمەن تانىسقان كەزدە، اقتوبە وبلىسىنىڭ دامۋىنا وڭ باعا بەردى.

اۆتور: التىناي ساعىندىقوۆا