بۋدديست ابايدىڭ ءسوزىن ۇمىتپاۋعا شاقىردى
«بۋدديزمنىڭ ءىلىمى بويىنشا بارلىق ادامدار ءبىر-بىرىنە جاناشىرلىقپەن قاراپ، زاڭداردى ءبىر-بىرىنە قايشى قويماۋى ءتيىس. بىرلىك دەگەنىمىز - ادامنىڭ جانى مەن ءتانى ءبىرتۇتاس بولۋى كەرەك. سول سياقتى جەكە ادام مەن قوعام ءبىر-بىرىنەن اجىراماۋى ءتيىس. قايىرىمدىلىققا بەت بۇرىپ، ادىلەتكە ەرىك بەرگەن جاعدايدا عانا ءبىز ادامي قاعيداتتاردى تۇسىنە الامىز. مىنە، بۋدديزم ءىلىمىنىڭ نەگىزگى قاعيداتتارى وسى»، - دەدى چۋن ي الەمدىك جانە ءداستۇرلى دىندەر كوشباسشىلارىنىڭ VI سەزى اياسىندا ءوتىپ جاتقان «جاھاندىق قاۋىپسىزدىك تۇجىرىمداماسى رەتىندەگى «مانيفەست. ХХІ عاسىر»» تاقىرىبىندا وتكەن وتىرىستا.
چۋن يدىڭ ايتۋىنشا، الەمدەگى دىندەردىڭ ءبارى ءارتۇرلى بولىپ كەلگەنىمەن، ولاردىڭ ادامعا دەگەن قامقورلىق بارلىق دىندەردىڭ ءتۇپقازىعى.
«وزىڭە تىلەمەگەندى وزگەگە تىلەمە - بۋددا بىزگە وسىنداي ساباق بەردى. ياعني، ءوزىڭ قانداي باقىتتى بولعىڭ كەلسە، وزگەگە دە سونداي جاقسىلىق جاساۋعا تىرىس دەگەن ماعىنانى بىلدىرەدى. بارلىق مادەنيەتتەر مەن دىندەردىڭ ۇندەۋى ءبىر عانا ورتاق نۇكتەگە تۇيىسەدى. بارلىعى دا ادامنىڭ جاقسىلىعىنا، باقۋاتتىلىعىنا نەگىزدەلۋى ءتيىس. اداسۋدان الىس بولعانىمىز ابزال. اباي قۇنانباي ۇلى «اقىرىن ءجۇرىپ، انىق باس، ەڭبەگىڭ كەتپەس دالاعا» دەگەندەي ءارقايسىمىز جاقسىلىقتى وزىمىزدەن باستايىق. بۇكىل ادامزاتتىڭ جارقىن بولاشاعى - ءار ادامنىڭ جاقسىلىق جاساۋىنان باستالادى»، - دەدى چۋن ي.
ەسكە سالا كەتسەك، الەمدىك جانە ءداستۇرلى دىندەر كوشباسشىلارىنىڭ VI سەزى استانادا كەشە باستالعان بولاتىن. القالى جيىنعا بارلىق الەمدىك جانە ءداستۇرلى دىندەردىڭ وكىلدەرى، سونىمەن قاتار بەدەلدى ءدىني ليدەرلەر، ساياسي قايراتكەرلەر مەن حالىقارالىق ۇيىم وكىلدەرىنەن قۇرالعان 46 ەلدەن 82 دەلەگاتسيا قاتىسۋدا. سەزدىڭ مارتەبەلى مەيمانى - سەربيا رەسپۋبليكاسىنىڭ پرەزيدەنتى الەكساندر ۆۋچيچ. جاھاندىق شارانىڭ باستى جانە نەگىزگى تاقىرىبى - «ليدەرلەر قاۋىپسىز الەم ءۇشىن».
سەز بارىسىندا قازاقستان پرەزيدەنتى نۇرسۇلتان نازاربايەۆ مەملەكەتتەر اراسىنداعى سەنىمدى نىعايتىپ، قاۋىپسىز الەمدى قالىپتاستىرۋ جولىندا كونفەسسياارالىق، وركەنيەتارالىق ديالوگ ورتالىعىن بەكىتۋگە دايىن ەكەنىن مالىمدەگەن بولاتىن.