ۇلتتار ليگاسى: قازاقستان مەن لاتۆيا تەڭ ءتۇستى

استانا. قازاقپارات - كەشە فۋتبولدان ۇلتتار ليگاسىندا ءۇشىنشى تۋر ويىندارى وتكىزىلدى. اتالمىش دوپ دوداسىندا د ديۆيزيونى ءبىرىنشى توبىندا سىنعا تۇسەتىن قازاقستان قۇراماسى سىرت الاڭدا لاتۆيامەن كەزدەستى، دەپ حابارلايدى قازاقپارات ءتىلشىسى.

لاتۆيا قۇراماسى وڭاي قارسىلاس سانالمايدى. بۇعان دەيىن تالاي قارسىلاسىنا تەگەۋرىندى قارسىلىق كورسەتە ءبىلدى. دەسە دە ۇلتتار ليگاسىندا ءوز جانكۇيەرلەرىن قۋانتا الماي كەلەدى.

العاشقى ەكى كەزدەسۋدە نەبارى ءبىر ۇپاي عانا جيناي الدى. ءبىزدىڭ جىگىتتەر دە ءدال سونداي جاعدايدى باستان وتكىزىپ وتىر. ول جايىندا بۇعان دەيىن حابارلاعان ەدىك. سوندىقتان ەكى قۇراما ءۇشىن دە بۇگىنگى ويىن اسا ماڭىزدى ەدى. ەسەپتى العاشقى بولىپ ءبىزدىڭ قۇراما اشتى. بۇل ويىننىڭ 16-مينۋتى بولاتىن. سول قاناتتان دميتريي شومكو الاڭ يەلەرى قاقپاسىنا اۋەلەتە دوپ بەرگەن ەدى. بۇل مۇمكىندىكتى قازاقستاندىق جارتىلاي قورعاۋشى باقتيار زاينۋتدينوۆ پايدالانىپ، گول سوعىپ كەتتى. بۇدان كەيىن دە ءبىزدىڭ جىگىتتەر الاڭ يەلەرى قاقپاسى ماڭىندا شابۋىلدى كۇشەيتە ءتۇستى. 26-مينۋتتا يسلامبەك قۋات ايىپ الاڭى ماڭىندا قاقپاعا دوپ باعىتتاعان ەدى. ونى لاتىش قاقپاشىسى اندريس ۆانين ارەڭ سىرتقا شىعارىپ ۇلگەردى. قازاقستان قۇراماسىنىڭ العاشقى كەزەڭدە ەسەپتى ۇلعايتۋعا تىرىستى. دەگەنمەن وعان لاتىشتار دا جاۋاپ بەرىپ، شابۋىلعا شىعۋدى ۇمىتا قويعان جوق.

ءبىزدىڭ قاقپا ماڭىندا قاۋىپتى ساتتەر بولىپ جاتتى. ەكىنشى كەزەڭدە دە ءبىزدىڭ جىگىتتەر العا قاراي ەنتەلەي ءتۇستى. ءبىزدىڭ فۋتبولشى ەۆگەنيي پوستنيكوۆ 48-مينۋتتا گول سوعاتىن تاماشا مۇمكىندىكتى پايدالانا المادى. لاتىش قورعاۋشىلارى ءوز ايىپ الاڭىندا ورەسكەل قاتەلىك جىبەرىپ العان ەدى. سول ساتتە ەۆگەنيي پوستنيكوۆ ۇرىمتال ورىندا تۇردى. دەسە دە ونىڭ قاقپاعا باعىتتاعان دوبى دىتتەگەن ماقساتىنا جەتە العان جوق. ال 63-مينۋتتا باۋىرجان يسلامحاننىڭ تەپكەن دوبى قاقپادان جوعارى ءتيدى. بۇدان كەيىنگى ساتتەردە ويىن دەڭگەيى تەڭەسكەندەي بولدى. ال 74-مينۋتتا ابزال بەيسەبەكوۆ گول سوعاتىن تاماشا مۇمكىندىكتى ءمۇلت جىبەردى. وعان رومان مۇرتازايەۆ اۋەلەتە ادەمى پاس شىعارىپ بەرگەن ەدى. بۇل ساتتە ابزال بەيسەبەكوۆ لاتىش قاقپاشىمەن بەتپە- بەت شىقتى.

 ەكىنشى كەزەڭدە الما- كەزەك شابۋىل كورىنىس تاپقانىمەن ويىن ەسەبى وزگەرگەن جوق. ەسەپ 1:1. بۇل توپتاعى گرۋزيا اندوررانى 3:0 ەسەبىمەن تىزە بۇكتىردى. ءۇش تۋردان كەيىن توعىز ۇپاي جيناعان گرۋزيا كوش باسىندا كەلەدى. قالعان ءۇش قۇرامانىڭ ەنشىسىندە ەكى- ەكىدەن ۇپاي بار. ءار توپتان ءبىرىنشى ورىن العان قۇرامالار كەلەسى فۋتبول ماۋسىمىندا ءبىر ليگا جوعارى ويناۋعا مۇمكىندىك الادى. ءبىزدىڭ قۇراما بۇعان دەيىن استانادا گرۋزياعا 0:2 ەسەبىمەن ەسە جىبەرسە، ودان كەيىن سىرت الاڭدا اندوررامەن 1:1 ەسەبىمەن تەڭ ءتۇستى. ەندى قازاقستان قۇراماسى 16 قازاندا ءوز الاڭىندا اندوررا قۇراماسىن قابىلدايدى.