جان تەبىرەنىسىنەن تۋعان كارتينالار
جۇرت قويۋ ءتۇننىڭ قۇشاعىندا قالىڭ ۇيقىعا كەتكەندە، ول قىلقالامىن قولىنا الىپ، كەنەپ بەتىنەن كوز الار ەمەس. قاراڭعىلىق باسقان تۇنمەن بىرگە جۇرەگىندەگى اسىلىن تۇنشىقتىرىپ الۋدان ولەردەي قورقادى. ولاي ەتسە، بۇكىل ادامزات الدىندا جازىقتى بولماق.
كەيىپكەرىمىز نۇربولات ىسقاقوۆ سۋرەت الەمىنە كەزدەيسوق كەلگەن جان ەمەس. بويىن كەرنەگەن بۇلا سەزىم ءومىردىڭ ءوز سۋرەتتەرىن قاز- قالپىندا قاعازعا ءتۇسىرتىپ، كوڭىلدەگى كورىكتى ويدى كەنەپ بەتىنە ورگىزدى. اق پەن قارا الماسقان الاساپىران تىرشىلىكتىڭ الۋان ءتۇستى بوياۋلارى ساناسىندا سىزىلىپ، بالاعا ميراس بولعان بابا اماناتىن ونەر تىلىندە بولاشاققا جەتكىزۋدى ومىرلىك مۇراتىنا بالادى. قىسقا باققا قىزىعىپ، اتاقتى بولام دەپ ارپالىسقان جوق. ءومىر شىندىعىنا زارەدەي قيانات كەلتىرمەي، كورگەنى مەن تۇيگەنىن مولدىرەتە وتىرىپ بۋىرقانعان بوياۋلارعا اينالدىردى. قاستەيەۆتەن جالعاسقان قاسيەتتى مۇرا قالتارىستا قالماسا دەگەن تىلەك قىلقالام شەبەرىن دەگدار ونەردىڭ تۇڭعيىعىنا بويلاتا بەرىپتى. ونىڭ كەنەبىندە تاۋ مەن اسپان، ادام مەن تابيعات ءبىر- بىرىمەن بىتە قايناسىپ جاتادى. «نۇربولات ىسقاقوۆتىڭ پەيزاجدارىنىڭ تارتىمدىلىعى ونىڭ تابيعاتقا دەگەن ىستىق ىقىلاسىندا، شىنايى شىندىقتى كورە بىلۋىندە، ونى رومانتيكالىق اسپەكتىدە قابىلداي الۋىندا جاتىر. شىعارمالارىنان سۋرەتشىنىڭ ەموتسيالىق قابىلداۋى مەن كوڭىل كۇيىنە ساي سان قۇبىلعان كورىنىسىن كورۋگە بولادى. وي تولعامىنىڭ ەپيكالىلىعى اۆتوردىڭ جانى مەن جۇرەگىنەن شىققان قورشاعان ورتانىڭ ءاربىر تالشىعىنا دەگەن سۇيىسپەنشىلىگىمەن توعىسقان. تۇستىك قاتىناستارى بوياۋدىڭ جاتىقتىعى مەن ۇيلەسىمىنە قاراي ۇمتىلادى» دەيدى ونەرتانۋشىلار.
سۋرەتشىنىڭ قىلقالامىنان ورىلگەن سۇلۋ پەيزاجدارعا كوڭىل كوزىڭىزبەن بويلاساڭىز، اسپاننىڭ اسقاقتىعىن، تاۋلاردىڭ بيىكتىگىن، جىلقىنىڭ مىنەزىن، ادام كوڭىل كۇيىنىڭ سان تاراۋ ىرعاقتارىن، تۋعان جەردىڭ تۇمسا تابيعاتىن مۇلدە بولەك قىرىنان كورەسىز. تابيعاتپەن ۇيلەسىمدى سەزىمدى سەرىك ەتكەن اۆتور ەستەتيكالىق مۇراتىنا ساي تىڭ وبرازدار تابۋعا تالپىنادى. مىنا ءبىر كارتينادا ۇشار باسى اسپانمەن استاسقان ءتاڭىرتاۋدىڭ ەتەگىن بويلاعان الىپ جوتالاردىڭ كەرىم كەلبەتى كوز قارىقتىرادى. جادىراعان جاز ماۋسىمىن جىرلاعان جاسىل جايلاۋ جان جادىراتىپ، كوڭىل باۋرايدى. مىڭ اقىن جىرلاسا ءتىل جەتپەيتىن تابيعات- انانىڭ تاماشا كەيپىنە تاڭعالماسقا شاراڭىز جوق. وسى سۇلۋلىقتىڭ بارلىعىن سۋرەتشى ءوز جان- دۇنيەسى ارقىلى ۇيلەسىمدى تۇستەرمەن اسەمدەگەن. سۇلۋ قىزدىڭ كۇلكىسىندەي سىلدىراپ اققان تاۋ وزەنى كەنەپكە وزگەشە ورنەك سىيلاپ تۇر. قىلقالامنان ورىلگەن شوقان مەن مۇقاعالي سۇلباسى تاريح بەدەرىندە قاتتالعان قايتالانباس ساتتەردىڭ كەسكىن كەلبەتى دەپ ۇعارسىز. ال سوعىستان ورالماعان پەرزەنتىن زارىعا كۇتكەن زارلى انانىڭ قاسىرەتىن بەينەلەگەن كەيۋانا كەيپى زارلى زامانانىڭ زاپىرانىن ءدال انىقتاپ بەرەتىندەي. ول ويلانىپ وتىر.. .
كوڭىلدە سۇلباسى سىزىلعان سۇلۋلىقتى ءولتىرىپ الماي، قالايدا تازا قالپىندا ومىرگە اكەلۋ كەرەك. مي قابىعىن كەمىرگەن اۋىر ويلاردىڭ قۇرساۋىنان ارىلۋدىڭ جالعىز جولى سول عانا. ءتۇن تىنىشتىعىن بۇزعان الا كۇشىك قالجىراعان سۋرەتشىنىڭ ءحالىن ۇققانداي اۋىق- اۋىق ۇرەدى. تاڭ سەبەزگىلەي باستادى. ىشتەگى الاي- دۇلەي ارپالىس ساپ تيىلىپ، سوڭعى بوياۋ جاعىلدى. شىنايى سەزىممەن ءورىلىپ، سۋرەتشىنىڭ جۇرەگىنەن وتكەن كەزەكتى تۋىندى قولمەن ەمەس، جانمەن جازىلعان شىعارما دەپ اتالادى. قولمەن ەمەس، جانمەن جازىلعان دەپ ءبىلىڭىز.
ارمان وكتيابر، «ەگەمەن قازاقستان» الماتى