قازاقستاندىق ۆەلوشاباندوز ارگەنتيناداعى وليمپيادانىڭ توپتىق جارىسىندا ءبىرىنشى كەلدى

استانا. قازاقپارات - قازاقستاندىق ۆەلوشاباندوز گلەب برۋسەنسكي ارگەنتينادا ءوتىپ جاتقان جاس وسپىرىمدەر وليمپياداسىندا توپتىق جارىستا ءبىرىنشى كەلدى، دەپ حابارلايدى قازاقپارات ۇلتتىق وليمپيادا كوميتەتىنىڭ باسپا ءسوز قىزمەتىنە سىلتەمە جاساپ.

ول 63,9 شاقىرىمدىق قاشىقتىقتى 1:30:58 ۋاقىتىمەن ءجۇرىپ ءوتتى. تاعى ءبىر سپورتشىمىز ەۆگەني فەدوروۆ 1:31:03 ۋاقىتىمەن سەگىزىنشى بولىپ مارەگە كەلدى. وسىلايشا گلەب 100، ەۆگەني 20 ۇپاي ەنشىلەدى.

«جارىس قيىن بولدى. بارلىعى شابۋىلداۋعا تىرىستى. ءبىز بار كۇشىمىزدى جۇمساپ، العا سۋىرىلىپ شىققىسى كەلگەندەردى توقتاتۋعا ۇمتىلدىق. جارىستىڭ سوڭىنا قاراي ليۋكسەمبۋرگ جانە پولشا سپورتشىلارىمەن العا شىقتىق. ءبىراق پولشالىق تەز شارشاپ قالىپ، ليۋكسەمبۋرگ شاباندوزىمەن جاقسى جۇمىس ىستەپ، توپتان ۇزاپ كەتتىك. مارەدە مەن وعان قاراعاندا جىلدام بولدىم»، - دەدى گلەب برۋسەنسكي.

ەۆگەني فەدوروۆ جارىس تۋرالى ويىن ءبىلدىردى.

«الدىمەن مەن العا سۋىرىلىپ شىقتىم. ودان كەيىن كوماندالاسىم گلەب برۋسەنسكي سونداي ارەكەت جاسادى. ال مەن بولسام، توپتىڭ جىلدامدىعىن باسەڭدەتۋگە. ول ءبىرىنشى بولىپ مارەگە جەتسە، مەن شامامەن التىنشى-جەتىنشى بولدىم»، - دەدى ەۆگەني فەدوروۆ.

ۆەلوشاباندوزدار ءالى ءۇش كۇن جارىسادى. سولاردىڭ قورىتىندىسى بويىنشا جاس وسپىرىمدەر وليمپياداسىنىڭ جەڭىمپازدارى مەن جۇلدەگەرلەرى بەلگىلى بولادى.