ارالاردىڭ بارلىعى بال جيناي بەرمەيدى - ومارتاشى

 قىزىلوردا. قازاقپارات -  قىزىلوردا وبلىسىنىڭ جاڭاقورعان اۋدانى تومەنارىق اۋىلىندا تۇراتىن ومارتاشى پاۆەل نەمتسوۆ ارالاردىڭ بارلىعى بال جيناي بەرمەيتىنىن ايتادى.

 ارالار تىرشىلىگىنە زەر سالساڭىز، ولاردىڭ كاسىبىنە قاراي ءتۇرلى بولاتىنىن كورەمىز، دەپ حابارلايدى قازاقپارات ءتىلشىسى.

 

ومارتاشىنىڭ بۇل كاسىپتى قولعا العانىنا 16 جىلدىڭ ءجۇزى بولدى. ەرتەدە ناعاشى اتاسى گوردەي جيلو ارا ءوسىرۋدىڭ قىرى- سىرىن مەڭگەرگەن ەكەن. ودان بەرىدە ءوز اكەلەرى دە وسى تىرشىلىكتى قولعا العان. پاۆەل باۋىرى يۆان ەكەۋى سونداي كاسىپتى جاستايىنان كورىپ ءوستى. كەيىن ەسەيگەن سوڭ ومارتا شارۋاشىلىعىن ءوز قولدارىنا الدى. بۇگىندە ارا وسىرۋگە شىنداپ دەن قويىپ، سول باعىتتا تىنباي ەڭبەك ەتىپ كەلەدى.

ولار قازىر وڭىرگە بەلگىلى ومارتاشىلار قاتارىندا سانالادى. ونىمدەرىنە كورشىلەس اۋدانداردان ءجيى سۇرانىس ءتۇسىپ جاتادى. بال ءونىمى الماتى مەن استاناعا دەيىن دە جىبەرىلەدى. ءتىپتى، اقتاۋ قالاسىنان ارنايى الدىرتىپ وتىرعاندار بار.

«بۇگىندە ءبىز قىسقى مەزگىلگە دايىندالىپ جاتىرمىز. قازىر ومارتانى ۇيگە الىپ كەلدىك. جازدا ورماندى القاپتارعا جەتكىزەمىز. توعاي اراسى، باۋ- باقشالار ارانىڭ بال جيناۋىنا مۇمكىندىك جاسايدى. گۇلدەر مەن شوپتەر وسكەن دالادا ومارتانى ورنالاستىرامىز»، - دەيدى پاۆەل نەمتسوۆ.

قازىر اۋلا ىشىندە ارالار ورنالاسقان 50-دەن استام جاشىك بار. ومارتاشى ولاردىڭ ءاربىرىن نازاردان تىس قالدىرمايدى. ويتكەنى، اتالمىش جاندىككە بارىنشا قامقورلىق قاجەت. وزىنە جاسالعان قامقورلىق ارقىلى ولار دا قالىپتى دەڭگەيدە بال جيناي الادى.

«بال - بارلىق اۋرۋعا ەم ەكەنى بەلگىلى. ول مەديتسينادا ناقتى دالەلدەنگەن. ءتىپتى، ولاردىڭ ۇياشىقتارىن دا كادەگە جاراتۋعا ابدەن بولادى. ول حالىق ەمىندە قولدانىلىپ جاتادى. جالپى، بالدىڭ قۇرامىندا پايدالى ەلەمەنتتەر كوپ. ال ارانىڭ دەنەسىندە حيميالىق زاتتار بار. بالدى قىستا اۋىرىپ قالعاندا پايدالانۋعا بولادى. بالدىڭ اسقازانعا دا جۇرەككە دە پايداسى زور»، - دەيدى ومارتاشى پاۆەل.

ومارتاشىلىق كاسىپتى مەڭگەرگەن وتباسى كوكتەم شىعا سالىسىمەن توعايلى ايماقتارعا بارادى. وندا شەڭگەلى مول اۋماقتار تاڭدالادى. جانتاق پەن جوڭىشقا گۇلدەگەن تۇستا ارالاردى ەگىستىك القاپتارىنا جىبەرىپ الماۋ قاتاڭ قاداعالانادى. پاۆەل كاسىبىن جەتىلدىرۋ جولدارىن ىزدەيدى. سول ماقساتتا الداعى ۋاقىتتا گەرمانياعا بارىپ قايتۋعا نيەتتەنىپ وتىر. ومارتاشى ءوز قۇپياسىمەن دە ءبولىستى.

نەگىزىندە ەركەك ارالار بال ءوندىرۋشى بولىپ تابىلادى. ولار جۇمىسشى ارادان ءسال ۇلكەن، قۇيرىق جاعى جۇمىر بولادى. اياعىندا گۇل توزاڭىن جينايتىن سەبەتى جانە بالاۋىز شىعاراتىن بەزى بولادى ەكەن. ءدامى ءتىل ۇيىرەتىن بالدى جينايتىن سولار كورىنەدى. ولاردىڭ بالىنىڭ ءيىسى اڭقىپ تۇرادى. سونداي- اق، بال بەرەتىن ارالاردان بولەك تۇقىم باساتىنى جانە ۇيا تازارتۋشىلارى، وزگە ارالاردى باعىپ- قاعاتىنى دا بولادى ەكەن.