جولداۋداعى پەداگوگتار ماسەلەسى حالىق قولداۋىنا يە بولدى
«مەملەكەت باسشىسى جولداۋدا «مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ كەرەك» دەي وتىرىپ، بۇل سالادا بىلىكتىلىك تالاپتارىن، وقىتۋ ءادىسىن، تاربيەشىلەردىڭ جانە بالاباقشاداعى باسقا دا قىزمەتكەرلەردىڭ ەڭبەگىنە اقى تولەۋ جۇيەسىن قايتا قاراۋ قاجەتتىگىن مىندەتتەدى. سونداي-اق، نازاربايەۆ زياتكەرلىك مەكتەپتەرىنىڭ وقىتۋ جۇيەسى مەن ادىستەمەسى مەملەكەتتىك مەكتەپتەر ءۇشىن ءبىرىڭعاي ستاندارت بولۋى ءتيىس ەكەنىن اتاپ ءوتتى. بۇل ۇستازدار قاۋىمىنا ۇلكەن مىندەتتەر جۇكتەيدى. وقۋ- اعارتۋ سالاسىنىڭ بۇگىنگى كۇن تالاپتارىنا تولىقتاي ساي بولۋى باستى تالاپتىڭ بىرىنە اينالدى. سوندىقتان وسى باعىتتا ءبىز ناتيجەلى جۇمىس اتقارۋعا كۇش سالۋىمىز ءتيىس»، - دەدى ز. اعمانوۆا.
ونىڭ ايتۋىنشا، تاعى ءبىر ايتا كەتەرلىگى، ەلباسىنىڭ ورتا مەكتەپتەردىڭ وزىندە بالالاردى مەيلىنشە سۇرانىسقا يە ماماندىقتارعا بەيىمدەۋ تۋرالى پىكىرى جاس ۇرپاقتىڭ بولاشاعىن ايقىنداۋعا جول اشادى. ول وقىتۋدىڭ جەكە باعدارىن جاساۋعا، وقۋشى مەن مۇعالىمنىڭ وقۋ جۇكتەمەسىن ازايتۋعا مۇمكىندىك بەرەدى.
«ەلباسى ءوز جولداۋىندا كەلەسى جىلى «پەداگوگ مارتبەسى تۋرالى» زاڭدى ازىرلەپ، قابىلداۋ قاجەتتىگىن اتاپ ءوتتى. ول مۇعالىمدەر مەن مەكتەپكە دەيىنگى مەكەمە قىزمەتكەرلەرى ءۇشىن بارلىق يگىلىكتى قاراستىرىپ، جۇكتەمەنى ازايتۋعا، ءجونسىز تەكسەرىستەر مەن مىندەتتەن تىس فۋنكسيالاردان اراشالايتىنى ايتىلعان. شىنىندا دا، بۇل ماسەلە بۇگىندە وزەكتى ماسەلەنىڭ بىرىنە اينالعان ەدى. ەندىگى كەزەكتە ونداي كەمشىلىكتەرگە جول بەرىلمەيتىنى ۇستازدار كوڭىلىنەن تولىقتاي شىعىپ وتىر. سونداي- اق، مەملەكەت باسشىسىنىڭ جوعارى ءبىلىم بەرۋ ىسىندە وقۋ ورىندارىنىڭ مامان دايىنداۋ ساپاسىنا قاتىستى تالاپتار كۇشەيتىلەتىنى ايتىلدى. ول ماماندار دايىنداۋ ماسەلەسىندە ءوز سەپتىگىن تيگىزەتىنى انىق»، - دەيدى ز. اعمانوۆا.