ەلباسى ارىستانبەك مۇحامەدي ۇلىنا ءبىرقاتار ناقتى تاپسىرما بەردى
كەزدەسۋ بارىسىندا مينيسترلىك قىزمەتىنىڭ ماڭىزدى باعىتتارى، سونىڭ ىشىندە كينەماتوگرافياعا قاتىستى زاڭنامانى ودان ءارى جەتىلدىرۋ جانە تۋريزم مەن سپورت سالالارىن دامىتۋ شارالارى تالقىلاندى.
مادەنيەت جانە سپورت ءمينيسترىنىڭ مالىمەتىنە سايكەس، قازىرگى ۋاقىتتا «كينەماتوگرافيا تۋرالى» زاڭ جوباسى پارلامەنتتىڭ قاراۋىندا جاتىر. بۇل زاڭ جوباسى ۇلتتىق كينونى قالىپتاستىرۋ ءىسىن قولداۋ تەتىكتەرىنىڭ تيىمدىلىگىن ارتتىرۋعا، قازاقستاننىڭ فيلمدەرىن، سونداي- اق شەتەلدىڭ جەتەكشى كومپانيالارىمەن بىرلەسىپ تۇسىرگەن كينو ونىمدەرىن حالىقارالىق نارىققا كەڭ كولەمدە شىعارۋعا باعىتتالعان.
سونىمەن قاتار، ا. مۇحامەدي ۇلى مەملەكەت باسشىسىنا 2023 -جىلعا دەيىنگى تۋريزمدى دامىتۋ جونىندەگى مەملەكەتتىك باعدارلامالاردىڭ ازىرلەنۋ بارىسى جانە «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس سالتىن ارتتىرۋ» اتتى جولداۋداعى دەنە شىنىقتىرۋ- ساۋىقتىرۋ كەشەندەرىن سالۋعا قاتىستى تاپسىرمانىڭ ورىندالۋى جونىندە باياندادى.
كەزدەسۋ قورىتىندىسى بويىنشا قازاقستان پرەزيدەنتى ءبىرقاتار ناقتى تاپسىرما بەردى.