ۇشاق شىعارا الماعان زاۋىت قۇرعاق بيە ءسۇتىن وندىرەتىن كاسىپورىنعا اينالادى

قاراعاندى. قازاقپارات - جاقىن ارادا كوپشىلىككە تانىمال، كونۆەيەرىنەن بىردە ءبىر ۇشاق شىعارىلماعان اۆيازاۋىتتىڭ عيماراتىندا قۇرعاق بيە ءسۇتىن وندىرەتىن كاسىپورىننىڭ سەحى ورنالاساتىن بولادى.

بۇل جوبانى جۇزەگە اسىرۋعا كومەكتەسۋگە ق ر اۋىل شارۋاشىلىعى ءمينيسترى ءومىرزاق شوكەيەۆ ۋادە بەردى، دەپ حابارلايدى قاراعاندى وبلىسى اكىمىنىڭ رەسمي سايتى.

قازىر «ەۋرازيا ينۆەست ل ت د» قۇرعاق بيە ءسۇتىن وندىرەتىن زاۋىت جانسارى كەنتىنىڭ ماڭىندا ورنالاسقان. وندا 700 بيە ساۋىلىپ، ءسۇتى وڭدەلەدى. دايىن ۇنتاق فارماتسيەۆتيكا مەن بالالار تاعامىن شىعارۋدا قولدانىلادى. ءونىم رەسەي مەن قىتايعا ەكسپورتتالادى. ءسۇتتى ۇنتاققا اينالدىرۋ تەحنولوگياسى قازاقستان ءۇشىن بىرەگەي. وسى سەكىلدى ءوندىرىس، ءبىراق اناعۇرلىم كىشىرەك كولەمدە گەرمانيادا عانا بار.

ءومىرزاق شوكەيەۆ يننوۆاتسيالىق تەحنولوگيامەن قاراعاندىعا جۇمىس ساپارى بارىسىندا تانىسىپ شىقتى. اۋىل شارۋاشىلىعى مينيسترىنە ساۋۋ اپپاراتتارى، جىلقىلارعا ارنالعان قاشالار مەن زەرتحانالار كورسەتىلدى.

- ءبىزدىڭ قازىرگى زاۋىت شالعايدا ورنالاسقاندىقتان بەلگىلى ءبىر قيىندىقتارعا تاپ بولىپ وتىرمىز: ەلەكتر قۋاتى كەيدە ءوشىپ قالادى، قىسقى ۋاقىتتا ءونىمدى جەتكىزۋ قيىنعا سوعادى، بىلىكتى مامانداردى جۇمىلدىرۋ كۇردەلى. ءبىز ول ماسەلەلەردى شەشۋ جولدارىن قۇردىق. قاراعاندىنىڭ ماڭىندا ورنالاسقان بۇرىنعى «كاز اۆيا سپەكتر» زاۋىتىنىڭ عيماراتىن ساتىپ الدىق. وندا ءسۇتتى ۇنتاققا اينالدىرۋعا ارنالعان قۇرىلعىلاردى ورناتۋدى جوسپارلاپ وتىرمىز، ال مۇندا مال باسىن 1500-عا دەيىن ۇلعايتىپ، بيەلەردى اسىراپ، ساۋاتىن بولامىز. ءبىز تۇرعىنداردان ماۋسىمدا 2 ميلليون ليتر ءسۇت ساتىپ الامىز، بۇل دايىن ءونىم كولەمىن 200 تونناعا دەيىن ۇلعايتۋعا مۇمكىندىك بەرەدى. الايدا ول ءۇشىن بىزگە 3 ميلليارد 80 ميلليون تەڭگە كولەمىندە قاراجات قاجەت، - دەدى مينيسترگە جىلقى زاۋىتىنىڭ باسقارۋشىسى بايان ەلشين.

 وعان ءومىرزاق شوكەيەۆ بۇل ماسەلەنى شەشۋدە كومەك كورسەتەتىنىن ايتىپ، ۋادە بەردى. «ەۋرازيا ينۆەست ل ت د» زاۋىتى 2015- جىلى ىسكە قوسىلدى. وعان شامامەن 2,5 ميلليارد تەڭگە قاراجات سالىنعان، ونىڭ ىشىندە 1,7 ميلليارد تەڭگە - «قازاگروفينانس» اق مەن اگرارلىق نەسيە كورپوراتسياسىنىڭ قاراجاتى.

 بۇگىنگى تاڭدا زاۋىتتا 700 بيە بار، 145 بىلىكتى مامان قىزمەت ەتەدى. ءبىر جىلدا كومپانيا شامامەن 30 توننا دايىن ءونىم وندىرەدى. 2017- جىلى زاۋىت رەسەي، بەلارۋس، قىتاي جانە ا ق ش- قا 4,6 توننا ۇنتاق قوسپا ساتقان.

ەستەرىڭىزگە سالا كەتەيىك، «كازاۆياسپەكتر» زاۋىتى 2012- جىلى سالىنعان. وندا «فەرمەر-2» جانە «فەرمەر - 500» مودەلدى ۇشاقتار جاسالىپ، ەكسپورتتالۋى ءتيىس بولاتىن. الايدا، جۇمىس ىستەگەن ۋاقىتىندا زاۋىتتان بىردە ءبىر اۋە كەمەسى جاساپ شىعارىلمادى. 2017- جىلى ول بانكروت دەپ جاريالاندى.