قاراعاندى وبلىسىنىڭ اكىمى اي سايىن قانشا جالاقى الاتىنىن ايتتى

قاراعاندى. قازاقپارات - قاراعاندى وبلىسىنىڭ اكىمى ەرلان قوشانوۆتىڭ ايلىق اقىسى ق ر ۇكىمەتىنىڭ ساياسي مەملەكەتتىك قىزمەتكەرلەردىڭ جالاقىسىن ەسەپتەۋ تۋرالى قاۋلىسىنا ساي ەسەپتەلەدى،

 دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

«جالاقى تاعايىنداعان كەزدە مەملەكەتتىك قىزمەتتەگى ەڭبەك ءوتىلى دە ەسكەرىلەدى. ايماق باسشىسىنىڭ ەڭبەك ستاجى 20 جىلدان اسادى. ەڭبەك ءوتىلىن ەسەپكە العاندا، ايىنا 967 مىڭ 672 تەڭگە شىعادى. مىندەتتى سالىقتىق شەگەرۋلەر مەن اۋدارىمداردى ەسەپتەگەندە، قولىنا 786 مىڭ 642 تەڭگە الادى» دەلىنگەن حابارلامادا.

 سونىمەن قاتار، ايماق باسشىسى وزىنە قوسىمشا تولەمدەر مەن سىياقىلار جازبايتىنىن جانە المايتىنىن مالىمدەدى. اپپارات قىزمەتكەرلەرى جانە باسقا دا مەملەكەتتىك قىزمەتكەرلەر قاراجاتتىڭ ۇنەمدەلۋى ەسەبىنەن سىياقى الادى.

 «ادام جاقسى جۇمىس ىستەسە، مۇنداي ارتىقشىلىقتار بەرىپ وتىرعاندى قۇپتايمىن»، - دەدى ەرلان قوشانوۆ.

وبلىس اكىمىنە جالاقىسى جەتە مە جانە ونى قايدا جۇمسايدى؟ اكىمنىڭ جۇمىسباستىلىعىنا بايلانىستى، وتباسىلىق بيۋدجەتپەن اينالىسۋعا ۋاقىتى جوق. ول قاراجاتتى جۇبايى باسقاراتىنىن جەتكىزدى.

 «كوپ وتباسىلارداعىداي، تابىسىمىز نەگىزىنەن ازىق- تۇلىككە، كوممۋنالدىق قىزمەتتەردى تولەۋگە، ۇيگە قاجەتتى زاتتار، كيىم الۋعا جۇمسالادى. قاجەت بولعان جاعدايدا ەمدەلۋگە كەتەدى»، - دەپ تۇيىندەدى ءسوزىن ەرلان قوشانوۆ.

 سونداي- اق، ەرلان قوشانوۆ «جالاقى از با، الدە كوپ پە؟» دەگەن سۇراققا دا جاۋاپ بەردى.

«ماعان جالاقىنى مەملەكەت تاعايىندايدى جانە تولەيدى. ەسەپتەۋلەر زاڭنامالىق نورماعا ساي جۇرگىزىلەدى. سوندىقتان، از نەمەسە كوپ الام دەپ، جەكە پىكىرىمدى ءبىلدىرۋ ادەپسىزدىك بولار. ەگەر مەن جەكەمەنشىك سەكتوردا جۇمىس ىستەسەم، ول جەردە مەن جۇمىس بەرۋشىگە ءوز پىكىرىمدى جانە پوزيتسيامدى ايتا الار ەدىم. الايدا، مەملەكەتتىك قىزمەتكەر بولعاندىقتان، مۇندا، تاعى قايتالاپ ايتايىن، ءوز جەكە پىكىرىمدى ورتاعا سالۋ ادەپسىزدىك بولادى. ماعان جانە مەنىڭ جۇمىسىما باعانى پرەزيدەنت پەن وبلىس تۇرعىندارى بەرەدى»، - دەپ اتاپ ءوتتى اكىم.