وزبەكستاندا قازاقستاندىق ونىمدەرگە سۇرانىس جوعارى
قۇرىلىس زاتتارىن ايتپاعاننىڭ وزىندە بىزدەن ازىق- تۇلىك پەن تۇرمىستىق تەحنيكالار دا كوپتەپ تاسىمالدانادى. ويتكەنى كورشى ەلدىڭ نارىعىندا قازاقستاندا جاسالعان تاۋارلارعا دەگەن سۇرانىس كوپ.
«وعان قوسا، باعاسى قالتاعا قونىمدى جانە ساپاسى جوعارى»، - دەيدى ساتۋشىلار. قازاقستان مەن وزبەكستان اراسىنداعى ءبىر عانا «جىبەك جولى» شەكارا بەكەتىنەن تاۋلىگىنە ارلى-بەرى 30 مىڭعا جۋىق ازامات قاتىنايدى ەكەن. ولاردىڭ باسىم بولىگى قازاقستاننان تۇرمىستىق تەحنيكالار مەن ازىق-تۇلىك تاسىمالداپ جاتىر. تيىسىنشە وزبەكستاننان جەمىس-جيدەك بەرى قاراي وتكىزىلەدى.
جالپى جىل باسىندا وزبەكستان كەز كەلگەن ازاماتقا شەكارا ارقىلى قالاعانىنشا تاۋار الىپ وتۋگە رۇقسات بەرگەن بولاتىن. الايدا قازىرگى تاڭدا ءبىرقاتار شەكتەۋلەر قويىلعان. ياعني قولمەن تاسىمالداناتىن جۇكتىڭ سالماعى 10 كەلىدەن اسپاۋى كەرەك. تيىسىنشە ايىنا ءبىر رەت تۇرمىستىق تەحنيكانى الىپ وتۋگە رۇقسات ەتىلگەن.
«جالپى وزبەكستاننىڭ ىشكى نارىعىندا قازاقستاندا جاسالعان ونىمگە دەگەن سۇرانىس جوعارى»، - دەيدى ساتۋشىلار. ويتكەنى ۇلى دالا ەلىندە جاسالعان وتاندىق ءونىم باسەكەگە قابىلەتتى.
«وزبەكستاننىڭ ىشكى نارىعىندا قازاقستاندا جاسالعان ونىمگە دەگەن سۇرانىس ارتىپ كەلەدى. بۇل ءبىزدىڭ قازىرگى پرەزيدەنتتەرىمىزدىڭ جۇرگىزىپ وتىرعان ساياساتىنىڭ ناتيجەسى دەپ بىلەمىن. شەكارا اشىلىپ، قازاقستاندىق تاۋارلار وزبەكستان نارىعىنا كوپتەپ جەتكىزىلە باستادى. ءبىزدىڭ دۇكەندە دە قازاقستاندىق تاۋارلار ساتىلىپ جاتىر. جەرگىلىكتى تۇتىنۋشىلار تالابىنان شىعاتىن تاۋارلار. دەمەك وزبەكستان مەن قازاقستان اراسىندا ساۋدا-ساتتىق دەڭگەيى ارتتى دەۋگە نەگىز»، - دەيدى كاسىپكەر سۋرات ابيدوۆ.
جالپى، وزبەكستاندا اۋە جولى ارقىلى باج سالىعىنسىز تاسىمالداناتىن جۇكتىڭ مولشەرى 2 مىڭ ا ق ش دوللارىنان اسپاۋى كەرەك. تەمىرجول مەن وزەن ارقىلى بۇل كورسەتكىش مىڭ دوللاردى قۇرايدى. جاياۋ جۇرگىنشىلەردىڭ شەكارا بەكەتتەرى ارقىلى قولمەن الىپ وتەتىن جۇگى 300 دوللار كولەمىندە بولۋى كەرەك. بۇل - كورشى ەلدىڭ ىشكى تالابى. قالاي دەسەك تە، قازاقستان مەن وزبەكستان اراسىنداعى شەكاراداعى ءبىرقاتار كەدەرگىلەردىڭ الىنىپ تاستالۋى بارىس-كەلىستى ارتتىرىپ قانا قويماي، ساۋدا-ساتتىقتىڭ جاقسارۋىنا نەگىز بولىپ وتىر.