ەرلان ساعاديەۆ مەكتەپ پسيحولوگتارىنىڭ ەكى پروبلەماسىن اتادى

قاراعاندى. قازاقپارات - قاراعاندى قالاسىنا جۇمىس ساپارىمەن بارعان ق ر ءبىلىم جانە عىلىم ءمينيسترى ەرلان ساعاديەۆ پەداگوگتارمەن كەزدەسىپ، پرەزيدەنت جولداۋىنداعى باسىمدىقتار تۋرالى ايتتى، دەپ حابارلايدى قازاقپارات.

ءبىلىم سالاسى بالاباقشالاردان باستاپ جاڭعىرتىلاتىن بولادى. كەلەسى جىلدان باستاپ-اق تاربيەشىلەردىڭ بىلىكتىلىگىن ارتتىرۋعا ەرەكشە نازار اۋدارىلادى. ولار ءۇشىن قىسقا مەرزىمدى كۋرستار ۇيىمداستىرىلىپ، ونىڭ سوڭىندا ۇلتتىق تەستىلەۋدەن وتەتىن بولادى. تاربيەشىلەر ءۇشىن جاڭا جالاقى جۇيەسى قۇرىلادى. ايلىق اقى ەڭبەك ءوتىلى مەن ساناتقا بايلانىستى بولادى.

قاراعاندى وبلىسى اكىمدىگىنىڭ باسپا ءسوز قىزمەتىنەن ءمالىم ەتكەندەي، ەرلان ساعاديەۆ مەكتەپتەردەگى قاۋىپسىزدىك جانە جاس وسپىرىمدەر اراسىنداعى سۋيتسيدتىڭ الدىن الۋعا ەرەكشە نازار اۋداردى. ونىڭ پىكىرىنشە، بۇل باعىتتاعى جۇمىستى ءبىلىم وردالارىنداعى پسيحولوگتاردىڭ سانىن كوبەيتۋدەن جانە ولاردىڭ بىلىكتىلىگىن ارتتىرۋدان باستاۋ كەرەك.

«مەكتەپ پسيحولوگتارىندا ەكى پروبلەما بار: تومەن جالاقى جانە ەسكىرگەن ءبىلىم. بۇل پروبلەمالاردى بىلىكتىلىكتى ارتتىرۋ كۋرستارى جانە ەمتيحاندار ارقىلى شەشۋدى كوزدەپ وتىرمىز. مەكتەپ پسيحولوگتارى ءۇشىن، سونداي-اق بولەك جالاقى جۇيەسى قۇرىلاتىن بولادى. بۇعان قوسا، مەكتەپ پسيحولوگتارىنىڭ سانى مەكتەپتەگى وقۋشىلار سانىنا بايلانىستى ەسەپتەلەدى. وسىلايشا، ماماندار سانى ۇلعايادى»، - دەدى مينيستر.

رەفورمالار ج و و بىلىمىنە دە اسەر ەتەدى.

ەرلان ساعاديەۆتىڭ ايتۋىنشا، العان ماماندىعى بويىنشا جۇمىس ىستەپ جاتقان تۇلەكتەرگە نەگىزدەلگەن ۋنيۆەرسيتەتتەردىڭ رەيتىنگىسى قۇرىلادى.

«ەگەر رەيتينگ جوعارى بولسا، ءارى قاراي ءبىلىم بەرە بەرسىن. ەگەر جۇمىسقا تۇرعاندار از بولسا، ءبىز ج و و- نى وسى ماماندىق بويىنشا ليتسەنزياسىنان ايىرامىز. ول بەيىمدەۋگە الىپ كەلەدى. ۋنيۆەرسيتەتتەر نەدەن باستادى، سوعان قايتىپ كەلەدى: ينجەنەرلىك ماماندىقتار، گۋمانيتارلىق، تىلدەر جانە تاعى باسقالارى. ادەتتە، ونداي سالالىق پاندەر جاقسى وقىتىلادى دا، قالعان ماماندىقتاردى اقشا تابۋ ءۇشىن جيناپ العان»، - دەپ ءتۇسىندىردى ول.

كەزدەسۋ سوڭىندا پەداگوگتار مينيسترگە جالاقىنى كوتەرۋ جانە جاڭارتىلعان ءبىلىم بەرۋ جۇيەسىنە قاتىستى ءبىرقاتار سۇراقتار قويدى.

ءبىلىم جانە عىلىم ءمينيسترى ەرلان ساعاديەۆ 15- قازان كۇنى قاراعاندى وبلىسىنا جۇمىس ساپارىمەن كەلدى. ول الدىمەن «كولوبوك» شاعىن ورتالىعىندا جانە تەحنيكالىق-قۇرىلىس كوللەدجىندە بولىپ، پەداگوگتارمەن ينكليۋزيۆتى ءبىلىم ماسەلەلەرىن تالقىلادى.