كورەيادا زاڭسىز جۇرگەن قازاقستان ازاماتتارى اكىمشىلىك جازادان قالاي قۇتىلا الادى

استانا. قازاقپارات - وڭتۇستىك كورەيادا زاڭسىز جۇرگەندەر قازاقستانعا ەش كەدەرگىسىز ورالا الادى.

بۇل تۋرالى بۇگىن وتكەن بريفينگتە قر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«كورەيا رەسپۋبليكاسىنىڭ ۇكىمەتى 2018 -جىلعى 1 -قازاننان 2019 -جىلعى 31 -ناۋرىزعا دەيىن وڭتۇستىك كورەيا اۋماعىندا زاڭسىز جۇرگەن شەتەل ازاماتتارىنا «جاسىل ءدالىز» رەجىمىن ەنگىزگەنىن جاريالادى. وسى شارا اياسىندا قازىرگى كەزدە اتالعان ەلدىڭ اۋماعىندا وتىز كۇننەن كوپ جۇرگەن، سونداي-اق ۆيزاسى نەمەسە جۇمىس ىستەۋگە رۇقساتى جوق شەتەلدىكتەر 6 اي مەرزىم ىشىندە ءوز ەلدەرىنە ەش كەدەرگىسىز ورالۋىنا بولادى. بۇل جاعدايدا ولارعا ەشقانداي ايىپپۇل شارالارى قولدانىلمايدى جانە بولاشاقتا وڭتۇستىك كورەياعا قايتا بارۋىنا شەكتەۋ قويىلمايدى. وسى ەلدىڭ اۋماعىنان ەرىكتى تۇردە شىققان قازاقستان ازاماتتارىنىڭ قر- داعى كورەيا رەسپۋبليكاسىنىڭ ديپلوماتيالىق وكىلدىكتەرىنەن ءتيىستى ۆيزا العاننان كەيىن، كورەياعا زاڭدى تۇردە كەدەرگىسىز قايتا كىرۋىنە مۇمكىندىكتەرى بار»، - دەدى ايبەك سمادياروۆ.

ونىڭ سوزىنە قاراعاندا، قازاقستان ازاماتتارى اتالعان مەرزىمدە ءوز ەركىمەن شىعۋى ءۇشىن وڭتۇستىك كورەيانىڭ حالىقارالىق اۋەجايلارىنداعى يمميگراتسيالىق قىزمەت وكىلدىكتەرىنە الدىن الا قولدارىندا بار بيلەتتەرىمەن جانە قازاقستاننىڭ تولقۇجاتىمەن بارۋى قاجەت.

«2018 -جىلدىڭ قازان ايىنان باستاپ وڭتۇستىك كورەيانىڭ كوشى-قون بيلىك وكىلدەرى پوليتسيامەن بىرلەسىپ، ەل اۋماعىندا زاڭسىز جۇرگەن شەتەلدىك ميگرانتتاردى ۇستاۋ ءۇشىن قاتاڭ رەيدتەردى باستادى. وسى شارالار بارىسىندا ۇستالعانداردى ەلدەن ءوز ەركىمەن كەتۋشىلەر دەپ ەسەپتەمەي، كەرىسىنشە ولارعا ەلدىڭ زاڭىن بۇزۋشىلار رەتىندە ءتيىستى اكىمشىلىك شارالاردى قولداناتىن بولادى. اتاپ ايتقاندا، ولار قاماۋعا الىنىپ، 20 ميلليون كورەي ۆوناسىنا دەيىن، ياعني 6,5 ميلليون تەڭگە شاماسىندا ايىپپۇل سالىنادى. سونىمەن قاتار ەلدەن شىعارىلىپ، كورەيا رەسپۋبليكاسىنىڭ اۋماعىنا 10 جىلعا دەيىن كىرۋگە تىيىم سالىنادى. وسى رەتتە بۇل ەلدە زاڭسىز جۇرگەن قازاقستان ازاماتتارىن «جاسىل ءدالىز» شاراسىن پايدالانىپ، ءوز ەركىمەن ورالۋعا شاقىرامىز»، - دەدى باسپا ءسوز قىزمەتىنىڭ جەتەكشىسى.

ونىڭ ايتۋىنشا، ءوز ەركىمەن شىعۋ اكسياسى كورەيانىڭ يمميگاراتسيالىق زاڭناماسىن بۇزۋشىلارعا اكىمشىلىك جازادان قۇتىلۋعا، سونداي-اق بولاشاقتا اتالعان ەلگە ءتۇرلى ماقساتپەن زاڭدى تۇردە قايتا كەلۋىنە مۇمكىندىك بەرەدى.

ق ر سىرتقى ىستەر مينيسترلىگىنىڭ مالىمەتىنشە، 2018 -جىلدىڭ قاڭتارىنان باستاپ 31 -تامىزعا دەيىن كورەياعا 38575 قازاقستان ازاماتى ساپارلاعان. بيىلعى شىلدە كەزىندە 19011 ادام رەسمي تىركەۋدەن وتسە، 11561 ادام زاڭسىز يمميگرانت رەتىندە تانىلدى.

بۇدان بۇرىن حابارلانعانداي، ق ر سىرتقى ىستەر مينيسترلىگى وڭتۇستىك كورەياعا وقۋعا بارىپ، دەپورتاتسياعا ۇشىراعان ستۋدەنتتەرگە قاتىستى پىكىر بىلدىرگەن بولاتىن.