الەمدىك جانە ءداستۇرلى دىندەر كوشباسشىلارى استانادا نە تۋرالى ۋاعدالاستى
«ءبىز VI سەزدىڭ قاتىسۋشىلارى - بەيبىتشىلىككە، كەلىسىم مەن جاسامپاز ىنتىماقتاستىققا بىرلەسە جۇمىلعان الەمدىك جانە ءداستۇرلى دىندەردىڭ وكىلدەرى، مەملەكەتتەر مەن حالىقارالىق ۇيىمداردىڭ باسشىلارى» دەپ باستالاتىن دەكلاراتسيانىڭ قاتىسۋشىلارى كەلەسىدەي كەلىسىمدەرگە دايىن ەكەنىن ءبىلدىردى.
اتاپ ايتقاندا، سەزگە قاتىسۋشىلار ۇزاقمەرزىمدى تۇراقتىلىق پەن زورلىق-زومبىلىقتىڭ الدىن الۋعا كۇش سالۋعا، الەمدىك جانە ءداستۇرلى دىندەر باسشىلارىنىڭ حالىقارالىق جانە قوعامدىق ينستيتۋتتارمەن، ۇكىمەتتەرمەن سەرىكتەستىگىن نىعايتۋعا كەلىسىپ وتىر.
سونىمەن قاتار دىنىنە، دىلىنە، ءتىلى مەن جىنىسىنا قاراماستان، بارلىق ازاماتتاردىڭ قۇقىعىنا قۇرمەتپەن قاراۋعا، ءدىنارالىق جانە كونفەسسياارالىق ديالوگتى نىعايتۋعا ارنالعان باستامالاردى قولداۋعا، قۇقىعى تاپتالعان بارلىق ءدىني توپتار مەن ەتنيكالىق قۇرامدارعا نيەتتەستىك بىلدىرۋگە، بارلىق باق پەن ساياسي قايراتكەرلەردى ءدىن مەن تەرروريزم بىردەي دەگەن تۇسىنىكتەن باس تارتۋعا شاقىرۋعا، دىنىنە قاراپ قوعامدى بولۋگە جول بەرمەۋگە ۋاعدالاستى.
«سەزگە قاتىسۋشىلار الەمدىك قۇندىلىقتاردى العا جىلجىتۋ ءۇشىن الەمدىك ءدىن باسشىلارىن جۇمىلدىرۋعا، ءدىني ورىنداردا، سونىمەن بىرگە يەرۋساليمدە ءتۇرلى الاۋىزدىقتارعا جول بەرمەۋگە، وركەنيەتارالىق، ءدىنارالىق جانە مادەنيەتارالىق ديالوگتى قاراستىراتىن بارلىق ينستيتۋتتار مەن باستامالاردى قولداۋعا دايار. سونىمەن بىرگە، قاتىسۋشىلار قازاقستان رەسپۋبليكاسىنىڭ تۇڭعىش پرەزيدەنتىنىڭ بەيبىتشىلىك پەن كەلىسىم جولىنداعى جاھاندىق پروتسەسكە قوسقان ۇلەسى ءۇشىن «نۇرسۇلتان نازاربايەۆ ۇسىنعان كونفەسسياارالىق جانە وركەنيەتارالىق ديالوگ ورتالىعىن» قۇرۋدى قولداۋعا دايىن»، - دەلىنگەن دەكلاراتسيانىڭ ماتىنىندە.
سونىمەن قاتار دەلەگاتتار بەيبىتشىلىكتىڭ داستۇرلەرىن كوتەرمەلەۋگە، ادامزاتتىڭ بىرلەسە ءومىر ءسۇرۋى ءۇشىن وركەنيەتتەر مەن دىندەردىڭ جاقىنداسۋىنا سەپ بولۋعا، جاستاردىڭ راديكالدانباۋى ءۇشىن ۇكىمەتتەرگە جۇمىستى كۇشەيتۋگە شاقىرۋعا، الەمدىك جانە ءداستۇرلى دىندەر كوشباسشىلارىنىڭ VII سەزىن استانادا وتكىزۋگە كەلىستى.
«ءبىز وسىناۋ كۇردەلى كەزەڭدە سەنىمى مەن مەيىرىمدى نيەتى بار بارلىق ادامدارعا بىرلەسىپ، ءبىزدىڭ عالامداعى بەيبىتشىلىك پەن كەلىسىمدى قامتاماسىز ەتۋدە جاۋاپكەرشىلىكتى ەنگىزۋگە شاقىرامىز»، - دەپ اياقتالادى دەكلاراتسيا.
ەسكە سالا كەتسەك، الەمدىك جانە ءداستۇرلى دىندەر كوشباسشىلارىنىڭ VI سەزى استانادا 10-11 -قازان كۇندەرى ءوتتى. القالى جيىنعا بارلىق الەمدىك جانە ءداستۇرلى دىندەردىڭ وكىلدەرى، سونىمەن قاتار بەدەلدى ءدىني ليدەرلەر، ساياسي قايراتكەرلەر مەن حالىقارالىق ۇيىم وكىلدەرىنەن قۇرالعان 46 ەلدەن 82 دەلەگاتسيا قاتىستى.
بۇگىن سەز جۇمىسى اياقتالىپ، ونىڭ قورىتىندىسى بويىنشا دەكلاراتسيا قابىلداندى.