پۋتين ورتالىق ازياداعى العاشقى اتوم ەلەكتر ستانسياسىنىڭ قۇرىلىسىن باستاۋعا قاتىسادى
بۇل تۋرالى رەسەيلىك اقپارات اگەنتتىكتەرى حابارلادى.
العاشقى اتوم ەلەكتر ستانسياسىنىڭ قۇرىلىسىن بۇحارا قالاسىنان سولتۇستىك- شىعىسقا قاراي 25 شاقىرىم جەردەگى توداكول سۋ قويماسى اۋدانىندا سالۋ جوسپارلانعان. قۇرىلىس الاڭىن ىزدەستىرگەندە ينفراقۇرىلىمدارعا جاقىن، سۋى بار جانە سەيسميكالىق جاعىنان تىنىش ايماق بولۋى ەسەپكە الىنعان.
رەسەيلىك «روس اتوم» كومپانياسى ەكى ەنەرگوبلوكتان تۇراتىن كەشەن قۇرىلىسىن سالۋدى جوسپارلاپ وتىر. اتوم ەلەكتر ستانسياسىنىڭ قۋاتى 2300 مۆت بولماق، ياعني وزبەكستانعا قاجەتتى ەلەكتر ەنەرگياسىنىڭ 20 پايىزعا جۋىعىن بەرە الادى. بيلىكتىڭ ەسەبى بويىنشا، اەس- ءتىڭ ارقاسىندا جىلىنا 4 ميلليارد تەكشە مەتر گازدى ۇنەمدەپ، 600 ميلليون دوللارعا دەيىن پايدا تابۋعا مۇمكىندىك بار.
اەس سالۋعا سىن ايتۋشىلار ونىڭ ورنىنا وزبەكستان كۇننەن قۋات الاتىن ەلەكتر ستانسياسىن تۇرعىزسا بولار ەدى دەپ سانايدى. وزبەكستان سۋبتروپيكالىق ايماقتا ورنالاسقاندىقتان مۇندا كۇن باتەرەيالارى پانەلدەرىن قويۋعا جەر كولەمى ارتىعىمەن جەتەدى، ءبىراق ولاردىڭ قۇنى اەس قۇرىلىسىن سالۋعا جانە ونى ۇستاۋعا كەتەتىن شىعىنداردان ارتىپ كەتەدى.
اتوم ەلەكتر ستانسياسى قۇرىلىسىن باستاۋ ءراسىمىن رەسەي پرەزيدەنتى پۋتيننىڭ وزبەكستانعا ساپارىنا ورايلاستىرىپ بەلگىلەگەن.
www.azattyq.org