الەۋمەتتىك جەلىدەن قانداي قاۋىپ كۇتۋگە بولادى - پوليتسيا

الماتى. قازاقپارات - الماتى پوليتسياسى الەۋمەتتىك جەلىنىڭ قاۋىپتى تۇستارىن ايتتى، دەپ حابارلايدى قازاقپارات ءتىلشىسى.

قالالىق ءى ءى د باسپا ءسوز قىزمەتىنىڭ حابارلاۋىنشا، قازىر الەمدە LinkedIn (لينكەد ين) الەۋمەتتىك جەلىسىندە جالعان كومپانيالاردىڭ الاياقتىق سحەمالارى تۋرالى اقپارات تارالىپ جاتىر.

ءتارتىپ ساقشىلارى ءىرى تابىس تۋرالى اقپاراتتارعا سەنبەۋگە شاقىرادى.

«لينكەد ين الەۋمەتتىك جەلىسى - ىسكەرلىك باعىتتا پايدالانىلاتىن ىزدەۋشى. كوبىنەسە ونى بيزنەسمەندەر قولدانادى. قازاقستاندىقتار اراسىندا ونشا تانىمال ەمەس. سوندىقتان، تۇتىنۋشىلار اراسىندا وعان قاتىستى شاعىم تۇسكەن جوق»، - دەدى باسپا ءسوز قىزمەتىنەن.

الايدا قۇقىق قورعاۋشىلار الەۋمەتتىك جەلىدە جەكە اقپارات تاراتپاۋدى ەسكەرتەدى.

«بەيتانىس ادامدارعا جەكە مالىمەتتەرىڭىزدى بەرمەڭىز. جەكە كۋالىك ءنومىرى، تۋعان كۇن، بانك كارتاسى ءنومىرى، بانك شوتىنىڭ ءنومىرى دەگەن سياقتى مالىمەتتەردى جاريالاماڭىز. عالامتور ارقىلى ۆاكانسياعا ءوتىنىش بەرگەندە كومپانيامەن بايلانىسى جوق ەلەكتروندى پوشتاعا اقپارات جىبەرۋىڭىزدى سۇراعان ادامدارعا اقپارات جىبەرمەۋىڭىز كەرەك. سونىمەن قاتار، ولار اۋدارماشى، زاڭگەر سياقتى مامانداردىڭ قىزمەتىنە اقشا سۇراتۋى مۇمكىن. بۇل الاياقتىق سحەمالاردىڭ بەلگىسى. ەلەكتروندى پوشتاعا كەلگەن سىلتەمەلەردى اشقان كەزدە اباي بولۋ كەرەك. سول ارقىلى ءسىزدىڭ قۇرالىڭىزعا زياندى باعدارلاما ورناتىلىپ، جەكە مالىمەتتەرىڭىزدى جىمقىرۋى مۇمكىن»، - دەدى قالالىق ءى ءى د كريمينالدى پوليتسيا باسقارماسىنىڭ باسشىسى ەسەن ىسقاقوۆ.