+7 (701) 759 90 19 Лента
-11 °С : استانا
-6 °С : الماتى
USD 371.56 EUR 422.43
RUB 5.56 CNY 53.51
جاڭالىقتار

قازىر مۇعالىمدى ەرىنشەكتەن باسقاسىنىڭ ءبارى سىناۋعا قۇمار - تاڭاتقان تۇمەنبايەۆ

12 قازان 15:24 173
:ءبولىسۋ
قازىر مۇعالىمدى ەرىنشەكتەن باسقاسىنىڭ ءبارى سىناۋعا قۇمار - تاڭاتقان تۇمەنبايەۆ

استانا. قازاقپارات - « پەداگوگتار مارتەبەسى» تۋرالى زاڭ مەكتەپكە، جالپى قوعامعا اۋاداي قاجەت» دەيدى وسكەمەن قالاسىنداعى №44 ليسەيدىڭ ديرەكتورى تاڭاتقان تۇمەنبايەۆ.

دەسە دەگەندەي، مۇعالىمدەرگە قاتىستى قوردالانىپ قالعان ماسەلەلەر جايلى ەلباسىنىڭ ءسوز قوزعاۋى ۇستازدار قاۋىمىنا ۇلكەن ءۇمىت سىيلاپ وتىر. وسى رەتتە مەكتەپ پەن ءبىلىم سالاسىنىڭ وتكىر دە وزەكتى ماسەلەسى جايلى قازاقپارات ءتىلشىسى ۇستازدىق جولدا قىرىق جىلدان بەرى كەلە جاتقان تاڭاتقان تۇمەنبايەۆتى سوزگە تارتىپ كوردى.

« قازىرگى زاماندا « پەدگوگتار مارتەبەسى» تۋرالى زاڭ مەكتەپكە، جالپى قوعامعا اۋاداي قاجەت. وتكەن عاسىردىڭ ەلۋىنشى، الپىسىنشى جىلدارى مۇعالىم دەگەن ەرەكشە قۇرمەتتى بولاتىن. كەرەك دەسەڭىز، ۇلكەن اقساقالدار جاس مۇعالىمدەرگە ورنىنان تۇرىپ امانداساتىن. مۇعالىمنىڭ ايتقانى اتا- اناعا دا، قوعامعا دا، بالاعا دا زاڭ ەدى. سەبەبى، اۋىلدا ەڭ كوزى اشىق، اعارتۋشى مۇعالىم بولدى عوي. ال قازىر، اسىرەسە توقسانىنشى جىلداردان كەيىن زامان، قوعام، ونىمەن بىرگە ادامداردىڭ دا كوزقاراسى وزگەردى. قازىر ءبارى « ءبىلىمدى» . مۇعالىمنىڭ بەدەلى مەن ابىرويى مۇلدە تومەندەپ كەتتى. قازىر ەرىنشەكتەن باسقاسىنىڭ ءبارى مۇعالىمدى سىناۋعا قۇمار. ەلباسى دا ءوز جولداۋىندا مۇعالىمنىڭ ءوز جۇمىسىمەن عانا اينالىسۋى كەرەكتىگىن ايتتى. تالاي جىل كوكەيدە جۇرگەن ماسەلەنى ەلباسىنىڭ اۋزىنان ەستىگەنىمىزگە وتە ريزامىز» ، - دەيدى تاڭاتقان تۇمەنبايەۆ.

ليتسەي ديرەكتورىنىڭ ايتۋىنشا، مىقتى ۇستاز مىقتى تاربيەلەيدى. ال مىقتى مىقتى قوعامدى قۇرا الادى.

«مۇعالىم دەگەن قانداي بولۋى كەرەك؟ ونىڭ ناقتى مىندەتى، دارەجەسى مەن مارتەبەسى، جالاقىسى مەن الەۋمەتتىك جاعدايى قانداي بولۋى ءتيىس؟ مىنە، كەلەشەكتە شىعاتىن زاڭدا وسى ماسەلەلەردىڭ ءبارى قامتىلۋى كەرەك. مىسالى، مەكتەپتە مۇعالىمدەر قانداي قىزمەت اتقارسا دا، جۇمىسى ناتيجەلى نەمەسە ناتيجەسىز بولسا دا، ءبارى بىردەي جالاقى الادى. مەنىڭ ويىمشا، مۇعالىمگە جۇمىسىنىڭ ناتيجەسىنە قاراي جالاقى تولەنۋى ءتيىس. ماسەلەن، جىلدا قانشاما « التىن بەلگى» يەلەرىن شىعارعان، حالىقارالىق ءبىلىم سايىستارىندا وقۋشىسى جۇلدە العان، سپورتتان حالىقارالىق جارىستاردا توپ جارىپ جۇرگەن مۇعالىمنىڭ جالاقىسىنا ءبىر تيىن دا قوسىلمايدى. مىنە، سوندىقتان، زاڭ مۇعالىمدى ىنتالاندىرۋ تەتىكتەرىن قاراستىرۋى كەرەك» ، - دەيدى ليتسەي ديرەكتورى.

تاڭاتقان تۇمەنبايەۆتىڭ ايتۋىنا قاراعاندا، مۇعالىم مەن سىنىپ جەتەكشىسىنىڭ مىندەتىن ءبىرجولاتا اجىراتۋ كەرەك.

« قازىر مەكتەپتەردى نازاربايەۆ زياتكەرلىك مەكتەبىنىڭ دەڭگەيىنە كوتەرۋ ماسەلەسى ايتىلىپ ءجۇر. قازىر ورتا مەكتەپتەردە مۇعالىم ساباق تا بەرەدى، سىنىپقا دا جەتەكشىلىك ەتەدى. اتا- انالارمەن جۇمىس جۇرگىزۋ، جينالىستار وتكىزىپ، سىنىپتاعى ءار بالاعا جاۋاپتى بولۋ - سىنىپ جەتەكشىسىنىڭ جۇمىسى باستان اسادى. مىنە، سوندىقتان، ونىڭ جۇمىسىنان شالالىق شىعۋى بەك مۇمكىن. ال نازاربايەۆ زياتكەرلىك مەكتەبىندە كۋراتور مەن تيۋتور دەگەن بار. ولار تەك بالانىڭ تاربيەسىنە جاۋاپتى. ساباق وقىتپايدى. مىنە، سول سەكىلدى تاربيەشى تاربيە پروتسەسىمەن اينالىسىپ، مۇعالىم - مۇعالىم بولىپ قالۋى ءتيىس» ، - دەيدى ول.

ديرەكتور ءوز سوزىندەقازىرگى قوعامدا قالىپتاسىپ قالعان « قيت ەتكەندى مەكتەپتەن كورۋ» قاعيداتىن وزگەرتۋ كەرەكتىگىن ايتادى.

« قازىر مۇعالىم ماماندىعىنا مىقتى تۇلەكتەر بارمايدى. وزەكتى ماسەلە دە - وسى. سەبەبى، جالاقى از، جۇمىس كوپ. ەكىنشىدەن، ستۋدەنتتەردى مۇعالىم ماماندىعىنا شاقىرۋ ءۇشىن شاكىرتاقىنى كوبەيتۋ كەرەك. گرانت كوپتەپ ءبولىنۋى ءتيىس. كەزىندە ءبىلىم جانە عىلىم ءمينيسترى بولعان،قازىرگى سەناتور باقىتجان جۇماعۇلوۆ مۇعالىمدىككە جاستار « قالدىق پرينتسيپىمەن» باراتىنىن بۇرىن دا ايتقان بولاتىن. ياعني، باسقا وقۋعا تۇسە الماعان جاستار امالسىز مۇعالىم بولىپ جاتىر. وسى سەبەپتى كەيدە زەينەتكەرلەرگە جالىنىپ وتىرامىز. پەداگوگتاردى دايىندايتىنقازىرگى س. امانجولوۆ اتىنداعى شقمۋ- دا كەزىندە 10-15 مىڭ ستۋدەنت وقيتىن. ال ءقازىر 1000-1200 عانا ستۋدەنت بار. ولاردىڭ وزدەرىنىڭ جوو بىتىرگەننەن كەيىن مەكتەپكە جۇمىسقا بارۋ- بارماۋى دا - ەكىنشى شارۋا. مىنە، ءبىلىم سالاسىنداعى قوردالانعان وسى ماسەلەلەردى « پەداگوگتار مارتەبەسى» تۋرالى زاڭ شەشۋى ءتيىس دەپ ويلايمىن» ، - دەپ ءتۇيدى تاڭاتقان تۇمەنبايەۆ.

 ليتسەي ديرەكتورى سونىمەن قاتار، پەداگوگيكا ماماندىعىن بىتىرگەن جاستاردىڭ الەۋمەتتىك جاعدايىن قاراستىرىلۋى كەرەكتىگىن اتاپ ءوتتى. ونىڭ ايتۋىنشا، اۋىلدارعا ۇستازدارعا كورسەتىلەتىن جەڭىلدىك سەكىلدى، قالالارداعى مۇعالىمدەردىڭ دە كوممۋنالدىق تولەمدەرىندە جەڭىلدىكتەر ەنگىزۋى كەرەك.

ەسكە سالا كەتسەك، مەملەكەت باسشىسى ن. ءا. نازاربايەۆ قازاقستان حالقىنا جولداۋىندا 2019 - جىلى قازاقستاندا « پەداگوگتار مارتەبەسى» تۋرالى زاڭ قابىلداۋ كەرەكتىگىن ايتقان ەدى.


باستى سوزدەر: جولداۋ 2018,
:ءبولىسۋ

اأتور:

novasa

ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049
رەداكتور
باقىتجول كاكەش
باقىتجول كاكەش
954-049
مۇراعات