داۋرەن ابايەۆ جاستاردىڭ بيزنەس-باستامالارىن قولداۋعا ارنالعان تىڭ جوبانى تانىستىردى

استانا. قازاقپارات - اقپارات جانە كوممۋنيكاتسيالار ءمينيسترى داۋرەن ابايەۆ جاس قازاقستاندىقتاردىڭ بيزنەس- باستامالارىن قولداۋعا ارنالعان «نەگىزىن قالاۋشىلار» اتتى جاڭا جوبانى تانىستىردى، دەپ حابارلايدى قازاقپارات ءتىلشىسى.

«بيزنەس - ول كەز كەلگەن ەكونوميكانىڭ نەگىزى. ءدال وسى بيزنەس ادامداردىڭ باقۋاتتىلىعىن قامتاماسىز ەتەدى. ال كاسىپكەرلەر ورتاشا كلاستىڭ نەگىزىن قالايدى. بۇگىنگى تاڭدا قازاقستاندا بيزنەستى قولداۋ باعىتىندا ۇلكەن كۇش جۇمسالىپ جاتىر. بۇل شارۋاعا ءبىزدىڭ جاڭا جوبامىز - «نەگىزىن قالاۋشىلار» دا (وسنوۆاتەلي) كومەكتەسەر دەگەن سەنىمدەمىز»، - دەيدى مينيستر «Osnovateli kz» اتتى يۋتۋبتەگى ارنادا.

داۋرەن ابايەۆتىڭ ايتۋىنشا، مۇنداعى ماقسات - جاس قازاقستاندىقتاردىڭ بيزنەس- باستامالارىن قولداۋ بولىپ تابىلادى.

«جوباعا 18-25 جاس ارالىعىنداعى كەز كەلگەن ازامات قاتىسا الادى. باستى تالاپ - كرەاتيۆتى يدەيا جانە ونى ىسكە اسىرۋدا ەرىك-جىگەردىڭ بولۋى. جوبا يننوۆاتسيا مەن دامۋعا بەيىم، تابىستى ماقسات تۇتقان قازاقستاندىقتار ءۇشىن جاقسى ستارت الاڭ بولادى»، - دەيدى مينيستر.