استانالىق كاسىپكەر جىلىجاي كولەمىن ۇلعايتپاق
وسىعان وراي كاسىبىنەن ءناسىپ تاۋىپ وتىرعان بيزنەس يەلەرىنە قولداۋ كورسەتىلىپ، بەرىلەتىن نەسيە كولەمى دە ارتادى. ەلوردا تۇرعىنى نۇرجان توقتاربەك وسىدان ەكى جىل بۇرىن جىلىجاي شارۋاشىلىعىمەن اينالىسۋعا بەل بۋدى. وسىلايشا ءىنىسى ەكەۋى ارنايى جوسپار قۇرىپ، كوكتەم مەزگىلىندە جىلىجاي قۇرىلىسىن قولعا الدى. قاجەتتى اقپاراتتى عالامتور بەتتەرىندە ىزدەپ، شارۋاشىلىقتى دامىتۋ جولدارىن جان- جاقتى زەرتتەدى.
نۇرجان توقتاربەك، جىلىجاي يەسى:
- شىنى كەرەك، 10-20 ك گ شىقسا، سوعان قاناعات دەپ ويلادىق. وتىرعىزعاننان كەيىن بىزدە قيار دا، قىزاناق تا كوپ بولدى. قياردان كۇنىنە 40 ك گ جيناپ وتىردىق، قىزاناقتان 30 ك گ. ونىڭ كوبىسىن جيناپ ۇلگەرمەدىك، تۋىستارىمىز كەلىپ كومەكتەسىپ وتىردى. العاشقى كەزدە ءونىمدى ساتۋ ءۇشىن عالامتورعا جارناما جاريالانعان. كەيىن ءتۇرلى ساۋدا ورتالىقتارىنىڭ يەلەرى قىزىعۋشىلىق ءبىلدىرىپ، جىلىجاي جۇمىسىمەن تانىستى. بۇگىندە كەلىسىم جاسالعان، دۇكەندەردى قيار جانە قىزاناقپەن تولىق قامتاماسىز ەتىپ وتىرمىز.بولاشاقتا جىلىجايىمىزدى دا ۇلكەيتكىمىز كەلەدى. وعان نەسيە الىپ باستاۋعا دايىن وتىرمىز.
جىلىجايلاردى دامىتۋ - بۇگىنگى كۇننىڭ وزەكتى ماسەلەسى. سەبەبى وزگە ەلدەن جەتكىزىلگەن ءونىم باعاسى ەل تۇرعىندارى ءۇشىن قىمباتقا تۇسەتىنى انىق. ءوز كەزەگىندە جاس كاسىپكەر نۇرجان توقتاربەك تە كەلەسى جىلى ءونىم كولەمىن ارتتىرىپ، وتاندىق نارىقتى ساپالى تاۋارمەن قامتاماسىز ەتۋدى كوزدەيدى.
www.24.kz