بۇدان بىلاي ەلىمىزدە ۇشاقتا شۋ شىعارىپ، ءتارتىپ بۇزاتىنداردى بايلاپ تاستايتىن بولدى

 استانا. قازاقپارات - ەندى اۋە كەمەسىندە ءتارتىپ بۇزىپ، ەلدىڭ مازاسىن الاتىندارمەن اڭگىمە قىسقا بولادى. ىشىمدىك ءىشىپ، شۋ شىعارعانداردى بورت قىزمەتكەرلەرى بايلاپ- ماتاپ تاستاسا دا تولىق قۇقىلى.

جىل باسىنان بەرى اۋە كەمەسىندە ءتارتىپ بۇزعان 23 ازامات اكىمشىلىك جاۋاپكەرشىلىككە تارتىلعان. مۇنداي فاكتىلەردى الدىن الۋ ماقساتىندا تيىسىنشە زاڭ جوباسى قابىلداندى. بۇل تۋرالى ەۋرازيا ءبىرىنشى ارناسى حابارلايدى.

بۇل كۇندە بورتتا شۋ شىعارىپ، ەلدىڭ مازاسىن الاتىنداردى ۇشاقتان ءتۇسىرىپ تاستاۋ ءۇشىن باعىتتى وزگەرتۋ كەرەك. قىسقاسى ماشاقاتى مول ماسەلە. ەندى مينيسترلىك وكىلدەرى ەپيكاجعا باسىمدىق بەرۋدى ۇسىندى.

«ءتارتىپ بۇزعان جولاۋشى اينالاسىنداعى ازاماتتارعا قاۋىپ توندىرمەس ءۇشىن جانە بورت تالابىن بۇزباۋ ماقساتىندا ونى وتىرعان جەرىنەن قوزعالماۋى ءۇشىن بۇكپە قولدانىلۋى مۇمكىن. سونداي- اق، ارنايى پلاستيكالىق كىسەن سالىنادى. اۋە كەمەلەرىندەگى ماماندار ونداي ازاماتتارمەن جۇمىس ىستەۋدى ۇيرەنگەن» - دەيدى ق ر ينۆەستيتسيالار جانە دامۋ ءمينيسترىنىڭ ءبىرىنشى ورىنباسارى رومان سكليار.

ارتىقشىلىق بەرىلدى ەكەن دەپ ايتقاننان شىعىپ كەتپەي مە؟ ءماجىلىس ءتوراعاسى زاڭ جوباسىن وقىپ وتىرىپ وسىعان نازار اۋداردى. ءتارتىپ بۇزعانىمەن قوسا كۇدىك تۋدىراتىن ازاماتتىڭ ءوزىن بايلاپ تاستاسا ەرتەڭ ول ادىلدىك تالاپ ەتە الا ما دەگەن ساۋال قويىلدى.

«ەكيپاج تاراپىنان ازاماتقا قاتىستى قانداي دا ءبىر زاڭعا قايشى ارەكەت جاسالسا ولار ەشبىر سوت تەرگەۋ بارىسىندا جاۋاپكەرشىلىككە تارتىلمايدى دەپ جازىلعان. سىزدەر بۇل نورمانى سوتتان بيىك قويىپ تۇرسىزدار ما؟ ال ەگەر سوت جولاۋشىنىڭ ءىس- ارەكەتىنەن كىنارات تاپپاسا شە؟ » - دەيدى ق ر پارلامەنتى ءماجىلىسىنىڭ ءتوراعاسى نۇرلان نىعماتۋللين.

زاڭ جوباسىنىڭ بۇل بابىنا بايلانىستى مينيسترلىك وكىلدەرى ناقتى جاۋاپ تابا الماي ابدىراپ قالدى. الايدا كوپتەگەن مىسالدار كەلتىرۋ ارقىلى اقىرى جاۋاپ تابىلدى.

«ەگەر مۇنداي جاعداي سوتتا قارالاتىن بولسا، وندا سوت ءىستى جان جاقتى قارايدى. ەگەر ەكيپاج مۇشەلەرىنىڭ قابىلداعان شەشىمى تالاپقا قايشى بولىپ شىقسا ولار جاۋاپكەرشىلىككە تارتىلادى» - دەيدى قر ادىلەت ءمينيسترىنىڭ ورىنباسارى ەلۆيرا ازيموۆا.

اۋەگە كوتەرىلسە ءوزىن كوك تىرەپ تۇراتىنداي سەزىنەتىندەر ءبىزدىڭ قوعامدا جەتىپ ارتىلادى. سولاردىڭ ءبىرى اتىشۋلى ماقسات ۇسەنوۆ. وتكەن جىلى ۇشاق ىشىندە شىلىم شەگىپ، الكوگول ءىشىپ جولاۋشىلار مەن ەپيكاجدىڭ مازاسىن العان ول 10 تاۋلىككە قاماۋ تۇرىندە اكىمشىلىك جازاعا تارتىلعان بولاتىن.

بورت قاۋىپسىزدىگى جايلى ءسوز قوزعالعاندا جاقىندا عانا تىركەلگەن تاعى ءبىر جايت ەسكە ءتۇسىتى. ۇشاققا رۇقساتسىز كىرىپ كەتكەن ءانشى تورەعالي تورەالىگە قارسى ازىرگە ناقتى قانداي شارا قولدانىلاتىنى جايلى مينيسترلىك وكىلدەرى اشىپ ەشتەڭە ايتا المادى. تەك اەروپورت قىزمەتكەرى جاۋاپكەرشىلىككە تارتىلعانىن جەتكىزدى. زاڭ قابىلدانعانىمەن انىعى ءبىر، بيلەتسىز ادام ۇشاق ىشىندە ەركىن كىرىپ جۇرسە بەرسە قاۋىپسىزدىك تالاپتارى قازاقستاندا ءالى كۇنگە تومەن دەگەندى بىلدىرەدى.

Stan.kz