استانادا ۆاينەرلەر فەستيۆالى باستالدى
فەستيۆالدى قوعامدىق دامۋ ىستەرى باسقارماسىنىڭ قولداۋىمەن جاستاردى تۇراقتى دامىتۋ جانە الەۋمەتتىك قوعامدىق قورى ۇيىمداستىردى. شارا تانىمال جانە جاڭادان باستاۋشى ۆاينەرلەردى بىرىكتىرىپ، جاستاردىڭ شىعارماشىلىق الەۋەتىن ىسكە اسىراتىن الەۋمەتتىك-مادەني الاڭعا اينالادى دەپ كۇتىلۋدە.
فەستيۆالدىڭ ماقساتى - ەلدەگى كرەاتيۆ جاستاردى قولداۋ، جاستاردىڭ الەۋمەتتىك بەلسەندىلىگىن دامىتۋ جانە جاستار اراسىندا «رۋحاني جاڭعىرۋدىڭ» قۇندىلىعىن تانىمال ەتۋ.
«باسەكەلى فەستيۆال 2 تۋردان تۇرادى. ءبىرىنشى تۋرعا قاتىسۋعا وتىنىشتەر 15 نەن 31- قازانعا دەيىن جالعاسادى. قاتىسۋشىلار سۋىرىپ سالما تاقىرىپتارعا ۆاين ءتۇسىرۋى قاجەت. نەگىزگى كريتەري - ينستاگرامدا جازىلۋشىلار سانى 3 مىڭنان كەم بولماۋى كەرەك»، - دەپ حابارلادى فەستيۆالدى ۇيىمداستىرۋشىلار.
ۇزدىك بەينەروليكتەر 31- قازاننان 2- قاراشا ارالىعىندا كونكۋرستىڭ كوميسسياسىنان ەكىنشى تۋرعا وتەدى، ونىڭ قۇرامىندا نۇرلان باتىروۆ، «Kartop.tv»، «XaXaShow»، «Tjokers» سىندى جۇلدىزدى ۆاينەرلەر بار.
ءادىلقازىلار مۇشەسى 20 ۆايندى تاڭدايدى، اۆتورلارعا بەرىلگەن تاقىرىپقا قاراي سۋىرىپ سالما روليك دايىنداۋعا كومەكتەسەدى. فينالدىق تۋردىڭ جەڭىمپازدارىن فەستيۆالدىڭ كونسەرتتىك جالعاسىندا ۇسىنادى.
جۇلدە قورى 1- ورىن ءۇشىن 350 مىڭ تەڭگە، 2- ورىن - 250 مىڭ تەڭگە جانە 3- ورىن - 150 مىڭ تەڭگە.