نۇرسۇلتان نازاربايەۆ بەلگيا كورولى فيليپپەن كەزدەسەدى

 استانا. قازاقپارات - اعىمداعى اپتادا ەلباسى نۇرسۇلتان نازاربايەۆ بەلگيا كورولى فيليپپەن كەزدەسەدى.

بۇل تۋرالى بۇگىن وتكەن بريفينگتە ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«بەلگيا كورولدىگىنىڭ بريۋسسەل قالاسىندا 18-19- قازاندا «ازيا- ەۋروپا» فورۋمىنىڭ (اسەم) 12- سامميتىنە اياسىندا ق ر پرەزيدەنتى نۇرسۇلتان نازاربايەۆتىڭ بەلگيا كورولى فيليپپەن ەكىجاقتى كەزدەسۋى وتەدى. قازاقستان اسەم مۇشەسى بولىپ تابىلاتىن ورتالىق ازياداعى جالعىز مەملەكەت» ، - دەپ توقتالدى ول.

ساپار بارىسىندا مەملەكەت باسشىسى ماشينا جاساۋ، مەتاللۋرگيا، حيميا ونەركاسىبى، سيفرلىق تەحنولوگيالار، ازىق- تۇلىك ونەركاسىبى جانە مۇناي سالاسىندا جۇمىس ىستەيتىن 30 عا جۋىق ەۋروپالىق ءىرى كومپانيالار وكىلدەرىمەن، سونداي- اق قارجى ينستيتۋتتارىنىڭ باسشىلارىمەن كەزدەسەدى.

«ازيا- ەۋروپا» فورۋمىنىڭ ماڭىزدىلىعى الەمدىك جالپى ىشكى ءونىمنىڭ باسىم ۇلەسىن 60 پايىزدان استام قامتاماسىز ەتەتىن باتىس ەۋروپا جانە شىعىس ازيا ەلدەرى كىرەتىن قاتىسۋشىلاردىڭ قۇرامىمەن انىقتالادى. قازىرگى ۋاقىتتا اتالعان فورۋم الاڭىندا ەكونوميكالىق ماسەلەلەردەن بولەك، جاھاندىق ءارى وڭىرلىك قاۋىپسىزدىكتىڭ وزەكتى تاقىرىپتارى دا تالقىلانادى» ، - دەدى ايبەك سمادياروۆ.

بۇدان بۇرىن حابارلانعانداي، ق ر پرەزيدەنتى نۇرسۇلتان نازاربايەۆ فينليانديا رەسپۋبليكاسىنىڭ پرەزيدەنتى ساۋلي نيينيستەنىڭ شاقىرۋىمەن 16-17 - قازاندا فينلياندياعا رەسمي ساپارمەن بارادى.