ەلىمىزدە كەيبىر دارىگەرلەر زەينەتكە ەرتە شىعۋى مۇمكىن

استانا. قازاقپارات - ق ر دەنساۋلىق ساقتاۋ مينيسترلىگىنىڭ جاۋاپتى حاتشىسى بولات توكەجانوۆ «حالىق دەنساۋلىعى مەن دەنساۋلىق ساقتاۋ جۇيەسى» كودەكسى جوباسىنىڭ تۇجىرىمداماسىن ءتۇسىندىرىپ بەردى، دەپ حابارلايدى قازاقپارات ءتىلشىسى.

 «فارماتسيەۆتتەردىڭ زەينەتكە جەڭىلدەتىلگەن جولمەن شىعۋى تۋرالى: دەنساۋلىق ساقتاۋ جۇيەسىندەگى جاڭا كودەكستىڭ زاڭ جوباسىنىڭ تۇجىرىمداماسىندا الەۋمەتتىك مارتەبەنى قورعاپ، مەديتسينالىق قىزمەتكەرلەردىڭ ابىرويىن ارتتىرۋ ءۇشىن بەكىتىلگەن ءتىزىم بويىنشا ولار زەينەتكە ەرتە شىعاتىنداي نورمانى ۇسىنىپ وتىرمىز. شىنىنا كەلگەندە اسا قاۋىپتى وندىرىستە ەڭبەك ەتەتىن جۇمىسشىلارعا قاتىستى بىزدە ءتىزىم بار. مەنىڭشە، ول تىزىمگە 16 ماماندىق كىرەدى. ءبىز وسى تىزىمگە ماماندارىمىزدى دا كىرگىزگىمىز كەلەدى»، - دەدى سپيكەر ادىلەت مينيسترلىگىندە وتكەن بريفينگ بارىسىندا.

 ول ءوز سوزىندە كەيبىر مەديتسينالىق قىزمەتكەرلەر وتە كۇردەلى جاعدايدا جۇمىس جۇرگىزىپ جاتقانىن ايتادى. «ماسەلەن، راديولوگتار، ونكولوگتار سەكىلدى جۇمىستارى كۇردەلى ءبىرقاتار جۇمىس بار. ولارمەن ەتەنە جۇمىس اتقاراتىن مەملەكەتتىك ورگاندار بۇل ۇسىنىسىمىزدى قولداپ وتىر. ءبىز مەديتسينالىق جانە فارماتسيەۆتيكالىق قىزمەتكەرلەر تۋرالى بۇدان بۇرىن دا ايتقان بولاتىنبىز. مەديتسينالىق دەپ جالپىلاي العاندا ونىڭ ىشىنە ءبىرقاتار ماماندىق ەنەتىنىن اتاپ وتكىمىز كەلەدى. ءبىز ناقتى ەرەجە مەن ءتارتىپتى ازىرلەيمىز. ولاردىڭ بارىدە ۋاكىلەتتى ورگانداردىڭ ءتيىستى قۇجاتتارىندا ايقىندالادى. مەرزىم، دارىگەردىڭ جاسى - ءبارى دە ەرەجەلەرىمىزدە كورسەتىلەدى»، - دەيدى ب. توكەجانوۆ.

 كودەكستىڭ تۇجىرىمداماسىندا جانە «قازاقستان رەسپۋبليكاسىنىڭ دەنساۋلىق ساقتاۋ سالاسىنداعى ماسەلەلەر بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا دارىگەرلەردىڭ مارتەبەسىن كوتەرۋ ماسەلەسى دە قاراستىرىلعان.

«بۇل ءبىزدىڭ تۇجىرىمدامانىڭ جاڭا قىرى. ءبىز تۇرعىن ءۇي قاتى، ناستارى زاڭىندا دەنساۋلىق ساقتاۋ سالاسىنىڭ قىزمەتكەرلەرىنە قاتىستى تۇرعىن ءۇي قاتىناستارىن رەتتەۋ ەرەكشەلىكتەرىنە بايلانىستى بەلگىلى ءبىر ءبولىمدى قاراستىرعىمىز كەلەدى. ستاتيستيكاعا قاراپ وتىرساق، بىزدە ىشكى ميگراتسيانىڭ حالى كوڭىل قۋانتپايدى - كوپتەگەن دارىگەرلەردى اق حالاتتىلارعا مۇقتاج وڭىرلەرگە جىبەرە الماي وتىرمىز.

«ديپلوممەن اۋىلعا» باعدارلاماسى بار دەسەك تە، ءدال وسى تۇرعىن ۇيگە كەلگەندە ماسەلە ءالى دە شەشىلگەن جوق. جەرگىلىكتى اتقارۋشى ورگاندارىدڭ جاۋاپكەرشىلىگى بار، ءبىراق وكىنىشكە قاراي ءبىزدىڭ بالالار مەديتسينالىق ۋنيۆەرسيتتەرگە تۇسكەن كەزدە بيلىك وكىلدەرى ولاردىڭ 9-10 جىل بويى وقيتىنىن بىلەدى. ۋنيۆەرسيتەت ءبىتىرىپ شىققان ستۋدەنتتەر ءبىرشاما جاسقا تاقاپ قالاتىنىن ەسكەرۋ كەرەك. مىنە، سول كەزدە ولار جۇمىسقا بىلەك سىبانا كىرىسىپ كەتۋى ءۇشىن الەۋمەتتىك جاعدايىن جاقسارتۋىمىز كەرەك. دارىگەرلەرگە سالىنعان اقشا ءوزىن- ءوزى اقتايدى»، - دەيدى ول.

سونىمەن قاتار، بولات توكەجانوۆ كادرلاردى اۋىلعا ورنالاستىرۋ بويىنشا زاڭنامالىق نورمالار بارىن دا ەسكە سالدى.

اۆتور: ايان بەكەن ۇلى