قىركۇيەكتە ەڭ كوپ ساتىلعان كولىكتەر
قاڭتار- قىركۇيەك ايلارىندا قازاقستاندىقتار جاڭا اۆتوكولىك، اۆتوبۋس پەن جۇك كولىگىن ساتىپ الۋعا 386,7 ميلليارد تەڭگە (1134,9 ميلليون دوللار) جۇمساعان.
وسى جىلدىڭ قىركۇيەك ايىندا جاڭا اۆتوكولىكتەردى ساتىپ الۋ كورسەتكىشى تامىز ايىمەن سالىستىرعاندا 2,7 پايىزعا وسكەن. ياعني وسى ارالىقتا ەلىمىزدەگى ديللەرلەر 5370 جەڭىل اۆتوكولىك پەن جەڭىل كوممەرتسيالىق تەحنيكا، سونداي-اق 305 دانا جۇك كولىگى مەن ارنايى كولىك، اۆتوبۋس ساۋدالاعان. 2018 -جىلدىڭ 9 ايىنىڭ قورىتىندىسى بويىنشا وتاندىق نارىق ساتىلعان اۆتوكولىك بويىنشا وتكەن جىلمەن سالىستىرعاندا 28 پايىزدىق ءوسىمدى كورسەتكەن.
ەڭ كوپ ساۋدالانعان كولىكتەردىڭ وندىعىن قىركۇيەكتە Lada باستاپ تۇر.
وتكەن ايدا اتالمىش ماركادا 1 328 اۆتوكولىك (وتكەن ايمەن سالىستىرعاندا +10 پايىز) ءوز يەسىن تاپقان. ال Toyota ديلەرلەرى 1146 دانا (-9 پايىز) كولىك ساتسا، Hyundai ماركاسى بويىنشا - 862 اۆتو (+17 پايىز)، Nissan ماركاسىمەن 293 دانا (+23 پايىز)، Volkswagen-نەن 260 دانا كولىك ساتىلعان.
Renault اۆتوكولىكتەرى ساتىلعان 213 دانامەن التىنشى ورىندا. ودان كەيىنگى ورىندارعا Kia (182) ، Lexus (179) پەن Skoda (100) ، Chevrolet (84) تۇر.
ەسكە سالا كەتسەك، وسىدان ءبىر اي بۇرىن قازاقستاندىق اۆتوبيزنەس قاۋىمداستىعى قازاقستاندا تامىز ايىندا ەڭ كوپ سۇرانىسقا يە اۆتوكولىكتەردىڭ ءتىزىمىن جاريالاعان بولاتىن. جاڭا جەڭىل اۆتوكولىكتەردىڭ ساتىلىمى جاعىنان وندىقتى ول كەزدە Toyota ماركاسى باستاعان ەدى.
سونداي-اق وسىعان دەيىن قازاقستاندا جەڭىل اۆتوكولىكتەردىڭ سانى 70 پايىزعا وسكەندىگى حابارلانعان بولاتىن.