ەلوردالىق اتا-انالار بالالارىنىڭ مەكتەپ اسحاناسىنان نە ساتىپ العانىن باقىلاي الادى

استانا. قازاقپارات - قالالىق ءبىلىم باسقارماسى وقۋشىعا ارنالعان جول ءجۇرۋ كارتاسى ارقىلى تاماققا تولەم جاساۋعا جانە مەكتەپكە كىرۋگە رۇقساتناما بەرەتىن پيلوتتىق جوبا دايىنداۋدا، دەپ حابارلايدى استانا قالاسى اكىمدىگىنىڭ رەسمي سايتى.

سيفرلاندىرۋ اياسىندا ءبىلىم باسقارماسى جۇكتەمەسى اۋىر مەكتەپتەردە تاماققا تولەم جاساۋ ءۇشىن جول ءجۇرۋ كارتاسىن پايدالانۋ پيلوتتىق جوباسىن قولعا الماق. قالالىق ءبىلىم باسقارماسىنىڭ باسشىسى ءانۋار جانعوزيننىڭ ايتۋىنشا، ءار وقۋشىدا مەكتەپكە كىرۋگە ارنالعان كارتوچكا بار، ول تۋرنيكەتتەن وتكەندە ونىڭ مەكتەپكە كەلگەنى بەلگىلەنەدى. وقۋشىلار سول كارتا ارقىلى مەكتەپ اسحاناسىندا جانە جول ءجۇرۋ اقىسىن تولەيتىن بولادى.

وسىلايشا اتا-انا بالاسىنىڭ قاي كەزدە نە ساتىپ العانىن باقىلاي الادى.

«تەرمينال نەمەسە ونلاين تۇردە اتا-انا جول ءجۇرۋ كارتاسىن تولىقتىرا الادى جانە بالاعا جەۋگە بولمايتىن تاعام تۇرلەرىنە شەكتەۋ قويۋ مۇمكىندىگى بار، ياعني بالا اسحانادا اتا-اناسى شەكتەۋ قويعان تاعام تۇرلەرىن ساتىپ الا المايدى. تولەم كارتاداعى بالانستان الىنادى، كارتاداعى بىرلىك شەشىلگەن كەزدە اتا-اناعا حابارلاما كەلەدى. اسحانادا قولما قول اقشالاي تولەۋ كەزەك تۋدىرادى، سول سەبەپتى دە وسى جۇيە مەكتەپكە دە، اتا-اناعا دا ىڭعايلى»، - دەيدى ءا. جانعوزين.

ءبىلىم باسقارماسىنىڭ اقپاراتى بويىنشا بۇل پيلوتتىق جوبا قالاداعى 27، 54، 59 مەكتەپتەرىندە بىرەر اپتا بۇرىن باستالعان. ال بۇل جوبانى باسقا دا مەكتەپتەرگە ەنگىزۋ ماسەلەسى ەكىنشى توقساننان كەيىن شەشىلەدى.