كەز كەلگەن جۇيەدە ادامداردىڭ ءرولى اسا ماڭىزدى - برايان فيلبين

استانا. قازاقپارات - استانا مەملەكەتتىك قىزمەت حابى باسقارۋشى كوميتەتىنىڭ ءتوراعاسى ءاليحان بايمەنوۆ كانادا كىرىستەر اگەنتتىگىنىڭ اۋديت، باعالاۋ جانە تاۋەكەلدەر جونىندەگى كوميسسارىنىڭ ورىنباسارى، اۋديت جونىندەگى باس اتقارۋشى ديرەكتورى برايان فيلبينمەن كەزدەستى، دەپ حابارلايدى قازاقپارات.

حاب باسپا ءسوز قىزمەتىنىڭ حابارلاۋىنشا، تاراپتار استانا حابىنا قاتىسۋشى ەلدەردىڭ مەملەكەتتىك قىزمەتشىلەرىنە ارنالعان اۋديت، باعالاۋ جانە تاۋەكەلدەردى باسقارۋ جۇيەسى بويىنشا بىرلەسكەن ترەنينگتەر مەن سەمينارلار وتكىزۋ مۇمكىندىگىن تالقىلادى.

«مەملەكەتتىك ورگانداردىڭ اۋديت جانە باعالاۋ جۇيەسى - مەملەكەتتىك باسقارۋ تيىمدىلىگىن ارتتىرۋدىڭ ماڭىزدى فاكتورى. بۇل - ايماق ەلدەرىندە ءالى دە جەتىلدىرۋدى قاجەت ەتەتىن باعىتتاردىڭ ءبىرى. وسى تۇرعىدان العاندا، كانادا تاجىريبەسى ۇلكەن قىزىعۋشىلىق تۋعىزىپ وتىر»- دەپ اتاپ ءوتتى ءاليحان بايمەنوۆ.

ءوز كەزەگىندە برايان فلينبين مىرزا مەملەكەتتىك قۇرىلىمدار قىزمەتىن باعالاۋ جونىندە وي ءبولىستى.

«مەملەكەتتىك قۇرىلىمدار قىزمەتىن باعالاۋدا ەڭ ماڭىزدىسى - تاۋەكەلدەردى جانە ادامي رەسۋرستاردى باسقارۋدى باعالاۋ. ويتكەنى، كەز كەلگەن جۇيەدە ادامداردىڭ ءرولى اسا ماڭىزدى. بارلىق وزگەرىستەردى ادامدار جۇزەگە اسىرادى، سوندىقتان قىزمەتكەرلەردى ساپالى ىرىكتەۋ جانە باسقارۋ - نەگىزگى فاكتور»، - دەدى ول.

تاراپتار ءوزارا ىنتىماقتاستىقتىڭ كەلەسى ناقتى قادامدارىن ايقىندادى.

ايتا كەتۋ كەرەك، قازىرگى تاڭدا استانا حابىنا قاتىسۋشى ەلدەر سانى 40 قا جەتكەن. ونىڭ ىشىندە ە ى د ۇ، ت م د، كاۆكاز، ورتالىق ازيا جانە ا س ە ا ن ەلدەرى دە بار.