بالا تاربيەسىندەگى ماڭىزدى ۇستانىمدار

استانا. قازاقپارات - كوپتەگەن اتا-انالاردى: ءبىر مەزگىلدە قاتال دا مەيىرىمدى بولا ءبىلۋ، ءوز بالاسىنىڭ الدىنداعى اتا-انالىق بيىگىنەن تۇسپەي تۇرىپ، وعان قالايدا ەڭ جاقىن دوس بولا ءبىلۋ جايى كوپ ويلانتادى.

تومەندەگى وتە ماڭىزدى اقىل-كەڭەستەر، بالا تاربيەسى بارىسىندا سىزگە كوپ كومەك بەرەرى ءسوزسىز:

1. كوڭىل كۇيىڭىز بولماي تۇرعان كەزدە ەشقاشان دا بالا تاربيەسىمەن اينالىسپاڭىز. ءوز بالاڭىزبەن تىعىز قارىم- قاتىناس ورناتۋعا تەك قانا ءسىزدىڭ كوتەرىڭكى كوڭىل كۇيىڭىز، وڭ كوزقاراسىڭىز عانا اسەر ەتەدى.

2. تاربيە ساتىلى دەڭگەيدە جۇرگىزىلگەنى دۇرىس. ءار بيىككە ءوز ۋاقىتىندا، بىرتىندەپ كوتەرىلىپ وتىرعان دۇرىس.

3. بالا -  ءبىزدىڭ اينامىز. ولار ەڭ الدىمەن اتا-اناسىنان ۇلگى الاتىنىن جانە كوپ جاعدايدا ءبىز ومىردە قانداي قادامدار جاساساق، ولار دا سونداي قادامعا باراتىنى ەستە ءجۇرسىن.

4. بالاڭىزبەن اڭگىمەلەسۋ ناتيجەلى بولۋى ءۇشىن، ەڭ الدىمەن اشىق جارقىن سەنىمگە قۇرىلعان رياسىز ءادىستى تاڭداڭىز. ءسىزدىڭ سوزدەرىڭىز قاتال ەستىلۋى مۇمكىن، ءبىراق ەشقاشان دا اۋىر ءارى ورەسكەل بولماۋى كەرەك. اقىرىن ءارى سەنىمدى ايتىلعان اڭگىمە عانا اتا- انانىڭ تالاپتارى مەن ويلارىن بالاعا جەتكىزە الادى.

5. بالاڭىز ءۇشىن كەرەك ۋاقىتتا قاجەتتى اقىل قوساتىن، ونىڭ قادامدارىن ايىپتامايتىن ەڭ جاقىن دوسىنا اينالىڭىز.

6. ءوزىن جانە ونى قورشاعان ادامداردى جاقسى كورۋگە ۇيرەتىڭىز. بۇل ونى وزىنە وتە سەنىمدى ادام رەتىندە قالىپتاستىرىپ، قورشاعان ورتامەن بايلانىسىن جولعا قويۋعا كومەك بەرەدى.

7. ءبىر مەزەتتە قاتال دا مەيىرىمدى بولا ءبىلىڭىز. ەگەر ءسىز بالاڭىزعا دەگەن ىستىق ىقىلاسىڭىزدى ۇنەمى بىلدىرە وتىرىپ، تەك كەرەك ۋاقىتىندا عانا ۇرساتىن بولساڭىز، وندا بۇل ءسىزدىڭ تاربيەڭىز بارىسىندا مىندەتتى تۇردە جەمىسىن بەرەدى.

8. وعان ومىردەگى ءوز ۇستانىمىنا تۇراقتى بولۋدى ۇيرەتىڭىز.

9. بالانى ءار كەزدە ونىڭ كوزىنە قاراپ تۇرىپ، مۇقيات تىڭداڭىز، ويتكەنى تەك سول ساتتە عانا ونىڭ ىشكى جان دۇنيەسى مەن الاڭداتقان ماسەلەگە ءسىزدىڭ بەي- جاي قارامايتىنىڭىزعا سەنىمى بولادى.

10. ءوزىڭىزدىڭ بوس ۋاقىتىڭىزدى ۇنەمى بالاڭىزبەن وتكىزۋگە تىرىسىڭىز. ونداي ساتتەر بالانىڭ وزىندىك ورنىن سەزىنىپ وسۋگە مۇمكىندىك بەرەدى.

دەرەككوز: imurat.kz