مىسىر بەيبارىس سۇلتان مەشىتىن قالپىنا كەلتىرۋگە اقشا بولەدى

 استانا. قازاقپارات - كايردەگى بەيبارىس سۇلتان مەشىتىن قالپىنا كەلتىرۋ جۇمىستارى قايتا باستالادى. بۇل تۋرالى بۇگىن ق ر سىرتقى ىستەر مينيسترلىگىندە وتكەن بريفينگتە قازاقستانىڭ مىسىرداعى توتەنشە جانە وكىلەتتى ەلشىسى ارمان يساعاليەۆ ايتتى، دەپ حابارلايدى قازاقپارات ءتىلشىسى.

 «قازاق پەن مىسىر حالىقتارى اراسىنداعى بايلانىستاردىڭ تەرەڭ تاريحي تامىرى بار. قازاق جەرىنەن شىققان بەيبارىس سۇلتان بابامىزدىڭ تۇلعاسى ەكى ەلدىڭ اراسىنداعى دوستىق، مادەني جانە تاريحي بايلانىستىڭ سيمۆولىنا اينالدى. كاير قالاسىندا بەيبارىس سۇلتاننىڭ ۇلكەن مەشىتى بار. ول مىسىرداعى كولەمى بويىنشا ەكىنشى مەشىت سانالادى. 2007 -جىلى ەكى ەلدىڭ اراسىندا اتالعان مەشىتتى قالپىنا كەلتىرۋ تۋرالى ۇكىمەتارالىق كەلىسىمگە قول قويىلعان بولاتىن» ، - دەدى ەلشىسى.

 ونىڭ ايتۋىنشا، جوبا قۇنى 12 ميلليون دوللارعا باعالانعان. ونىڭ 4,5 ميلليون دوللارىن قازاقستان تاراپى، ال قالعانىن مىسىردىڭ وتەۋى تۋرالى ۋاعدالاستىققا قول جەتكىزىلگەن. وسى كۇنگە دەيىن قازاقستان تاراپى ءوز ۋادەسىن ورىنداپ، 4,5 ميلليون دوللار بولگەن. اتالعان قارجى مەشىتتى قالپىنا كەلتىرۋدىڭ ءبىرىنشى كەزەڭىنە جۇمسالعان. الايدا، مىسىر تاراپى وسى ۋاقىتقا دەيىن ءوز ۋاعدالاستىعىن ورىنداي الماي كەلدى. وعان ەلدەگى ساياسي تولقۋلار، ەكى توڭكەرىس، ەكونوميكاداعى ۇلكەن داعدارىس سەبەپ بولدى.

 «قازىرگى كەزدە تۋريستەردىڭ ارتۋىنا جانە ودان بيۋدجەتكە تۇسەتىن قاراجات كولەمىنىڭ ۇلعايۋىنا بايلانىستى بۇل ماسەلە قايتا كوتەرىلدى. مىسىر پرەمەر- ءمينيسترىنىڭ جەكە ارالاسۋىمەن باس مەردىگەر مەن كونە ەسكەرتكىشتەر مينيسترلىگى اراسىنداعى كەلىسپەۋشىلىك شەشىلدى. سوندىقتان جاقىن ارادا، وسى كۇندەرى مەشىتتى قالپىنا كەلتىرۋ جوباسى قايتادان باستالادى. ءمينيستردىڭ ماعان بەرگەن ۋادەسىنە سايكەس، مەشىتتى قالپىنا كەلتىرۋ ءجۇمىستارىنىڭ باستالۋىنان اياقتالۋىنا دەيىن 12 اي كەتەدى. ياعني، سول 12 ايدىڭ ىشىندە جۇمىستار تولىق اياقتالادى دەپ سەنەمىن» ، - دەدى ارمان يساعاليەۆ.

 

اۆتور: مارلان جيەمباي