قازاق- قىرعىز زيالىلارى فورۋمىندا شىڭعىس ايتماتوۆ تۋرالى كىتاپ تانىستىرىلدى
شىڭعىس ايتماتوۆتىڭ تۋعانىنا 90 جىل تولۋىنا وراي ازىرلەنگەن كىتاپتىڭ اۆتورى - قىرعىزستاننىڭ مەملەكەت جانە قوعام قايراتكەرى، عالىم، ادەبيەت سىنشىسى وسمانكۋن يبرايموۆ. كىتاپ شىڭعىس تورەقۇل ۇلىنىڭ ءومىرى مەن شىعارماشىلىعىنا ارنالعان. اۆتور شىڭعىس ايتماتوۆ تۇلعاسىن، جەكە تاعدىرى مەن ادەبي شىعارماشىلىعىن، ساياسي كوزقاراستارى مەن الەۋمەتتىك پايىمدارىن ⅩⅩ عاسىرمەن تىعىز بايلانىستىرا سۋرەتتەگەن. ادەتتە مۇنداي تۇلعالاردى «ءداۋىر- ادام» دەپ تە باعالاپ جاتادى. سوندىقتان، كىتاپ اۆتورى ايتماتوۆ شىعارماشىلىعىن سيپاتتاي كەلە جازۋشىنىڭ كەڭەس وداعى كەزىندەگى قوعامدى، ونىڭ قۇندىلىقتارى مەن ءبىرقاتار ەرەكشەلىكتەرىن، سول داۋىردەگى ادام تاعدىرىن سۋرەتتەگەن شەبەرلىگىنە نازار اۋدارعان.
TWESCO- نىڭ قولداۋىمەن جارىق كورگەن كىتاپتىڭ تۇساۋكەسەرى بيىل كوكتەمدە استانا قالاسىندا وتكەن «ايتماتوۆ تاعىلىمى» اتتى ءبىرىنشى قازاق- قىرعىز زيالىلارى فورۋمىندا ۇيىمداستىرىلعان بولاتىن. كەيىن بىشكەك قالاسىندا اتالعان كىتاپتىڭ تۇساۋكەسەرى ۇيىمداستىرىلعان ەدى. ال، قازاق- قىرعىز زيالىلارى Ⅱفورۋمىندا كىتاپتى وش ۋنيۆەرسيتەتىندە تانىستىرۋمەن قاتار، ونى اتالعان وقۋ ورنىنىڭ كىتاپحاناسىنا تابىس ەتۋ ءراسىمى دە ءوتتى.
