ءۇش جاسىنان بويىنان تىلسىم كۇشتى سەزىنگەن شىمكەنتتىك كورىپكەل ادامداردى ەرەكشە ادىسپەن ەمدەپ ءجۇر

  استانا. قازاقپارات - شىمكەنتتىك ەمشى دەرتىنە شيپا ىزدەپ كەلگەندەرگە اندەتىپ ەم قوندىرىپ ءجۇر. ءوزىن «كورىپكەل» سانايتىن  ۇلىقبەك سمانوۆتىڭ ەمى ءارۋاقتار ارقىلى جۇزەگە اسادى ەكەن.

بۇل تۋرالى ەۆرازيا ارناسى حابارلايدى.

«اللانىڭ امىرىمەن مەن ءتىرى ادامداردان ەمەس، ءارۋاقتاردان باتا العان اداممىن. ول ءارۋاق ماڭگى ءتىرى. قۇدايدىڭ كورمەيتىنى، ءارۋاقتىڭ جۇرمەيتىن جەرى جوق دەيدى عوي. ءارۋاق ءازىر دەيدى. مەن ءارۋاقتاردى انىق كورە الامىن. راس، سولار ارقىلى ايان الامىن. كىمدە قانداي اۋرۋ، وعان قانداي دەم سالۋ كەرەك» - دەيدى حالىق ەمشىسى ۇلىقبەك سمانوۆ.

ءيا، قازانشىنىڭ ءوز ەركى قايدان قۇلاق شىعارسا. ەمشىنىڭ ارەكەتى دە سوعان ۇقساس. اۋرۋىنان ايىعا الماي جۇرگەندەردى، دەرتىنە شيپا ىزدەپ كەلگەندەردى، بەدەۋلىك، پەرزەنت تىلەگەندەردى جيناپ الىپ، اينالدىرا دەم سالىپ ءجۇر. ولاردىڭ بارلىعىن ەمشى ادەيى جيناعان جوق، وزدەرى كەلگەن. ءتۇسىرىلىمدى پايدالانعان بىزدەر ءون بويىمىزدا جىن شايتاندار بار بولسا، الاستاتۋىن وتىندىك.

ۇلىقبەك- ەمشىلىك جولىن 18 جاستان تاڭداپتى. باسقا مۇمكىندىگى بولماعانىن ايتادى. سەبەبى، اتا باباسى ءوز زامانىنىڭ ايتۋلى باقسى بالگەرلەرى بولعان كورىنەدى. نەبارى ءۇش جاسىنان باستاپ تىلسىم كۇشتىڭ اسەرىن سەزە باستاعان ول بۇگىندە «اۋليە» دە اتانىپ ۇلگەردى. ادامداردى جەكە قابىلدايتىن بولمەدە كونەنىڭ كوزىندەي اسىل مۇرالارى ساقتاۋلى تۇر.

«تامىر ۇستامايمىن، قۇمالاق اشپايمىن. كورىپكەلدىك دەيدى. اللانىڭ، ءارۋاقتىڭ كورسەتكەن جەرىن ايتاتىن جەرىم بۇل مەنىڭ. وسى جەردە مەنىڭ بابالارىمنان قالعان قۇراندار، قانجارلار، ەسكى قوبىز، بۇرىنعى بابالارىمنان كەلە جاتقان نارسە مۇنىڭ بارلىعى» - دەيدى حالىق ەمشىسى ۇلىقبەك سمانوۆ.

جاي كۇندە الدىنان ادام قاراسى ۇزىلمەيتىن «كوكبۇلاقتىق» كورىپكەلگە كەزىندە الدەكىمدەر ءزاۋلىم ءۇي تۇرعىزىپ بەرىپتى. قازىر، مۇندا ول وتباسىمەن باقىتتى عۇمىر كەشىپ جاتىر.

جالپى، وڭتۇستىك وڭىردە ءازىز اۋليەلەر مەن قاسيەتتى ورىندار وتە كوپ. سولاردىڭ ءبىرى، ءارى ءتورت تاراپقا ايگىلىسى- اق بۋرا اتا اۋليەسى. ول قوجا احمەت ءياسساۋيدىڭ زامانداسى جانە شاكىرتى بولعان دەسەدى. بۇگىندە اۋليە اتانىڭ كەسەنەسى قازىعۇرت تاۋىنىڭ وڭتۇستىك باتىس بوكتەرىندە ورنالاسقان. قاسيەتتى ورىندى زيارات ەتىپ كەلۋشىلەر وتە كوپ. شىراقشى تورەبەك ايتبايەۆتىڭ ايتۋىنشا، ەلىمىزدەن بولەك، قىرعىزستان، وزبەكستان، تاجىكستان، رەسەي، ءتىپتى، گەرمانيا مەن يزرايلدەن تۋريستەر ءجيى كەلەدى ەكەن. كەسەنە ەكىنشى مارتە بوي كوتەرگەن.

 

«بۇل كەسەنەنى ەڭ ءبىرىنشى 1991 -جىلى كۇيىك اسىل تۇقىمدى قوي زاۋىتىنىڭ ديرەكتورى « ءالىپباي» دەگەن كىسى قىزىلوردادان سيليكات قىشتار الدىرىپ، سالدىرعان ەدى. ول كەسەنى 20  جىلداي تۇردى. كەيىنەن زياراتشىلاردىڭ كەلۋىنە بايلانىستى 2011 -جىلى قايتا سالعىزىپ، حالىقتىڭ يگىلىگىنە بەردى» - دەيدى «اقبۋرا اۋليە» كەسەنەسىنىڭ شىراقشىسى تورەبەك ايتبايەۆ.

 قازىعۇرتتىق جۋرناليست قۇرالبەك ەرگوبەك اقبۋرا اۋليەنى زەرتتەپ جۇرگەن جاننىڭ ءبىرى. جازۋشى «تىلسىم كۇشتىڭ يەسى» تۋرالى كوپتەگەن تاريحي دەرەكتەر قورىن جيناپتى. ءسويتىپ ونى جيناق ەتىپ شىعارعان. تاعى ءبىر كىتابى باسپادا ازىرلەنىپ جاتىر. ايتۋىنشا، تۇركىستان وڭىرىندە اقبۋرا دەپ اتالاتىن ءتورت كيەلى جەر بار ەكەن. ونىڭ اۋەلگىسى وسى مەكەن كورىنەدى.

«اقبۋرا اتانىڭ ءبىر ەرەكشەلىگى تاڭعى بامدات نامازىنىڭ ەكى باس سۇندەتىن وسى قازىعۇرتتىڭ باۋرايىندا وقىسا، ەكى باس پارىزىن تۇركىستاندا يا، بولماسا، مەككەدە وقىپ، ءتامامداپ كەلە بەرەتىن سونداي كەرەمەتى جوعارى اۋليە بولعان كىسى» - دەيدى جازۋشى، جۋرناليست قۇرالبەك ەرگوبەك.

مۇندا قىسى جازى زيارات ەتىپ كەلۋشىلەر ۇزىلمەيدى. ولار ەڭ الدىمەن اتانىڭ جاتقان جەرىنە شىراق جاعادى. جانە ونى اركىم وزىنشە جاقسىلىققا جوريدى.

«شىراق جاققان كەزدە ءوزىڭىزدىڭ ىشكى دۇنيەڭىزبەن بىرگە بۇكىل جاقسى نارسەلەردى ويلانىپ وتىراسىز. سول نارسەلەردىڭ بارلىعىن اللا تاعالا بىرەۋ عوي سول ورىندايدى. ءوزىڭنىڭ تىلەگىڭدى سىرتقا شىعارما دەيدى، ءوزىڭ ىشىڭنەن نيەتتەن دەيدى. نيەتتەنگەن نارسە شىراقپەن كەلە بەرەدى» - دەيدى حالىق ەمشىسى قىزبالا كەنەنبايەۆا.

تىلسىم كۇشتىڭ اسەرىنە بەرىلگەن ءۇرزيا اپا اۋليە- امبيلەر جاتقان جەرلەردى ءجيى ارالايدى ەكەن. ءوزى دە ارا تۇرا بالالارعا دەم سالاتىن كورىنەدى. كيەلى وتىرار جەرىندە تۇراتىن اجەي اقبۋرا كەسەنەسىنە العاش رەت تابىن تىرەدى. ايتۋىنشا مۇندا ونى تىلسىم كۇش الىپ كەلگەن.

«اناۋ اۋىلدان شىققاندا كادىمگى دەنەمدى سىلكىدى بۇل كىسى. سودان دەنەم جەڭىلدەپ، ايقايلاپ وتىردىم. ءسويتىپ، وتىراردان كەلە جاتقانىمدا ادامداردى قورقىتىپ قويدىم. دەنساۋلىعىم جاقسى بولادى، بالا شاعام جاقسى بولسىن دەيمىن. سونداي جولمەن ءجۇرمىن مەن» - دەيدى وتىرار اۋدانىنىڭ تۇرعىنى ءۇرزيا ۋاليەۆا.

اڭىز اڭگىمەلەردە «اۋليە اتا» اق بۋراسىنا ءمىنىپ الىپ، قۇستاي ۇشقان كورىنەدى. «اق بۋرا اۋليە» اتانىپ كەتكەنى دە سوندىقتان- مىس. كەيىن ول كىسى دۇنيە سالعاندا، بۋراسىنىڭ كوز جاسى كول بولىپ، قايتا تۇرماي تاسقا اينالعان دەسەدى. ال، سول تاستىڭ قۋىسىنان شىعىپ جاتقان ءمولدىر بۇلاق بۇگىندە ءتۇرلى ەمدىك قاسيەتكە يە دەلىنگەن ەل اۋزىنداعى اڭىزدا.

اقبۋرا اۋليە كەسەنەسىنە كەلگەن زياراتشىلاردىڭ بارلىعى ۇيلەرىنە بوس قايتقىلارى كەلمەيدى. سەبەبى، ولار قولدارىنداعى ىدىسقا وسىنداعى جەر استىنان جارىپ شىققان ءمولدىر بۇلاقتان سۋ العىلارى كەلەدى. ويتكەنى، بۇلاق سۋى كەيبىر ادامنىڭ بويىنداعى مىڭ ءبىر ەمگە شيپا كورىنەدى. سول ءۇشىن بارلىق زياراتشىلار وسى سۋدى ۇيلەرىنە الىپ قايتۋعا قۇمار كەلەدى

ءارۋاقتان باتا الىپ، ەمشى اتانعان، جاراتۋشىمەن تىلدەسىپ، ايدى اسپانعا شىعارعان جانداردىڭ تىرشىلىگى وسىنداي. ال، اتى اڭىزعا اينالعان اقبۋرا اۋليەنىڭ تىلسىم قۇدىرەتى باسقاشا. سەبەبى قاسيەت قونعان جەرلەردە مەن قاسيەتتىمىن دەيتىندەردىڭ قاتار جۇرەتىنى بار.

Stan.kz