ءجادي شاكەن ۇلىنىڭ ازىلدەرى

None
None
استانا. قازاقپارات - جاقسى ءازىل  - جانىڭنىڭ ءدارىسى - اۆتور.

  «90» - نىڭ تويىنان قالمايمىن

 2011 -جىلى الماتىدان استاناعا كوشىپ كەلدىم. قوياندى اۋىلىنا كەلىپ ءۇي سالىپ، قۋ كۇيبەڭنەن شارشاپ جۇرگەنىمدە الماتىدان جازۋشى، ساتيرك قازىحان اشە اعام قوڭىراۋلاتىپ تۇر:

- باۋىرىم، اعاڭ 60 قا كۇندە كەلمەيدى، ازەر جەتكەن ءبىر بەلەستىڭ تويى عوي دەپ ءوزىڭدى ارنايى   شاقىرىپ تۇرمىن،  - دەپ.

كوڭىلى جاقىن اعاعا وزگە سىلتاۋ جاقپايتىنىن ءبىلىپ:

- اعا، سول ازعانتاي 60 قا بارىپ شارشامايتىن سىڭايلىمىن. ءبىراق، 70، 80، 90-ىڭىزدىڭ تويىنان قالماۋعا ۋادە بەرەمىن!  - دەدىم. «بارا المايمىن!» دەپ بىردەن كەسەتكەنگە قاراعاندا، بۇل ءسوز جەڭىل ءتيدى بىلەم، اعامنىڭ راحاتتانا كۇلگەنىن ەستىپ ارقام كەڭىپ قالدى.

- ول دا بولسىن، ايتقانىڭ كەلسىن، باۋىرىم!  - دەيدى قازىحان اعام.

 سيىر دا قوياندىنىڭ سۋىن ىشكەن

بىردە استانا ىرگەسىندەگى قوياندى اۋىلىنداعى باقىت دەگەن اعامىزدىڭ ۇيىنە اقىن مۇحتار شاحانوۆ باستاعان ءبىر توپ قوناقتار كەلدى. قوناقتارمەن بىرگە بولۋعا مەنى دە شاقىردى.

ءار كىم قوياندى تۋرالى ءار ءتۇرلى اڭگىمە ايتىپ، ءسوز اراسىندا اۋىلدىڭ توق، سۋ ماسەلەسىنىڭ ءالى كۇنگە شەشىلمەي وتىرعانىن دا تىلگە تيەك ەتتى. سونىڭ ىشىندە ءبىر جىگىت: «بىزدە اۋىز سۋ جاعدايى وتە قيىن. بۇل اۋىلدىڭ سۋىن ءىشۋ ادام تۇگىل مالعا دا ارام» دەپ قالدى. وسى ورايدا كۇتۋشىلەردىڭ ءبىرى:

- مۇقا، سۋى جامان دەگەنگە شاي ىشپەي قويىپ جۇرمەڭىز، سىزگە ارنايى قالادان الدىرعان تازا سۋمەن شاي قايناتىپ وتىرمىز،  - دەدى.

مەن ورايى كەلگەن ازىلدەن قالعىم كەلمەي:

- سۋىمىز تازاسى عوي تازا. ءبىراق شايعا قوسىپ وتىرعان ءسۇتىمىز وسى اۋىلدىڭ سيىرىنىكى. ءبارى ءبىر سيىر وسى قوياندىنىڭ سۋىن ىشەدى. دەگەنمەندە ەشتەمە ەتپەس، سيىردىڭ سۇزگىسىنەن وتكەن عوي،  - دەدىم.

بۇعان بىرەۋلەر كۇلدى، بىرەۋلەر نە ايتارىن بىلمەي مۇقاڭا جالتاقتاي بەردى. مۇحتار اعا بولسا جاي عانا ەزۋ تارتتى.

حالىقتىڭ شاپانىن حالىققا بەرۋ

بىردە زاكيحان دەگەن اعامىزدىڭ بالاسى ارايدىڭ استانا قالاسىنداعى ۇيلەنۋ تويىنا ءانشى، سازگەر حالىق ريزابەكپەن باردىم. مەن ءسوز سويلەپ ولەڭ وقىسام، حالىق ءان سالىپ، تويدى ءبىر   جەلپىپ تاستاساق كەرەك. توي يەلەرى قۇرمەتتەپ ماعان شاپان جاپتى.

ەكەۋىمىز قاتار بارساق تا ماعان عانا شاپان جابىلعانىنا ءسال ىڭعايسىزداندىم دا حالىق باۋىرىما قاراپ:

- حالىق بەرگەن شاپاندى حالىققا جاپقاننان ارتىق قىزىق بولماس!  - دەپ شاپاندى قايتادان وعان جاپتىم.

مەن دە كۇلدىم، ول دا كۇلدى. تويدان رازى- قوش بوپ قايتتىق.

تەمىرتاۋداعى جۇمىسشى

 اقمولا وبلىسىنىڭ سەلينوگراد اۋدانى قوياندى ورتا مەكتەبىنىڭ ديرەكتورلىعىنا جاڭادان تاعايىندالعان كەزىم ەدى.

وتكەن ەڭبەك جولىمدا   ۇستازدىق سالادا جەتى جىلداي عانا قىزمەت اتقارىپ، ودان كوبىندە باسپا ءسوز سالاسىندا جۇمىس ىستەپپىن. ءبىر قىزىعى مەيلى شىنجاڭدا، مەيلى قازاقستاندا بولسىن پەداگوگيكالىق وقۋ ورىندارىن تامامداپ وتىرىپپىن. سوعان قاراماي ۇزاق جىل ءوزىم جۇمىس اتقارعان باسپا ءسوز سالاسى بىردە ءبىر رەت شەكەممەن شەرتىپ كورمەدى.

اتالعان مەكتەپكە ديرەكتور بولىپ كەلگەسىن، جوعارى- تومەننەن ءبىراز كۇڭكىلدەر شىعىپ، سىرتىمنان: «جۋرناليستيكا سالاسىنىڭ ادامى ەكەن، پەداگوگيكالىق وقۋ ورنىن قالاي باسقارادى!؟» دەسە كەرەك، ءبىر رەتكى تەكسەرىستە كوميسسيا ءتوراعاسى بۇل ءسوزدى اشىققا شىعاردى:

- ءسىز ۇزاق   جىل باسپا ءسوز سالاسىندا قىزمەت اتقارىپسىز. ەندى مىنا وقۋ ورنى بولسا، ونىمەن جاقىنداسپايدى. سوندا وسى جۇمىستى ءارى قاراي الىپ كەتە الاتىندىعىڭىزعا كوزىڭىز جەتە مە؟  - دەيدى، مەنى كەمىتكىسى كەلگەن سىڭايمەن شەكەمەن قاراپ.

مەن جاي عانا ەزۋ تارتىپ:

- ەگەر سىزگە   بىرەۋ وسىدان قىرىق جىل بۇرىن «تەمىرتاۋداعى جۇمىسشى پرەزيدەنت بولا الا ما؟» دەگەن سۇراق قويسا، ءسىز نەدەپ جاۋاپ بەرەتىن ەدىڭىز؟  - دەدىم. الگى كىسى نە ايتارىن بىلمەي ساسقالاقتاپ قالدى دا ءسوزدى باسقاعا بۇردى.

شاماسى مەنىڭ: «ەل باسىمىز نۇرسۇلتان ءابىش ۇلى دا العاشقى قىزمەتىن تەمىرتاۋدان تەمىر قورىتۋشى جۇمىسشى بولىپ باستاپ، ءومىردىڭ بيىك باسپالداعىنا كوتەرىلدى ەمەس پە. ارىدا ءابۋناسىر ءال-فارابي، ودان اباي قاشان پەداگوگيكالىق قىزمەت ىستەپ ۇلت ۇستازىنا اينالىپ ەدى؟!»   - دەگەن اشى مىسقىلىمدى بىردەن سەزسە كەرەك. اقىرى تەز كەتۋگە اسىقتى.

ءبىر كىتاپتىڭ سۇراعى

 بىردە مۇعالىمدىك ساناتتى بەكىتۋ كوميسسياسىنىڭ سىناعىنا كوكشەتاۋ قالاسىنا باردىم. ۇزاق كەزەك كۇتىپ سارىلعاسىن، بارعان جەرىمىزدەگى كابينەتتەردىڭ بىرىنە باس سۇعىپ، كىتاپ سورەسىندەگى كىتاپتاردى ەرمەك ەتىپ وتىردىق.  كوپتەن ىزدەپ تاپپاي جۇرگەن ەرماقان بەكماحانوۆتىڭ كەنەسارى جونىندەگى كىتابىن كورگەندە كوزىم شىراداي جاندى. كابينەت يەسىن ىزدەپ تاپپاعان سوڭ، الگى كىتاپتىڭ ورنىنا العاندىعىم جايىندا حات جازىپ قالدىردىم.

كوميسسيا كەزەگى كەلىپ، اتىم شاقىرىلعان سوڭ، الگى كىتاپتى سۋمكاما سۇڭگىتىپ، سىناق تاپسىرۋعا كىردىم. كوميسيسيا مۇشەلەرى كوپ سۇراق قويىپ ابدەن دىڭكەلەتتى. باسقالار 5 مينۋتتا شىقسا، مەن تۇپ- تۋرا 40 مينۋتتاي سۇراق- جاۋاپپەن بولدىم.

مەنىڭ كوپ ايلانىپ ازەر شىققاندىعىمدى بايقاعان باسقا ارىپتەستەرىم شىعا سالىسىمەن قورشاپ الىپ: «نە بولدى، قالاي بولدى؟» - نىڭ استىنا الدى. مەن كۇلىپ:

- مانا كىتاپتى بەكەر- اق ۇرلاپپىن. ۇرلاعان ءبىر كىتابىمنىڭ بۇل دۇنيەدەگى سۇراعى 40 مينۋت بولدى. ارعى دۇنيەگە بارعاندا قانشا سۇراقتىڭ استىندا قالارىمدى ءبىر قۇدايدىڭ ءوزى ءبىلسىن!  - دەدىم.

ءازىل توركىنىن تۇسىنگەندەر كۇلدى، تۇسىنبەگەندەر اڭىردى.

 ءجادي شاكەن ۇلى

سوڭعى جاڭالىقتار